ମହାକାଳପଡା,୨୪ା୬(ଡି.ଏନ୍.ଏ.): ମହାକାଳପଡା ବ୍ଲକ ଖରିନାସୀ ପଞ୍ଚାୟତ ଅନ୍ତର୍ଗତ ବାରଶହ ଏକର ଅଞ୍ଚଳ ଚାଷ ଜମି ପାର୍ଶ୍ୱରେ ଚିଙ୍ଗୁଡି ବ୍ୟବସାୟୀମାନେ ବେଆଇନ ଭାବେ ଘେରି ନିର୍ମାଣ କରିଛନ୍ତି। ଘେରିର ଲୁଣାଜଳ ଚାଷ ଜମିରେ ପ୍ରବେଶ କରାଉଛନ୍ତି। ଫଳରେ ଚାଷ ଜମିଗୁଡିକ ନଷ୍ଟ ହେଉଛି। ଏନେଇ ପ୍ରଶାସନ ପକ୍ଷରୁ କୌଣସି କାର୍ଯ୍ୟାନୁଷ୍ଠାନ ନିଆଯାଉ ନ ଥିବାରୁ ପ୍ରତିବାଦରେ ଚାଷୀମାନେ ରବିବାର ଖରିନାସୀପ୍ରଭାକରପୂର ପୂର୍ତ୍ତବିଭାଗ ରାସ୍ତାକୁ ଓଁକାର ମନ୍ଦିରଠାରେ ରାସ୍ତାରୋକୋ କରିଥିଲେ। ସେମାନେ ରାସ୍ତାରେ ଟାୟାର ଜାଳି ପ୍ରତିବାଦ କରିବାରୁ ଦୁଇଘଣ୍ଟା ପର୍ଯ୍ୟନ୍ତ ଯାତାୟାତ ଠପ୍ ହୋଇଯାଇଥିଲା। ଖବରପାଇ ଜମ୍ବୁ ମେରାଇନ୍ ପୋଲିସ ଘଟଣାସ୍ଥଳରେ ପହଞ୍ଚତ୍ ଚାଷୀଙ୍କୁ ବୁଝାଶୁଝା କରିବା ପରେ ରାସ୍ତାରୋକୋ ପ୍ରତ୍ୟାହୃତ ହୋଇଥିଲା।
ସୂଚନାଯୋଗ୍ୟ, ଖରିନାସୀ ଅନ୍ତର୍ଗତ ବାରଶହ ଏକର ଅଞ୍ଚଳରେ ବେଆଇନ ଭାବେ ବହୁ ପରିମାଣରେ ଚିଙ୍ଗୁଡିଘେରି ନିର୍ମାଣ କରାଯାଇଛି। ଖରାଦିନେ ଘେରୀରେ ଥିବା ଲୁଣା ଜଳକୁ ଚାଷ ଜମିରେ ପ୍ରବେଶ କରାଇ ଧାନ ତଳି ନଷ୍ଟ କରାଯାଉଛି। ଏନେଇ ଚଳିତ ବର୍ଷ ଫେବୃୟାରୀରେ ସ୍ଥାନୀୟ ଅଞ୍ଚଳର ଚାଷୀ ତତ୍କାଳୀନ କେନ୍ଦ୍ରାପଡ଼ା ଜିଲାପାଳ ଦାଶରଥି ଶତପଥୀଙ୍କ ନିକଟରେ ଅଭିଯୋଗ କରିଥିଲେ। ଏହି ଘଟଣାର ସରଜମିନ ତଦନ୍ତ କରି ସମାଧାନ କରିବାକୁ ସେତେବେଳେ ଜିଲାପାଳ ତହସିଲଦାରଙ୍କୁ ନିର୍ଦ୍ଦେଶ ଦେଇଥିଲେ। ଜିଲାପାଳଙ୍କ ନିର୍ଦ୍ଦେଶକ୍ରମେ ତହସିଲଦାର ଘଟଣାସ୍ଥଳରେ ପହଞ୍ଚତ୍ ଏହାର ତଦନ୍ତ କରିଥିଲେ ମଧ୍ୟ କୌଣସି କାର୍ଯ୍ୟାନୁଷ୍ଠାନ ନେଇ ନ ଥିଲେ। ଏହାପରେ ପୁନର୍ବାର ଲୁଣା ପାଣି ପଶି ଚାଷ ଜମି ନଷ୍ଟ ହେବାରୁ ଚାଷୀମାନେ ଆନ୍ଦୋଳନ କରିଛନ୍ତି । ଖରିନାସୀ-ଟୁବି ଗଳିଆ ନଦୀ ଘେରୀବଂନ୍ଧର ୧ ନଂ କଲଭର୍ଟରେ ଲୁଣାପାଣି ଛଡାଯାଇଛି ବୋଲି ସେମାନେ ଅଭିଯୋଗ କରିଛନ୍ତି। ତୁରନ୍ତ ଏହି ସମସ୍ୟାର ସମାଧାନ କରିବାକୁ ସେମାନେ ଦାବି କରିଛନ୍ତି।
ଏହି ଆନ୍ଦୋଳନରେ ଓ୍ବାର୍ଡ ସଭ୍ୟ କଲ୍ୟାଣ ରାୟଙ୍କ ନେତୃତ୍ୱରେ ମିଳନ ମଣ୍ଡଳ, ଭବେନ ମଣ୍ଡଳ, ବିଶ୍ୱନାଥ ସରକାର, ଊର୍ମିଳା ଗୋସ୍ବାମୀ ଓ ମନୋଜ ମଣ୍ଡଳ ସମେତ ୧୦୦ରୁ ଊର୍ଦ୍ଧ୍ୱ ଚାଷୀ ସାମିଲ ହୋଇଥିଲେ। ଏନେଇ ପଦକ୍ଷେପ ନିଆ ନ ଗଲେ ଆଗାମୀ ଦିନରେ ବଡ ଧରଣର ଆନ୍ଦୋଳନ କରାଯିବ ବୋଲି ଚାଷୀମାନେ ଚେତାବନୀ ଦେଇଛନ୍ତି।