ନୂଆଦିଲ୍ଲୀ,୬।୫: ଚାହିଦା ଫେରାଇ ଆଣିବା ଲାଗି ଭାରତ ପର୍ଯ୍ୟାପ୍ତ ପରିମାଣର ଆର୍ଥତ୍କ ପ୍ୟାକେଜ ପ୍ରଦାନ କରୁ ବୋଲି ନୋବେଲ ବିଜେତା ଅର୍ଥନୀତିଜ୍ଞ ଅଭିଜିତ ବାନାର୍ଜୀ କହିଛନ୍ତି। ଲୋକଙ୍କ ହାତକୁ ଅର୍ଥ ସିଧାସଳଖ ପ୍ରଦାନ କଲେ ଲକ୍ଡାଉନ ପରେ ଏହା ଦେଶରେ ଚାହିଦା ବଢ଼ାଇବା ଦିଗରେ ସହାୟକ ହେବ ବୋଲି ସେ ମତ ପ୍ରକାଶ କରିଛନ୍ତି। ଦେଶର ଅର୍ଥ ବ୍ୟବସ୍ଥାକୁ ନେଇ କଂଗ୍ରେସ ନେତା ରାହୁଲ ଗାନ୍ଧୀଙ୍କ ସହ ସେ ଭିଡିଓ କନଫରେନ୍ସିଂ ଯୋଗେ ଆଲୋଚନା କରିଛନ୍ତି। ସ୍ବଚ୍ଛଳ ନ ଥିବା ଦେଶର ୬୦ ଭାଗ ଲୋକଙ୍କୁ ସିଧାସଳଖ ଅର୍ଥ ଯୋଗାଇ ପାରିଲେ ଚାହିଦା ଫେରାଇ ଆଣିବାକୁ ଏହା ସହାୟକ ହୋଇପାରିବ ବୋଲି ସେ ମତବ୍ୟକ୍ତ କରିଛନ୍ତି।
ସେ କହିଛନ୍ତି ଯେ, ଆମେରିକା, ଜାପାନ, ୟୁରୋପ ଭଳି ପ୍ରମୁଖ ଅର୍ଥ ବ୍ୟବସ୍ଥାଗୁଡ଼ିକ ବୃହତ୍ ପରିମାଣର ଆର୍ଥତ୍କ ପ୍ୟାକେଜ ପ୍ରଦାନ କରିଛନ୍ତି। ଭାରତ ମଧ୍ୟ ଏହି ପନ୍ଥା ଅବଲମ୍ବନ କରିବା ଦିଗରେ ପଦକ୍ଷେପ ନେବା ଉଚିତ। ସେ ଆମେରିକାର ଉଦାହରଣ ଦେଇ କହିଛନ୍ତି, ମୋଟ ଜିଡିପିର ୧୦% ସେଠାରେ ପ୍ୟାକେଜ ଭାବେ ପ୍ରଦାନ କରାଯାଇଛି। ମାତ୍ର ଭାରତରେ ଏହା ମାତ୍ର ୧%। ଭାରତ ସରକାର ଗ୍ରହଣ କରିଥିବା ମୋରାଟୋରିୟମ ସୁବିଧାକୁ ଭଲ ଭାବେ ଲାଗୁ କରାଇବା ଆବଶ୍ୟକତା ରହିଛି ବୋଲି ସେ ପରାମର୍ଶ ଦେଇଛନ୍ତି। ଯେଉଁ ଲୋକମାନେ ରାଶନ ସାମଗ୍ରୀ ପାଇବାକୁ ଅସୁବିଧାର ସାମ୍ନା କରୁଛନ୍ତି ତାଙ୍କୁ ଅସ୍ଥାୟୀ ରାଶନ କାର୍ଡ ପ୍ରଦାନ କରାଯିବା ଉପରେ ସେ ଜୋର ଦେଇଛନ୍ତି। ଆଗକୁ ଦେବାଳିଆ ସମସ୍ୟା ବଢ଼ିବାକୁ ଥିବାରୁ ସେହି ଅନୁସାରେ ସରକାର ପଦକ୍ଷେପ ନେବା ଆବଶ୍ୟକ।
