ସମ୍ବଲପୁର,୮।୨(ବ୍ୟୁରୋ): ସମ୍ବଲପୁର ଅଇଁଠାପାଲି ଥାନାରେ କାର୍ଯ୍ୟରତ ଏସ୍ଆଇ ଯୁଗଳ କିଶୋର ସାଙ୍କୁ ନିଲମ୍ବନ କରାଯାଇଛି। କାର୍ଯ୍ୟରେ ଅବହେଳା ଓ ଚାର୍ଜଶିଟ ଦାଖଲରେ ବିଳମ୍ବ କରିବାରୁ ସମ୍ବଲପୁର ଏସ୍ପି କନୱର ବିଶାଳ ସିଂ ତାଙ୍କୁ ନିଲମ୍ବନ କରିଛନ୍ତି ।
ସୂଚନାଯୋଗ୍ୟ, ବୁଢ଼ାରଜା ଅଞ୍ଚଳରେ ରହୁଥିବା ନୀଳିମା ଦାଶଙ୍କ ଘରକୁ ସୌରଭ ଭଟ୍ଟାଚାର୍ଜ ନାମକ ଜଣେ ବ୍ୟକ୍ତି ଚୋରି କରିବାକୁ ଯାଇଥିଲେ । ସେହି ସମୟରେ ସେ ନୀଳିମାଙ୍କୁ ମରଣାନ୍ତକ ଆକ୍ରମଣ କରିଥିଲେ । ଗୁରୁତର ନୀଳିମାଙ୍କ ୮ ଦିନ ପରେ ଚିକିତ୍ସାଧୀନ ଅବସ୍ଥାରେ ମୃତ୍ୟୁ ଘଟିଥିଲା । ଏହି ଘଟଣାର ଅଇଁଠାପାଲି ଥାନା ଏସ୍ଆଇ ଯୁଗଳ କିଶୋର ଦାସ ତଦନ୍ତ ଦାୟିତ୍ୱ ନେଇଥିଲେ । ୧୨୦ ଦିନ ଭିତରେ ଚାର୍ଜଶିଟ ଦାଖଲ କରିବା ନିୟମ ରହିଥିଲେ ମଧ୍ୟ ଏହାଠାରୁ ଦିନକ ବିଳମ୍ବରେ ଅର୍ଥାତ୍ ୧୨୧ ଦିନ ପରେ ଦାଖଲ କରିଥିଲେ । ଇତିମଧ୍ୟରେ ଅଭିଯୁକ୍ତ ଜାମିନରେ ଆସି ଥିବା ବେଳେ ନୀଳିମାଙ୍କ ପରିବାର ଲୋକେ ଭୟଭୀତ ହୋଇ ଶୁକ୍ରବାର ଏସ୍ପିଙ୍କୁ ସୁରକ୍ଷା ଲାଗି ଦାବି କରିଥିଲେ । ଏହାସହ ତଦନ୍ତରେ ଅବହେଳା ଓ ଠିକ୍ ଭାବରେ ତଥ୍ୟ ପ୍ରମାଣ ଯୋଗାଡ ନ କରିବାରୁ ଅଭିଯୁକ୍ତଙ୍କୁ ଜାମିନ ମିଳିଥିବା ସେମାନେ ଅଭିଯୋଗ କରିଛନ୍ତି।
