ବାଲେଶ୍ୱର ଅଫିସ,୧୫।୮- ବାଲେଶ୍ୱର ଜିଲା ରେମୁଣା ବ୍ଲକ ଦୁର୍ଗାଦେବୀ ସେବା ସମବାୟ ସଂଘର ୪୫୮ ଜଣ ଚାଷୀଙ୍କୁ ମିଳୁନି ଫସଲ ବୀମା ଟଙ୍କ। ସଂଘର ସଭାପତିଙ୍କ ସମେତ ଚାଷୀମାନେ ଏ ନେଇ ଜିଲାପାଳ, ବାଲେଶ୍ୱର-ଭଦ୍ରକ କେନ୍ଦ୍ର ସମବାୟ ସମିତିର ସମ୍ପାଦକ ଏବଂ ଅନ୍ୟ ଅଧିକାରୀଙ୍କୁ ଲିଖିତ ଭାବେ ବାରମ୍ବାର ଜଣାଇବା ସତ୍ତ୍ୱେ କୌଣସି ପଦକ୍ଷେପ ନିଆଯାଉ ନାହିଁ। ବୁଧବାର ପୂର୍ବାହ୍ନରେ ସେମାନେ ପୁନଶ୍ଚ ନୂତନ ଜିଲାପାଳ କେ. ସୁଦର୍ଶନ ଚକ୍ରବର୍ତ୍ତୀଙ୍କୁ ଭେଟି ସମସ୍ୟା ସମ୍ପର୍କରେ ଅବଗତ କରାଇ ଏଥିରେ ତୁରନ୍ତ ହସ୍ତକ୍ଷେପ କରିବାକୁ ନିବେଦନ କରିଛନ୍ତି।
ବୀମା ସହାୟତା ପାଇ ନ ଥିବା ଚାଷୀ ଦର୍ଶାଇଛନ୍ତି ଯେ, ୪୫୮ ଜଣ ଚାଷୀ ଦୁର୍ଗାଦେବୀ ସେବା ସମବାୟ ସଂଘ ମାଧ୍ୟମରେ ବାଲେଶ୍ୱର-ଭଦ୍ରକ କୋ-ଅପରେଟିଭ୍ ବ୍ୟାଙ୍କ ରେମୁଣା ଶାଖାରୁ ଋଣ ନେଣଦେଣ କରି ଆସୁଛନ୍ତି। ଏଥିଲାଗି ସେମାନଙ୍କୁ ବୀମାଭୁକ୍ତ କରାଯାଉଛି। ୨୦୧୮-୧୯ରେ ଉକ୍ତ ଅଞ୍ଚଳରେ ଫସଲ ନଷ୍ଟ ହେବା କାରଣରୁ ବୀମା କମ୍ପାନୀ ବାଲେଶ୍ୱର-ଭଦ୍ରକ କୋ-ଅପରେଟିଭ୍ ବ୍ୟାଙ୍କରେ ଏବାବଦ ଟଙ୍କା ଜମା କରିଛନ୍ତି। ପରେ ଏହି ଅର୍ଥ ରେମୁଣା ଶାଖାକୁ ସ୍ଥାନାନ୍ତର କରାଯାଇଥିବା କୁହାଯାଉଛି। ଏହାସତ୍ତ୍ୱେ ବିଭିନ୍ନ ଆଳ ଦେଖାଇ ଚାଷୀଙ୍କୁ ବୀମା ରାଶି ଦିଆଯାଉ ନାହିଁ ବୋଲି ଦୁର୍ଗାଦେବୀ ସେବା ସମବାୟ ସଂଘ ସଭାପତି ଶଶୀ ଧର ଦ୍ୱିବେଦୀ କହିଛନ୍ତି। ୨୦୧୬ରେ କୃଷି ବିଭାଗ ଫସଲ ବୀମା ଯୋଜନାର ପ୍ରିନ୍ସପାଲ ସେକ୍ରେଟାରୀ ମନୋଜ ଆହୁଜାଙ୍କ ନିର୍ଦ୍ଦେଶ ଅନୁସାରେ ଠିକ୍ ଭାବେ ନେଣଦେଣ କରୁଥିବା ଚାଷୀଙ୍କ ବୀମା ଟଙ୍କା ସିଧାସଳଖ ସେମାନଙ୍କ ବ୍ୟାଙ୍କ ଆକାଉଣ୍ଟକୁ ସ୍ଥାନାନ୍ତର କରାଯିବ ବୋଲି କୁହାଯାଇଥିଲା। ଏ ସମ୍ପର୍କରେ ଜିଲା କୃଷି ଉପନିର୍ଦ୍ଦେଶକ କୈଳାସ ପରିଡ଼ା ବ୍ୟାଙ୍କଗୁଡ଼ିକୁ ସୂଚନା ଦେଇଛନ୍ତି। କିନ୍ତୁ ରେମୁଣା ବ୍ୟାଙ୍କ ଶାଖାରେ ଏହି ନୀତିନିୟମ ପାଳନ କରାଯାଉ ନ ଥିବାରୁ ସରପଞ୍ଚ କବିତା ଦେ, ଚାଷୀ ଉଦୟ କୁମାର ଦେ, ସୁଦର୍ଶନ ବେହେରା, ଚେମା ପ୍ରଧାନ, ଗୋବିନ୍ଦ ଚନ୍ଦ୍ର ମାଝି, ସତ୍ୟରଞ୍ଜନ ବେହେରା, ବୈକୁଣ୍ଠ ସାହୁ, ଉର୍ମିଳା ଦେହୁରୀ ପ୍ରମୁଖ ଜିଲାପାଳଙ୍କୁ ସାକ୍ଷାତ କରବା ଅବସରରେ ଅଭିଯୋଗ କରି ଉଦ୍ବେଗ ପ୍ରକାଶ କରିଛନ୍ତି। ଏ ସମ୍ପର୍କରେ ବାଲେଶ୍ୱର-ଭଦ୍ରକ କେନ୍ଦ୍ର ସମବାୟ ସମିତିର ସମ୍ପାଦକ ଅଜିତ୍ ପଟ୍ଟନାୟକଙ୍କୁ ପଚାରିବାରୁ କହିଛନ୍ତି, ରେମୁଣା ଶାଖା ବ୍ୟାଙ୍କର ସମସ୍ୟା ସମ୍ପର୍କରେ ସେ ଅବଗତ ଅଛନ୍ତି। ଯଥାଶୀଘ୍ର ଏ ଦିଗରେ ଆବଶ୍ୟକ ପଦକ୍ଷେପ ନିଆଯିବ। ଜିଲାପାଳ ଚକ୍ରବର୍ତ୍ତୀ ଅନୁରୂପ ତଦନ୍ତ କରି କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଛନ୍ତ। ତେବେ ଚାଷୀମାନଙ୍କ ବୀମା ଟଙ୍କାକୁ ପୁନର୍ବାର ଋଣ ଆକାରରେ ପ୍ରଦାନ କରାଯାଇପାରିବ ନାହଁି ସେ କହିଛନ୍ତି।