ଚୌଦ୍ୱାର,୧୦ା୫(ଡି.ଏନ୍.ଏ.): କରୋନା ପ୍ରଭାବରେ ପ୍ରଭାବିତ ହୋଇଛନ୍ତି ବିଭିନ୍ନ ରାଜ୍ୟରୁ ଆସୁଥିବା ଦିନ ମଜୁରିଆ ଏବଂ ତାଙ୍କ ପରିବାର। ସାରା ରାଜ୍ୟରେ ଚାଲିଥିବା ଲକ୍ଡାଉନ୍ ଯୋଗୁ ଜୀବିକା ହରାଇଛନ୍ତି ଲୋକେ। ଗାଡ଼ିମୋଟର ଚାଲୁ ନ ଥିବାରୁ ଗ୍ରାମ ଅଭିମୁଖେ ପାଦରେ ଚାଲି ଚାଲି ଫେରିବା ଭଳି ଘଟଣା ଦେଖିବାକୁ ମିଳିଛି କଟକ ଜିଲା ଚୌଦ୍ୱାର ୧୬ନଂ, ୫୫ନଂ ଓ ୫ନଂ ଜାତୀୟ ରାଜପଥର ସଂଯୋଗସ୍ଥଳ ମଙ୍ଗୁଳି ଛକ ପୁରୁଣା ପଟାପୋଲ ନିକଟରେ। ଆଜକୁ ୬ ଦିନ ହେବ ପିଲାଛୁଆ ଓ ନିଜର ନିତ୍ୟ ବ୍ୟବହାର୍ଯ୍ୟ ଜିନିଷପତ୍ର ଧରି ସୁଦୂର ବାଲେଶ୍ୱରରୁ ବାହାରିଛନ୍ତି ଛତିଶଗଡ଼ ଅଭିମୁଖେ ୫ ପରିବାରର ୧୯ ସଦସ୍ୟ। ଅପରପକ୍ଷରେ ରାଜ୍ୟ ବାହାର ବିଶାଖାପାଟଣା ଅଞ୍ଚଳରୁ ୧୧ଜଣ ଛତିଶଗଡ଼ ଅଭିମୁଖେ ୮ ଦିନ ହେବ ଚାଲି ଚାଲି ଯାଉଥିବା ଦେଖିବାକୁ ମିଳିଛି। ଏ ସଂକ୍ରାନ୍ତରେ ସେମାନଙ୍କୁ ପଚାରିବାରୁ ନାମ ପଞ୍ଜୀକରଣ କରିଥିଲେ ସୁଦ୍ଧା ଯିବା ପାଇଁ କୌଣସି ସୁବିଧା ନ ମିଳିବାରୁ ଚାଲି ଚାଲି ଯାଉଥିବା କହିଛନ୍ତି। ଆମ ପାଇଁ ଗଛମୁଳ,ରାସ୍ତାକଡ, ନଦୀକୂଳ ଓ ବିଭିନ୍ନ ପୋଲିସ ଥାନା ରାତ୍ରି ଯାପନ ପାଇଁ ଏକମାତ୍ର ସହାରା ପାଲଟିଛି।