ନାଉଗାଁ,୫ା୮(ସ୍ବ.ପ୍ର.): ଚାଷ ଓ ଚାଷୀଙ୍କ ଉନ୍ନତି ପାଇଁ ସରକାର ଅନେକ ଯୋଜନା କରିବା ସହ ପ୍ରୋତ୍ସାହନ ଦେଉଛନ୍ତି। ମାତ୍ର ସର୍ବ ପ୍ରଥମ ଆବଶ୍ୟକତା ଜଳସେଚନ ସୁବିଧା ନ ଥିବାରୁ ଚାଷୀ ବହୁ ସମସ୍ୟାର ସମ୍ମୁଖୀନ ହେଉଛନ୍ତି। ନାଉଗାଁ ବ୍ଲକରେ ସାଧାରଣତଃ ଚାଷୀଙ୍କ ଏକମାତ୍ର ଭରସା ହେଉଛି ବର୍ଷାଜଳ। ଚଳିତବର୍ଷ ଅନିୟମିତ ବର୍ଷା ଯୋଗୁ ଚାଷକାର୍ଯ୍ୟ ଗାଁ ବିଶେଷ ଭାବେ ପ୍ରଭାବିତ ହୋଇଛି। କେନାଲ, ଉଠା ଜଳସେଚନ ପ୍ରକଳ୍ପ, ସ୍ଲୁଇସ ଗେଟ୍ ଆଦି ମାଧ୍ୟମରେ ଜଳସେଚନ ବ୍ୟବସ୍ଥା ହୋଇଥିଲେ ମଧ୍ୟ ସେସବୁ କାଗଜ କଲମରେ ଚାଲିଛି। ଅନେକ ସ୍ଥାନରେ ସ୍ଲୁଇସ ଗେଟ୍ ଓ ଚେକ ଡ୍ୟାମ ବିପର୍ଯ୍ୟସ୍ତ ଅବସ୍ଥାରେ ରହିଛି। ଫଳରେ ସେସବୁ ଚାଷୀଙ୍କ କାମରେ ଲାଗୁନାହିଁ। ଏହି ବ୍ଲକ ତିରୁଣା ପଞ୍ଚାୟତ ପୂର୍ବ ଦିଗରେ ରହିଛି ବାଉଁଶ ଯୋରୀ। ଉକ୍ତ ପଞ୍ଚାୟତ ଖାଲୁଆ ଅଞ୍ଚଳ ହୋଇଥିବାବେଳେ ଏହି ଯୋରୀ ମାଧ୍ୟମରେ ତିରୁଣା ସମେତ ଜାମୁଗାଁ, ଡାବର, କୋରୁଅ ଆଦି ପଞ୍ଚାୟତର ଚାଷଜମିରୁ ବନ୍ୟାଜଳ ନିଷ୍କାସିତ ହୋଇଥାଏ। ଗୋବରୀ ଓ ଦେବୀ ନଦୀରେ ବନ୍ୟା ଆସିଲେ ଏହି ଯୋର ଦେଇ ଡାବର, ତିରୁଣା, ଜାମୁଗାଁ ପଞ୍ଚାୟତର ଚାଷଜମି ଜଳମଗ୍ନ ହୋଇଥାଏ। ନଦୀରୁ ପାଣି ନ କମିବା ପର୍ଯ୍ୟନ୍ତ ଚାଷଜମି ବୁଡି ରହିଥାଏ। ଫଳରେ ଜଳ ନିଷ୍କାସନରେ ବିଳମ୍ବ ହୋଇଥାଏ। ଅଲଣା ପଞ୍ଚାୟତ ଦେଇ ପ୍ରବାହିତ ହାତୀ ଯୋରରେ ଅଲଣା, ନୂଆଗାଁ, ଗଜରାଜପୁର, ଘୋଡାଂଶ, ଜାମୁଗାଁ ପଞ୍ଚାୟତର ଉଦ୍ବୃତ ଜଳ ଦେବୀ ନଦୀକୁ ନିଷ୍କାସିତ ହୁଏ। ଚାଷୀଙ୍କ ସ୍ବାର୍ଥକୁ ଦୃଷ୍ଟିରେ ରଖି ତତ୍କାଳୀନ ବିଧାୟକ ଉମେଶ ସ୍ବାଇଁଙ୍କ ପ୍ରଚେଷ୍ଟାରେ ୧୯୮୦ରେ କୋରୁଅ ପଞ୍ଚାୟତ ତେଲସରାଠାରେ ଡ୍ରେନେଜ ବିଭାଗ ଦ୍ୱାରା ଏକ ସ୍ଲୁଇସ ଗେଟ୍ ନିର୍ମାଣ ହୋଇଥିଲା। ଏହା ଦ୍ୱାରା ବନ୍ୟାଜଳ ରୋକିବା ସହ ମରୁଡ଼ି ସମୟରେ ଜଳସେଚନ କରିବାକୁ ଲକ୍ଷ୍ୟ ରଖାଯାଇଥିଲା। ଦୀର୍ଘ ୩୯ ବର୍ଷ ହେଲା ଏହା ନିର୍ମାଣ ହୋଇଥିବାବେଳେ ମରାମତି ଅଭାବରୁ ବିପର୍ଯ୍ୟସ୍ତ ଅବସ୍ଥାରେ ରହିଛି।
ଫଳରେ ଏହା ଦ୍ୱାରା ଜଳ ସଂରକ୍ଷିତ ହୋଇପାରୁନି। ଏହି ସ୍ଲୁଇସ ଗେଟ୍ ଉପରେ ତିରୁଣା, ଡାବର, ଜାମୁଗାଁ ଓ କୋରୁଅ ପଞ୍ଚାୟତ ଅଧୀନ ବହୁ ଗ୍ରାମର ଚାଷୀ ନିର୍ଭରଶୀଳ। ଏହି ସ୍ଲୁଇସ ଗେଟ୍ର କବାଟଗୁଡିକ ଭାଙ୍ଗିଗଲାଣି। ଯଦି ଏହା ମରାମତି କରାଯାଆନ୍ତା, ତେବେ ବର୍ତ୍ତମାନ ସ୍ବଳ୍ପବୃଷ୍ଟି ସମୟରେ ହଜାର ହଜାର ହେକ୍ଟର ଜମିରେ ଚାଷ କାର୍ଯ୍ୟ ହୋଇପାରନ୍ତା ବୋଲି ଚାଷୀମାନେ ମତବ୍ୟକ୍ତ କରିଛନ୍ତି।