ଅନୁଗୋଳ ସହର,୨୦ା୨ – ଉଚ୍ଚ ପଦବୀର ଅଧିକାରୀ ଥିଲେ। ମୋଟା ଅଙ୍କର ବେତନ ବି ପାଉଥିଲେ। ଅତୀତରେ ଅନୁଗୋଳ କଲେଜର ଛାତ୍ର ସଂସଦ ସଭାପତି ଥିବାରୁ ସହରରେ ଭଲ ପରିଚୟ ମଧ୍ୟ ଥିଲା। ତଥାପି ଆତ୍ମସନ୍ତୋଷ ପାଇଁ ସେ ଚାକିରିକୁ ତୁଚ୍ଛ କରି ଚାଷକୁ ଆପଣାଇ ନେଲେ।ଜୈବିକ ଚାଷପଦ୍ଧତିକୁ ଗୁରୁତ୍ୱ ଦେଇ ଅନୁଗୋଳ ଜିଲାରେ ଆଧୁନିକ କୃଷିକ୍ଷେତ୍ରରେ ନଁ। କରିଥିବା ଏହି ଉଚ୍ଚଶିକ୍ଷିତ ଚାଷୀ ଜଣକ ହେଲେ ବନ୍ତଳା ଥାନା ତଳଗଡ଼ ଗ୍ରାମର ବିଭୁ ପ୍ରଧାନ।
ଅନୁଗୋଳ ମହାବିଦ୍ୟାଳୟରେ ଯୁକ୍ତ ୩ ବାଣିଜ୍ୟ ପଢ଼ୁଥିବା ବେଳେ ୨୦୦୦-୨୦୦୧ରେ ସେ ଛାତ୍ର ସଂସଦ ସଭାପତି ଭାବେ ନିର୍ବାଚିତ ହୋଇଥିଲେ। ପାଠ ସରିବା ପରେ ସେ ପ୍ରଥମେ ଏକ ବିଜ୍ଞାପନ ଏଜେନ୍ସି ଖୋଲି ୬ ବର୍ଷ ଚଳାଇଥିଲେ। ପରେ ଆଇସିଆଇସିଆଇ ବ୍ୟାଙ୍କର ଅନୁଗୋଳ ଶାଖାରେ ବୀମା ମ୍ୟାନେଜର ଭାବେ ନିଯୁକ୍ତି ପାଇଥିଲେ। ସେଠାରେ ୫ ବର୍ଷ ଧରି କାମ କରିଥିଲେ ମଧ୍ୟ ଚାକିରିର ମୋହ ତାଙ୍କୁ ରୋକିପାରି ନ ଥିଲା। କୃଷିକ୍ଷେତ୍ର ପ୍ରତି ମନରେ ଆଗ୍ରହ ଦେଖାଦେବାରୁ ସେ ଚାକିରି ଛାଡ଼ି ପ୍ରଥମେ ଭୁବନପୁରରେ ଥିବା ନିଜର ୧୧ ଏକର ଜମିରେ ଅମୃତ ଭଣ୍ଡା, ପୋଟଳ, କଦଳୀ, ଆମ୍ବ, ସଜନା ଆଦି ଚାଷ କରିଥିଲେ। କିନ୍ତୁ ବନ୍ୟଜନ୍ତୁ ବ୍ୟାପକ କ୍ଷୟକ୍ଷତି ଘଟାଇବାରୁ ସେଠାରୁ ମୁହଁ ଫେରାଇ ଅନୁଗୋଳ ସହର ନିକଟ ଶରଧାପୁର ଗ୍ରାମର ଜଣେ ବ୍ୟକ୍ତିଙ୍କ ୬ ଏକର ଜମି ଲିଜ୍ ନେଇ ଚାଷ କଲେ। ଏକ ଲକ୍ଷ ଟଙ୍କା ଖର୍ଚ୍ଚ କରି ଖାଲ ଢିପକୁ ସମତଳ କରିବା ପରେ ମାଟି ବିଶୁଦ୍ଧ ପାଇଁ ୫୦ ହଜାର ଟଙ୍କାର ଗୋବର କିଣି ଜମିରେ ପକାଇଲେ। ଏଥିସହିତ ବୁନ୍ଦା ଜଳ ସେଚନ, ବୋରଓ୍ବେଲ ଓ ୬ ହଜାର ମିଟର ପାଇପ୍ କିଣିବା ବାବଦକୁ ୩ ଲକ୍ଷ ଟଙ୍କା ବ୍ୟୟ କରିଥିଲେ। ୨୦୧୭ ମସିହାରେ କଦଳୀ, ଲେମନ ଗ୍ରାସ, ପାମା ରୋଜା ଏକ ଏକର ଲେଖାଏ, ଦେଶୀ ମକା ଅଧା ଏକର, ବେବିକର୍ନ ଅଧା ଏକର, ସୁଇଟ କର୍ନ ପାଞ୍ଚ ଗୁଣ୍ଠ, କଲରା, ପୋଟଳ, କଖାରୁ ଅଧା ଏକର ଲେଖାଏ, ମଶା ଘଉଡାଇବା ତେଲ ଅଧ ଏକର, ରୋହିତ ଏକ ଏକର, ଭାଗ୍ୟ ସଜନା ଅଧା ଏକର, ସପୁରୀ (କୁଇନ ଭେରାଇଟ) ଦୁଇଶହ ଗଛ, କଦଳୀ ଜି୯ ଭିତରେ ଅଦା ଏକ ଏକର, ବନ୍ତଳ ଓ ପାଟକୁରା କଦଳୀ ଚାଷ ସହ ନିଜେ ଖାଇବା ପାଇଁ କିଚେନ ଗାର୍ଡେନ ଆରମ୍ଭ କଲେ। ଏହିପାଇଁ ସେ ପ୍ରାୟ ୪ ଲକ୍ଷ ଟଙ୍କା ଖର୍ଚ୍ଚ କରିଛନ୍ତି। ଚାଷରେ ସହାୟତା ପାଇଁ ଦୈନିକ ୫ ଜଣ ଶ୍ରମିକଙ୍କୁ ସେ ନିଯୁକ୍ତ କରିଛନ୍ତି। ଏହି ଚାଷରୁ ସେ ପ୍ରଥମ ବର୍ଷ ୩ ଲକ୍ଷ, ୨ୟ ବର୍ଷ ୪ ଲକ୍ଷ ଓ ଚଳିତ ବର୍ଷ ବର୍ତ୍ତମାନ ସୁଦ୍ଧା ୧ ଲକ୍ଷ ଟଙ୍କା ରୋଜଗାର କରିସାରିଛନ୍ତି। ଏହି ଅଢେଇ ବର୍ଷ ମଧ୍ୟରେ ସେ ପ୍ରାୟ ତିନି ଲକ୍ଷ ଟଙ୍କା ଲାଭ ପାଇଛନ୍ତି। ସରକାରୀ ସହାୟତା ପାଇ ନ ଥିଲେ ବି ନିଜେ ଜୈବିକ ପଦ୍ଧତିରେ ଓ ବିନା କୀଟ ନାଶକରେ ଏସବୁ ଚାଷ କରି ଲାଭବାନ ହେବା ଅନ୍ୟମାନଙ୍କୁ ଏଥିପାଇଁ ପ୍ରୋତ୍ସାହିତ କରୁଥିବା ବିଭୁ ପ୍ରକାଶ କରିଛନ୍ତି। ସେ କହିଛନ୍ତି, ଅନୁଗୋଳ ଜିଲାରେ ବେବିକର୍ନର ଭଲ ଚାହିଦା ଥିବାରୁ ଭୁବନେଶ୍ୱରର ଜଣେ ଚାଷୀଙ୍କଠାରୁ ଦୁଇ କେଜି ମଞ୍ଜି ଆଣିବା ସହ ଚାଷ ପ୍ରଣାଳୀ ସମ୍ପର୍କରେ ତାଲିମ ନେଇ ଅନୁଗୋଳରେ ତାହାକୁ ସଫଳ କରିପାରିଛନ୍ତି। ଏପରି କି ବେବିକର୍ନ ଉତ୍ପାଦନରେ ସେ ଜିଲାର ପ୍ରଥମ ଚାଷୀ ବୋଲି ଦାବି କରିଛନ୍ତି। ସେହିପରି ଉନ୍ନତମାନର କଳାଧାନ ଚାରି କୁଇଣ୍ଟାଲ ଓ ତିନି ଗୁଣ୍ଠ ଜମିରୁ ସାରିଆ ଧାନ ଅମଳ କରିସାରିଛନ୍ତି। ଜୈବିକ ପଦ୍ଧତିରେ ସେ କରିଥିବା ଚାଷ କାର୍ଯ୍ୟ ଦେଖିବାକୁ ଜିଲାର ବିଭିନ୍ନ ଅଞ୍ଚଳରୁ ତାଙ୍କ ବଗିଚାକୁ ଆସୁଥିବା ଚାଷୀଙ୍କୁ ସେ ଏ ଦିଗରେ ସଚେତନ କରୁଥିବା ବିଭୁ ପ୍ରକାଶ କରିଛନ୍ତି। କୃଷିକୁ ନିଶା ଓ ପେସା କରିଥିବା ବିଭୁ ଚାଷରୁ ଗଭୀର ଆତ୍ମସନ୍ତୋଷ ଲାଭ କରୁଥିବା ପ୍ରକାଶ କରିଛନ୍ତି।