ସିଙ୍ଗାପୁର: ଆପଣ ଚା’ ପିଅନ୍ତି କି? ତେବେ ଆପଣଙ୍କ ପାଇଁ ରହିଛି ଏକ ଖୁସି ଖବର। ଏକ ସର୍ଭେରୁ ଜଣାପଡ଼ିଛି ଯେ, ପ୍ରତ୍ୟେକ ଦିନ ଚା’ପିଉଥିବା ବ୍ୟକ୍ତିଙ୍କ ମସ୍ତିଷ୍କ ଚା’ ନ ପିଉଥିବା ବ୍ୟକ୍ତିଙ୍କ ମସ୍ତିଷ୍କ ତୁଳନାରେ ଅଧିକ ସୁସ୍ଥ ଓ ସଂଗଠିତ। ଏଭଳି ରିପୋର୍ଟ ଏଜିଂ ନାମକ ଏକ ଜର୍ନାଲରେ ପ୍ରକାଶ ପାଇଛି। ସର୍ଭେରେ ୩୬ ଜଣ ବୟୋଜ୍ୟେଷ୍ଠଙ୍କ ନ୍ୟୁରୋଇମେଜିଙ୍ଗ୍ ତଥ୍ୟକୁ ନେଇ ପରୀକ୍ଷଣ କରିବା ପରେ ଏହି ରିପୋର୍ଟ ପ୍ରକାଶ କରାଯାଇଛି।
ଚା’ ପିଇବା ଦ୍ୱାରା ମସ୍ତିଷ୍କ ଉପରେ ସକାରାତ୍ମକ ପ୍ରଭାବ ପଡ଼ିଥାଏ। ନିୟମିତ ଭାବେ ଚା’ ପିଇଲେ ବାର୍ଦ୍ଧକ୍ୟରେ ମସ୍ତିଷ୍କ ଜନିତ ସମସ୍ୟାରୁ ମଧ୍ୟ ରକ୍ଷା ମିଳିଥାଏ। ତେବେ ଚା’ପିଇବାର ଉପକାରିତା ବାବଦରେ ଏହା ହେଉଛି ସର୍ବପ୍ରଥମ ସର୍ଭେ ରିପୋର୍ଟ ବୋଲି କହିଛନ୍ତି ନ୍ୟାଶନାଲ ୟୁନିଭର୍ସିଟି ଅଫ୍ ସିଙ୍ଗାପୁରର ଆସିଷ୍ଟାଣ୍ଟ ପ୍ରଫେସର ଫେଙ୍ଗ୍ ଲେଇ।
ଗବେଷକଙ୍କ ମତାନୁସାରେ, ଚା’ ପିଇଲେ ସ୍ବାସ୍ଥ୍ୟ ପାଇଁ ଲାଭକାରୀ ଏବଂ ମାନସିକ ଓ ହୃଦୟଜନିତ ସମସ୍ୟାରୁ ରକ୍ଷା ମିଳିଥାଏ। ଏହି ଗବେଷଣାରେ ୟୁନିଭର୍ସିଟି ଅଫ୍ ଆସେକ୍ସ ଏବଂ ୟୁକେସ୍ଥିତ ୟୁନିଭର୍ସିଟି ଅଫ୍ କାମ୍ବ୍ରିଜ୍ର ଗବେଷକମାନେ ସାମିଲ ହୋଇଥିଲେ। ୬୦ବର୍ଷ ଏବଂ ତାହାଠୁ ଊର୍ଦ୍ଧ୍ୱ ବୟସର ୩୬ଜଣ ବୟସ୍କଙ୍କୁ ନେଇ ସେମାନଙ୍କ ମାନସିକ ସ୍ଥିତି, ଜୀବନଶୈଳୀ ଓ ଚିନ୍ତାଶକ୍ତି ଉପରେ ଗବେଷଣା କରାଯାଇଥିଲା। ୨୫ ବର୍ଷ ଯାଏ ଯେଉଁ ବ୍ୟକ୍ତିମାନେ ନିୟମିତ ନାଲି ଚା’, ହର୍ବାଲ୍ ଚା’, ଗ୍ରୀନ୍ ଟି ଭଳି ଚା’ ସେବନ କରିଥାନ୍ତି, ସେମାନଙ୍କ ମସ୍ତିଷ୍କ ଓ ମାନସିକ ସ୍ଥିତି ଚା’ନ ପିଉଥିବା ବ୍ୟକ୍ତିଙ୍କ ତୁଳନାରେ ଅଧିକ ସୁସ୍ଥ ବୋଲି ଏହି ଗବେଷଣାରୁ ଜଣାପଡିଛି।