କେନ୍ଦୁଝର, ୨୧ା୫ (ସ୍ବ.ପ୍ର./ଡି.ଏନ.ଏ.)-ଚାଷ କାର୍ଯ୍ୟ ପାଇଁ ୨୦୨୦ ମସିହା ଖରିଫ ଋତୁରେ ଚାଷୀମାନଙ୍କୁ ଯଥା ସମୟରେ ବିହନ ଓ ସାର ଯୋଗାଇ ଦେବା ପାଇଁ ଜିଲାପାଳ ଆଶିଷ ଠାକ୍ରେ ଗୁରୁତ୍ୱାରୋପ କରିଛନ୍ତି ା ଚଳିତ ମେ’ ୧୯ ତାରିଖରେ ଅନୁଷ୍ଠିତ ଜିଲାସ୍ତରୀୟ କୃଷି ନୀତି ନିର୍ଦ୍ଧାରଣ କମିଟି ବୈଠକରେ ଅଧ୍ୟକ୍ଷତା କରି ଚାଷୀମାନେ ଯେପରି ଯଥା ସମୟରେ ଧାନ, ମକା ଓ ଅନ୍ୟାନ୍ୟ ବିହନ ଉଚିତ ମୂଲ୍ୟରେ ପାଇ ପାରିବେ ଏବଂ ପ୍ୟାକ୍ସ, ଲ୍ୟାମ୍ପ୍ ମଧ୍ୟରେ ଧାର୍ଯ୍ୟ ଦରରେ ସାର ପାଇପାରିବେ ଏ ଦିଗରେ ବିହିତ ପଦକ୍ଷେପ ନେବାକୁ ଜିଲାପାଳ ସମ୍ପୃକ୍ତ ଅଧିକାରୀଙ୍କୁ ନିର୍ଦ୍ଦେଶ ଦେଇଥିଲେ। କୋଭିଡ୍-୧୯ ପ୍ରଭାବରେ ଚାଷୀମାନଙ୍କର ଆର୍ଥିକ ମାନଦଣ୍ଡ ପ୍ରଭାବିତ ହୋଇଥିବାରୁ ନିର୍ଦ୍ଧାରିତ ଦରରେ ଚାଷୀମାନେ ପାଇବା ପାଇଁ ସମ୍ପୃକ୍ତ ବିଭାଗୀୟ ଅଧିକାରୀମାନେ ସହଯୋଗ କରିବାକୁ ନିର୍ଦ୍ଦେଶ ଦେଇଥିଲେ। ଏହା ସହିତ ‘ଆତ୍ମା’ ଯୋଜନା ଅନ୍ତର୍ଗତ ୨୭ ତମ ଗଭର୍ନିଂ ବଡି ମିଟିଂ ଅନୁଷ୍ଠିତ ହୋଇଥିଲା। ଚଳିତ ଖରିଫ ଋତୁରେ ଚାଷୀମାନଙ୍କ ପାଇଁ କ୍ଷେତ୍ର ପ୍ରଦର୍ଶନ, ପ୍ରଶିକ୍ଷଣ କାର୍ଯ୍ୟକ୍ରମ ଇତ୍ୟାଦି ସମ୍ପର୍କରେ ବୈଠକରେ ଆଲୋଚନା ହୋଇଥିଲା। ତତ୍ସହିତ ଜାତୀୟ ଖାଦ୍ୟ ନିରାପତ୍ତା ମିଶନର ଏକଜିକ୍ୟୁଟିଭ କମିଟି ବୈଠକ ମଧ୍ୟ ଅନୁଷ୍ଠିତ ହୋଇଥିଲା। ଉକ୍ତ ଯୋଜନାରେ ଧାନ, ଡାଲି ଜାତୀୟ ଫସଲ ଓ ମକା ଚାଷର କ୍ଷେତ୍ର ପ୍ରଦର୍ଶନ ବିଷୟରେ ଆଲୋଚନା କରାଯାଇ ଯୋଜନା ପ୍ରସ୍ତୁତ ହୋଇଥିଲା। ମୁଖ୍ୟ ଜିଲା କୃଷି ଅଧିକାରୀ ଶରତ ଚନ୍ଦ୍ର ମହାପାତ୍ର, ଉପନିର୍ଦ୍ଦେଶକ ଉଦ୍ୟାନ ଓମ୍ପ୍ରକାଶ ରଥ, ପ୍ରକଳ୍ପ ନିର୍ଦ୍ଦେଶକ ଜଳଛାୟା ଅରୁଣ କୁମାର ଦାଶ, ଉପନିର୍ଦ୍ଦେଶକ ଯୋଜନା ଓ ପରିସଂଖ୍ୟାନ ଗଜେନ୍ଦ୍ର କୁମାର ବେହେରାଙ୍କ ସମେତ ବିଭିନ୍ନ ଆନୁଷଙ୍ଗିକ ବିଭାଗର ଅଧିକାରୀ ଉକ୍ତ ବୈଠକରେ ଯୋଗଦେଇଥିଲେ।