ବରଗଡ଼ ଅଫିସ୍,୧୦।୬-ଖରିଫ ଫସଲ ପାଖେଇ ଆସୁଛି। ଏହାକୁ ନେଇ ଏବେଠାରୁ କେତେକ ବିହନ ବିକ୍ରେତା କଳାବଜାର ପାଇଁ ତତ୍ପର ହୋଇ ପଡ଼ିଛନ୍ତି । ଅନ୍ୟପକ୍ଷେ ଜିଲା କୃଷିବିଭାଗ ମଧ୍ୟ ଏଭଳି କଳାବଜାର ପ୍ରତି ନଜର ରଖିଛି । ବୁଧବାର ଜିଲା କୃଷିବିଭାଗର ଏକ ସ୍ବତନ୍ତ୍ର ସ୍କ୍ବାଡ଼ ବରପାଲି ଅଞ୍ଚଳରେ ରହିଥିବା ବିହନ ଦୋକାନ ଉପରେ ଚଢ଼ାଉ କରିଥିଲା। ସେଠାକାର ହରିଓମ୍ ଟ୍ରେଡର୍ସ, ମହାବୀର ବିହନ ଭଣ୍ଡାର ଏବଂ କୃଷିସେବା କେନ୍ଦ୍ର ନାମକ ୩ଟି ଦୋକାନରେ ଚଢ଼ାଉ ପରେ ସେଠାରେ ବିହନ ବିକ୍ରେତାମାନେ ଚାଷୀଙ୍କୁ ରସିଦ୍ ଦେଉ ନଥିବା ଜଣାପଡ଼ିଥିଲା। ଫଳରେ ସମ୍ପୃକ୍ତ ବିହନ ବିକ୍ରେତାମାନଙ୍କୁ କାରଣଦର୍ଶାଅ ନୋଟିସ୍ ଦିଆଯାଇଛି ବୋଲି ଜିଲା ମୁଖ୍ୟ କୃଷି ଅଧିକାରୀ ଦୀନବନ୍ଧୁ ଗାନ୍ଧୀ ଜଣାଇଛନ୍ତି। ଏହା ସହିତ ବିହନ ଦୋକାନରୁ ୨ଟି କିସମର ବିହନ ନମୁନା ସଂଗ୍ରହ କରି ପରୀକ୍ଷା ପାଇଁ ତାକୁ ଭୁବନେଶ୍ୱର ପରୀକ୍ଷାଗାରକୁ ପଠାଯାଇଥିବା ସେ କହିଛନ୍ତି । ଚଢ଼ାଉରେ ଅନ୍ୟମାନଙ୍କ ମଧ୍ୟରେ ସହକାରୀ କୃଷି ନିର୍ଦ୍ଦେଶକ ରବି ନାରାୟଣ ସେନାପତି, ଯୁଗ୍ମମାନ ନିର୍ଦ୍ଧାରଣ ଅଧିକାରୀ ରବୀନ୍ଦ୍ର କୁମାର ସାହୁ, ବରପାଲି ବ୍ଲକର ସହକାରୀ କୃଷି ଅଧିକାରୀ ବନମାଳୀ ସାହୁ, ବାବାଜୀ ଚରଣ ସେଠୀ ପ୍ରମୁଖ ସାମିଲ ଥିଲେ । ତେବେ ବିହନ କିଣିବା ସମୟରେ ଚାଷୀମାନେ ସମ୍ପୃକ୍ତ ବିହନ ବିକ୍ରେତାଙ୍କଠାରୁ ରସିଦ୍ ମାଗି ନେବା ପାଇଁ ଜିଲା ମୁଖ୍ୟ କୃଷି ଅଧିକାରୀ ଗାନ୍ଧୀ ଚାଷୀଙ୍କୁ ପରାମର୍ଶ ଦେଇଛନ୍ତି ।