ନୂଆଦିଲ୍ଲୀ,୧୪।୧୦- ଚାମ୍ପିୟନ ପୂର୍ବତନ କ୍ରିକେଟର ଗୌତମ ଗମ୍ଭୀର ସୋମବାର ୩୮ ବର୍ଷରେ ପାଦ ଦେଇଛନ୍ତି। ଏହି ଅବସରରେ କ୍ରିକେଟ ଜଗତକୁ ଟୁଇଟ କରି ଶୁଭେଚ୍ଛା ଜଣାଇଛନ୍ତି। କ୍ରିକେଟ କ୍ୟାରିୟରରେ ଗମ୍ଭୀର ୧୪୭ ଦିନିକିଆ ଓ ୫୮ ଟେଷ୍ଟ ଖେଳି ଯଥାକ୍ରମେ ୫୨୩୮ ଓ ୪୧୫୪ ରନ୍ କରିଛନ୍ତି। ଭାରତୀୟ ଦଳର ଟେଷ୍ଟ ସ୍ପେଶାଲିଷ୍ଟ ଚେତେଶ୍ୱର ପୂଜାରା ଲେଖିଛନ୍ତି, ଗମ୍ଭୀର ତୁମକୁ ଜନ୍ମ ଦିନର ଅନେକ ଅନେକ ଶୁଭେଚ୍ଛା। ଭଗବାନ ତୁମ ମଙ୍ଗଳ କରନ୍ତୁ ଓ ସଫଳତା ଦିଅନ୍ତୁ। ପୂର୍ବତନ ବ୍ୟାଟ୍ସମ୍ୟାନ ଭିଭିଏସ୍ ଲକ୍ଷ୍ମଣ ଗମ୍ଭୀରଙ୍କ କେକ୍ କାଟିବାବେଳର ଫଟୋ ଟୁଇଟ୍ କରି କ୍ୟାପଶନରେ ଲେଖିଛନ୍ତି, ଗମ୍ଭୀର ଜନ୍ମଦିନର ଶୁଭେଚ୍ଛା। ତୁମ ଇଚ୍ଛା ଓ ସ୍ବପ୍ନ ପୂରଣ ହେଉ। ଉକ୍ତ ଫଟୋରେ ଇର୍ଫାନ ପଠାନ ଓ ଆର.ପି. ସିଂ ମଧ୍ୟ ରହିଛନ୍ତି। ଉଲ୍ଲେଖଥାଉ କି, ୨୦୦୭ ଟି୨୦ ବିଶ୍ୱକପ୍ ଓ ୨୦୧୧ ଆଇସିସି ବିଶ୍ୱକପ୍ ଫାଇନାଲରେ ଗମ୍ଭୀର ଚମତ୍କାର ପ୍ରଦର୍ଶନ କରିଥିଲେ। କ୍ରିକେଟରୁ ସନ୍ନ୍ୟାସ ନେବା ପରେ ଗମ୍ଭୀର ରାଜନୀତିରେ ପ୍ରବେଶ କରିଛନ୍ତି।
