ଝାରସୁଗୁଡା ଅଫିସ, ୩୦।୩-ସମଗ୍ର ଦେଶରେ ଲକଡାଉନ ଯୋଗୁଁ ବିଭିନ୍ନ କଳକାରଖାନ ବନ୍ଦ ହୋଇଯାଇଛି। ଫଳରେ ଏଠାରେ କାର୍ଯ୍ୟ କରୁଥିବା ଶ୍ରମିକମାବେ ହଇରାଣ ହରକତ ହେଉଛନ୍ତି। ରବିବାର ଛତିଶଗଡ ରାଜ୍ୟର କେତେକ ଶ୍ରମିକ ଝାରସୁଗୁଡା ରୋଡ ଷ୍ଟେଶନର ରେଳଧାରଣାରେ ଚାଲି ଚାଲି ନିଜ ରାଜ୍ୟକୁ ଯାଉଥିବା ବେଳେ ପ୍ରଶାସନ ଦ୍ୱାରା ଉଦ୍ଧାର ହୋଇଛନ୍ତି। ସୂଚନା ମୁତାବକ ସମ୍ବଲପୁର ଜିଲା ରେଙ୍ଗାଲିସ୍ଥିତ ଏକ କାରଖାନରେ ଏହି ଶ୍ରମିକମାନେ କାର୍ଯ୍ୟ କରୁଥିଲେ। ଲକଡାଉନ ଯୋଗୁଁ କାରଖାନା ବନ୍ଦ ହେବା ପରେ ସେମାନେ ଖାଇବାକୁ ନ ପାଇ ରବିବାର ନିଜ ଗ୍ରାମକୁ ଯିବା ପାଇଁ ଉଦ୍ୟମ କରିଥିଲେ। ରେଙ୍ଗାଲିଠାରୁ ପ୍ରାୟ ୩୫ କିମି ରେଳ ଧାରଣାରେ ଚାଲି ଚାଲି ଯାଉଥିଲେ। ଏ ନେଇ ଝାରସୁଗୁଡା ଜିଲା ପ୍ରଶାସନ ଖବର ପାଇବା ପରେ ଉପଜିଲାପାଳ ଶିବ ଟପ୍ପୋ ଘଟଣାସ୍ଥଳକୁ ଆସି ସେମାନଙ୍କ ସହିତ ଆଲୋଚନା କରିଥିଲେ। ପରେ ସମ୍ବଲପୁର ପ୍ରଶାସନ ସହିତ ଆଲୋଚନା କରି ସେମାନଙ୍କୁ ଏକ ସ୍ବତନ୍ତ୍ର ଯାନ ଯୋଗେ ସମ୍ବଲପୁର ପଠାଇ ଦିଆଯାଇଥିଲା। ସେଠାରେ ସମ୍ବଲପୁର ଜିଲା ପ୍ରଶାସନ ଦ୍ୱାରା ରହିବା ଓ ଖାଇବା ବନ୍ଦୋବସ୍ତ କରାଯାଇଥିଲା।