ବାରିପଦା ଅଫିସ, ୧୦ା୫- କରୋନା ସଂକ୍ରମଣକୁ ରୋକିବା ପାଇଁ ତୃତୀୟ ପର୍ଯ୍ୟାୟରେ ହୋଇଥିବା ଲକ୍ଡାଉନ ସମୟରେ ବିଭିନ୍ନ ସ୍ଥାନରେ ଫସି ରହିଥିବା ଶ୍ରମିକମାନେ ଏବେ ଘରମୁହଁ। ହୋଇଛନ୍ତି। କିଏ ବସ୍ରେ ତ ଆଉ କିଏ ଟ୍ରେନ୍ରେ ଆସୁଛନ୍ତି। ସେହିଭଳି କେତେକ ବାଇକ୍ ଓ ସାଇକେଲ୍ରେ ମଧ୍ୟ ଫେରୁଛନ୍ତି। ଯେଉଁମାନଙ୍କ ପାଖରେ କିଛି ସୁବିଧା ନାହିଁ ସେମାନେ ଚାଲି ଚାଲି ପଳାଇ ଆସୁଛନ୍ତି। କେନ୍ଦ୍ରାପଡ଼ା ଜିଲା ପଟ୍ଟାମୁଣ୍ଡାଇ ବ୍ଲକ ବାଲିଆପାଟଣା ପଞ୍ଚାୟତର ସଞ୍ଜୟ କୁମାର ଜେନା (୩୯) ପଶ୍ଚିମବଙ୍ଗରୁ ଚାଲିଚାଲି ଗାଁକୁ ଫେରୁଥିବା ବେଳେ ବାରିପଦାଠାରେ ଥକି ପଡ଼ିଥିଲେ। ୩ ଦିନ ହେଲା ସେ କିଛି ଖାଇ ନ ଥିବାରୁ ଅସୁସ୍ଥ ହୋଇ ପଡ଼ିଥିଲେ। ରବିବାର ଅପରାହ୍ନରେ ପାଲବଣି ଗୋଲେଇାଠାରେ ଥିବା ବସ୍ଷ୍ଟପଠାରେ ପଡ଼ି ଯାଇଥିଲେ। ଖବର ପାଇ ସବୁଜ ସୁନ୍ଦର ବାହିନୀର ଆବାହକ ଜିତେନ୍ଦ୍ର ମହାନ୍ତି ସେଠାରେ ପହଞ୍ଚି ତାଙ୍କୁ ସହାୟତା କରିଥିଲେ। କିଛି ଖାଦ୍ୟ ପଦାର୍ଥ ଦେବା ପରେ ତାଙ୍କ ଠିକଣା ବୁଝି ବାଲିପାଟଣା ସରପଞ୍ଚ କିଶୋର କୁମାର ଜେନାଙ୍କ ସହିତ ଆଲୋଚନା କରିଥିଲେ। ତାଙ୍କୁ ନେବା ପାଇଁ ସରପଞ୍ଚ ଏକ ଗାଡ଼ି ପଠାଇଥିବା ବେଳେ ଉକ୍ତ ଗାଡ଼ି ବାରିପଦାରେ ପହଞ୍ଚିବା ପରେ ସଞ୍ଜୟଙ୍କୁ ନିଜ ପଞ୍ଚାୟତର କ୍ୱାରାଣ୍ଟାଇନ୍ କେନ୍ଦ୍ରକୁ ନିଆଯିବ ବୋଲି ଜଣାପଡ଼ିଛି।
ଉଲ୍ଲେଖଯୋଗ୍ୟ ଯେ, ସଞ୍ଜୟ ପଶ୍ଚିମବଙ୍ଗର ମାଲଦା ଜିଲାରେ ଏକ ଠିକା ସଂସ୍ଥା ଦ୍ୱାରା ରେଳ ଟ୍ରାକ୍ରେ କାମ କରୁଥିଲେ। ୪୫ ଦିନ ହେଲାଣି ଲକ୍ଡାଉନ ଯୋଗୁଁ ତାଙ୍କ ପାଖରେ ଥିବା ଅର୍ଥ ସରି ଯାଇଥିଲା। ଘରକୁ ଯିବା ଲାଗି ନାମ ପଞ୍ଜୀକରଣ କରିଥିଲେ ମଧ୍ୟ କିଛି ସୁଫଳ ମିଳି ନ ଥିଲା। ନିରାଶ ହୋଇ ସେ ତାଙ୍କ ପଞ୍ଚାୟତର ସରପଞ୍ଚଙ୍କ ସହିତ ଆଲୋଚନା କରିଥିଲେ। ହେଲେ ଘରକୁ ଫେରିବା ପାଇଁ ଗାଡ଼ି ନ ମିଳିବାରୁ ୩ ଦିନ ତଳେ ମାଲଦାରୁ କେନ୍ଦ୍ରାପଡ଼ା ଅଭିମୁଖେ ବାହାରିଥିଲେ। ପ୍ରଥମେ ମାଲଦାରୁ ଏକ ଟ୍ରକ୍ରେ ୧୫୦ କି.ମି ଆସିଥିଲେ। ପରେ ସେ ଉକ୍ତ ସ୍ଥାନରୁ ଚାଲିଚାଲି ପ୍ରାୟ ୩୫୦ କି.ମି ଦୂର ବାରିପଦାରେ ପହଞ୍ଚିଥିଲେ।