ଭୁବନେଶ୍ୱର,୧୦।୯(ବ୍ୟୁରୋ): ସାପ କାମୁଡାରେ ଆହତ ଜଣେ ମହିଳା ଚାଷୀଙ୍କ ମୃତ୍ୟୁକୁ ନେଇ କ୍ୟାପିଟାଲ ହସ୍ପିଟାଲରେ ସୋମବାର ଅପରାହ୍ନରେ ଉତ୍ତେଜନା ଦେଖିବାକୁ ମିଳିଥିଲା। ଡାକ୍ତରଙ୍କ ଅବହେଳା ଓ ଚିକିତ୍ସାରେ ବିଳମ୍ବ ଯୋଗୁ ତାଙ୍କର ମୃତ୍ୟୁ ଘଟିଥିବା ଅଭିଯୋଗ ଆଣି ପରିବାର ସଦସ୍ୟ ଓ ସମ୍ପର୍କୀୟମାନେ ହୋହଲ୍ଲା କରିଥିଲେ। ମୃତ ମହିଳା ଜଣକ ହେଲେ ବାଲିଅନ୍ତା ଥାନା ଗଣ୍ଡିଲୋ ଗ୍ରାମର ମାଗୁଣି ଭୋଇ (୫୫)। ଚାମ୍ବରରେ ଡାକ୍ତରମାନେ ଗପି ଗପି ଚା’ ପିଇ ରୋଗୀଙ୍କୁ ଗୁରୁତ୍ୱ ନ ଦେବାରୁ ମାଗୁଣିଙ୍କ ଜୀବନ ଚାଲିଗଲା ବୋଲି କହି ସେମାନେ କାର୍ଯ୍ୟାନୁଷ୍ଠାନ ଦାବି କରିଥିଲେ। ଉତ୍ତେଜନା ବଢ଼ୁଥିବାବେଳେ ଫାଣ୍ଡି ପୋଲିସ ପ୍ରଥମେ ସେମାନଙ୍କୁ ବୁଝାଶୁଝା କରିଥିଲେ। ପରେ ଗଣ୍ଡଗୋଳ କଲେ ବନ୍ଧା ହେବ ବୋଲି ଧମକ ଦେଇ ପରିସ୍ଥିତିକୁ ନିୟନ୍ତ୍ରଣ କରିଥିଲେ। ପରେ ବାଲିଅନ୍ତା ପୋଲିସ ଏକ ଅପମୃତ୍ୟୁ ମାମଲା ରୁଜୁ କରିବା ସହ ବ୍ୟବଚ୍ଛେଦ ପରେ ମୃତଦେହକୁ ପରିବାରକୁ ହସ୍ତାନ୍ତର କରିଥିଲା।
ଅଭିଯୋଗ ଅନୁଯାୟୀ, ସବୁଦିନ ପରି ସୋମବାର ସକାଳେ ମାଗୁଣି ଘର ନିକଟ ଧାନ ବିଲରୁ ଘାସ ବାଛୁଥିଲେ। ସକାଳ ପ୍ରାୟ ୯ଟା ୩୦ରେ ଏକ ସାପ ତାଙ୍କୁ କାମୁଡି ଦେଇଥିଲା। ମାଗୁଣି ସେଠାରେ ବିଲ ବାଛୁଥିବା ଅନ୍ୟମାନଙ୍କୁ ଜଣାଇବାରୁ ସେମାନେ ତାଙ୍କୁ ଘରକୁ ନେଇଆସିଥିଲେ। ତାଙ୍କର ସ୍ବାସ୍ଥ୍ୟାବସ୍ଥା ବିଗିଡି ଯାଉଥିବା ଦେଖି ପରିବାର ଲୋକେ ୧୦୮ ଆମ୍ବୁଲାନ୍ସକୁ ଫୋନ୍ କରିଥିଲେ ମଧ୍ୟ ତାହା ଆସି ନ ଥିଲା। ପୂର୍ବାହ୍ନ ପ୍ରାୟ ୧୦ଟା ୩୦ରେ ଗୁରୁତର ଅବସ୍ଥାରେ ମାଗୁଣିଙ୍କୁ ଏକ ବାଇକ୍ରେ ବସାଇ ବାହାରିଥିଲେ। ରଙ୍ଗବଜାର ନିକଟରେ ଥିବା ଏକ ଘରୋଇ ଆମ୍ବୁଲାନ୍ସକୁ ଦେଖି ଡ୍ରାଇଭରଙ୍କ ହାତଗୋଡ଼ ଧରି ମାଗୁଣିଙ୍କୁ କ୍ୟାପିଟାଲ ହସ୍ପିଟାଲ ଆଣିଥିଲେ। ହସ୍ପିଟାଲରେ ପହଞ୍ଚତ୍ବା ସମୟରେ ଡାକ୍ତରଙ୍କ ପାଖରେ ଏକାଧିକ ରୋଗୀ ଧାଡିରେ ଛିଡା ହୋଇଥିଲେ। ମାଗୁଣିଙ୍କୁ ସାପ କାମୁଡିଥିବା ଓ ତାଙ୍କର ସ୍ବାସ୍ଥ୍ୟାବସ୍ଥା ଖରାପ ହୋଇପଡିଥିବାରୁ ତାଙ୍କୁ ଆଗେ ଦେଖିବା ପାଇଁ ପରିବାର ଲୋକେ ଅନୁରୋଧ କରିଥିଲେ। ହେଲେ ଡାକ୍ତର ଓ ଉପସ୍ଥିତ ଥିବା ଅନ୍ୟ କର୍ମଚାରୀମାନେ ଲାଇନ୍ରେ ଆସ କହିଥିଲେ। ପୁଣି ଡାକ୍ତର ଚା’ପିଇ ଗପୁଥିବାରୁ ମାଗୁଣିଙ୍କୁ ଦେଖିବା ବେଳକୁ ବହୁ ବିଳମ୍ବ ହୋଇଯାଇଥିଲା ବୋଲି ତାଙ୍କ ନାତୁଣୀ ବୋହୂ ମନୋରମା ଅଭିଯୋଗ କରିଛନ୍ତି। ଅନ୍ୟପକ୍ଷରେ ହସ୍ପିଟାଲରେ ପହଞ୍ଚତ୍ବାର ପ୍ରାୟ ଏକ ଘଣ୍ଟା ପରେ ରକ୍ତ ପରୀକ୍ଷା ପାଇଁ ନିଆଯାଇଥିଲା। ରିପୋର୍ଟ ବାହାରିବା ପରେ ଡାକ୍ତର ଇଞ୍ଜେକ୍ସନ ଦେଇ ଆଇସିୟୁକୁ ନେବା ପାଇଁ କହିଥିଲେ। ହେଲେ ସେତେବେଳକୁ ବହୁ ବିଳମ୍ବ ହୋଇଯାଇଥିଲା। ଆଇସିୟୁକୁ ନେବା ସମୟରେ ରୋଗୀଙ୍କର ଜୀବନ ଚାଲିଯାଇଥିଲା। ମାଗୁଣିଙ୍କ ମୃତ୍ୟୁ ପାଇଁ ପରିବାର ଲୋକେ ଡାକ୍ତରଙ୍କ ବିଳମ୍ବିତ ଚିକିତ୍ସାକୁ ଦାୟୀ କହିଛନ୍ତି। ଯଦି ଡାକ୍ତର ତାଙ୍କୁ ଶୀଘ୍ର ଦେଖି ଚିକିତ୍ସା ଆରମ୍ଭ କରିଥାନ୍ତେ ତେବେ ନିଶ୍ଚିତ ମାଗୁଣି ବଞ୍ଚତ୍ୟାଇଥାନ୍ତେ ବୋଲି ସେମାନେ କହିଛନ୍ତି।
କ୍ୟାପିଟାଲ ହସ୍ପିଟାଲର ଡେପୁଟି ସୁପରିଣ୍ଟେଣ୍ଡେଣ୍ଟ ଧନଞ୍ଜୟ ଦାସ କହିଛନ୍ତି, ଡାକ୍ତରଙ୍କର କିଛି ଅବହେଳା ନାହିଁ। ସେମାନେ ବିଳମ୍ବରେ ହସ୍ପିଟାଲକୁ ଆଣିଥିଲେ। ଡାକ୍ତର ରୋଗୀଙ୍କୁ ଦେଖି ତୁରନ୍ତ ସାପ କାମୁଡା ଇଞ୍ଜେକ୍ସନ ଦେଇଥିଲେ। ସେମାନେ କେବଳ କ୍ଷତିପୂରଣ ପାଇଁ ଏଭଳି ଅଭିଯୋଗ ଆଣୁଛନ୍ତି।