ଛତ୍ରପୁର,୧୯ା୪(ଡି.ଏନ୍.ଏ.): ଗଞ୍ଜାମ ଜିଲାରେ କରୋନା ଚଡ଼କ ଚାଷୀ, ମୂଲିଆ ଓ କୃଷି ଶ୍ରମିକଙ୍କ ଉପରେ ଅଧିକ ପଡ଼ିଥିବା ଜଣାପଡ଼ିଛି। ଲକ୍ଡାଉନ୍ ଓ ପ୍ରତ୍ୟହ ୧୯ଘଣ୍ଟିଆ ସଟ୍ଡାଉନ ଯୋଗୁ ଗମନାଗମନରେ କଟକଣା ଲାଗିଛି। ଫଳରେ ଚାଷୀଙ୍କ ଦ୍ୱାରା ଉତ୍ପାଦିତ ପନିପରିବା ବାହାରକୁ ରପ୍ତାନୀ ହୋଇପାରୁନି। ଯେଉଁଥି ପାଇଁ ବଜାରରେ ଖାଉଟି ଅଧିକ ଦରରେ କିଣୁଥିବାବେଳେ ଚାଷୀମାନେ କ୍ଷତି ସହୁଥିବା ଗଞ୍ଜାମ ବ୍ଲକର କଣ୍ଟାପଡ଼ା ଗାଁର ଚାଷୀ ଝଡ଼ିଆ ପ୍ରଧାନ ଓ ମୋହନ ପ୍ରଧାନ କହିଛନ୍ତି। ବେପାରୀ ନ ଆସିବା ଓ ବାହାରକୁ ପଠା ନ ଯିବାରୁ ଟମାଟୋ ପଚି ସଢ଼ି ନଷ୍ଟ ହେଲାଣି। ଗଛରେ ବାଇଗଣ ପାଚି ହଳଦିଆ ପଡ଼ିଗଲାଣି। ବିକ୍ରିବଟା ସମସ୍ୟା ଯୋଗୁ ଚାଷୀ ଆଉ ଗଛରୁ ଏହା ତୋଳୁ ନ ଥିବା ଛତ୍ରପୁର ବ୍ଲକ ପୁଳିଙ୍ଗି ଗାଁର କୁନା ଦାଶ କହିଛନ୍ତି। ପୂର୍ବରୁ କିଲୋ ପିଛା କଞ୍ଚା ଲଙ୍କା ୫ ଟଙ୍କା ରେ ବିକିବାକୁ ବାଧ୍ୟ ହେଉଥିଲେ ଚାଷୀ। ଏବେ ତୋଳିବା ଖର୍ଚ୍ଚ ବାହାରୁ ନ ଥିବାରୁ ପନିପରିବା ଗଛରେ ରହି ପାଚିଲାଣି। ଯାହାର କ୍ଷତି ସହିବାକୁ ପଡୁଥିବା ରୁକୁଣି ଗାଁର ଭିକାରି ଦାଶ କହିଛନ୍ତି । ସେହିପରି ବଉଳଗାଁ, ମହନାଦପୁର, ବଡ଼ମାଧପୁର, ବରଙ୍ଗ, ସିଂଗିପୁର, ପୋଟଲାମପୁର, ପୋଡ଼ାପଦର, ହଂସପୁର ଆଦି ଗାଁରେ ପନିପରିବା, ଲଙ୍କାଚାଷ କରି ଚାଷୀ ଦୁର୍ଦ୍ଦଶାରେ ପଡ଼ିଯାଇଛନ୍ତି। ଚାଷୀମାନଙ୍କର ସମସ୍ୟା ସମାଧାନ କରିବାକୁ ଋଷିକୂଲ୍ୟା ରୟତ ମହାସଭାର ସମ୍ପାଦକ ସୀମାଞ୍ଚଳ ନାହାକ ଦାବି କରିଛନ୍ତି।