ପର୍ଲା, ୨୩।୧୨ (ଡି.ଏନ୍.ଏ.)- ମୁଇଁ ଜିଁବାକେ ଚାହୁଁଛେଁ। ପୁଅବହ, ନାତିନାତେନକେକର ସଂଗେ ସମିଆ ବିତାବାକେ ଚାହୁଁଛେଁ। ମୋତେ ଭଲ କରି ଦିଅ। ଇ ହୁରୁତ୍ ତରଲି ଗଲା କଥା ପଦ୍ଦୁକ କହିଛନ୍ ଉର୍ବଶୀ ମାଝି(୫୪)। ସେ ଅନେକ୍ ଦିନ ହେଲା କେହେନ୍ସ ଅଜନା ରୋଗ୍ରେ ଖଟେ ପଡ଼ି ରହିଛନ୍। ପରିବାର ଲୋକ୍ ଆସର ପାସର ଡାକ୍ତର ଖାନାରେ ଚିକିଛା କରେଇ ନିରାଶ ହେଇଛନ୍। ହେଲେ ଟଁକା ପଏସା ଅଭାବୁ ଉର୍ବଶୀକଁର ଉଚ ଚିକିଛା କରେଇ ନାଇଁପାରବାର।
ସୂଚନା ଅନ୍ସାରେ କଳାହାଣ୍ଡି ଜିଲା ଧର୍ମଗଡ଼ ବ୍ଲକ ଅଧୀନ ଦଣ୍ଡପାଟ ଅଂଚଲର ଜୟନ୍ତପୁର ପଁଚେତ୍ ରଇନାଗୁଡ଼ା ଗଁାର ସୁନ୍ଦର ମାଝି (୬୦)। ପରିବାର କହେଲେ ମାଏକିନା ଉର୍ବଶୀ(୫୪), ପୁଅ ଲମ୍ବୋଧର (୩୦), ବହ ନୀଳେନ୍ଦ୍ରି (୨୮) ଆର ନାତି ବିଦ୍ୟାଧର (୭)କୁଁ ନେଇ ସଁସାର। ପରିବାରଟା ନିହାତି ଗରିବ୍ ଆର ଆଦିବାସୀ ସମାଜର। ପୁଓ ବହ କୁଲିମଜୁରି କରି ଯାହା ରୁଜ୍ଗାର କରୁଛନ୍ ସେଥ୍ରେ ଘରର ଚୁଲି ଜଲୁଛେ। ଏନ୍ତା ଅଭାବିଆ ପରିସ୍ଥିତିରେ ଆଏଜ୍କେ ମାସ ୪ରେ ତଲେ ଉର୍ବଶୀକଁର ଛାତି ଦରଦ୍ ହେଇଥିଲା। ପରିବାର ଲୋକ୍ ତାହାକୁ ଝନେ କ୍ୱାକ୍ ପାସକେ ନେଇ ଗୁଟେ ଇଞ୍ଜେକ୍ସନ ଦେଇଥିଲେ। ହେଲେ ଇଞ୍ଜେକ୍ସନ ନେବାର ୩ରୁ ୪ ଘଁଟା ଉତାରୁ ଉର୍ବଶୀକଁର ଅଁଟାରୁ ତଲ୍କେ ଅଚଲ ହେଇଯାଇଥିବାର ପରିବାର ଲୋକ୍ କହିଛନ୍। ସେଦିନ୍ଠାନୁ ଉର୍ବଶୀ ଚାଲବୁଲ କରି ନାଇଁପାରଲେ ଖଟେ ପଡ଼ି ରହିଛନ୍। ପରିବାର ଲୋକ୍ ଜମିବାଡ଼ି, ଘରଡ଼ିହ ବଁଧକ୍ ପକେଇ ଆସର ପାସର ଡାକ୍ତରଖାନାରେ ଉର୍ବଶୀକଁର ଚିକିଛା କରେଇ ନିରାଶ ହେଇଛନ୍। ଅଁଧ ବିସୁଆସରେ ପରିବାର ଲୋକ୍ ଗୁଣିଗାରେଡି, ଫୁକାଝରା, ବଇଦ୍ ଡକେଇ ଝିଁକ୍ ବି ଦେଇ ସାରିଛନ୍। ଡାକ୍ତରକଁର କହେବାର ହିସାବେ ଉର୍ବଶୀକୁଁ ଚଉ ଚିକିଛା ଲାଗି କଟକ ନେଲେ ସେ ଭଲ ହେଇପାରବେ। ହେଲେ ପରିବାରଟା ନିହାତି ଗରିବ୍, ଉର୍ବଶୀକୁଁ ଚିକିଛା ଲାଗି କଟକ ନେବାର ସେମାନେ ସପନ୍ରେ ବି ଭାବି ନାଇଁପାରବାର। ଇଆଡ଼େ ଉର୍ବଶୀ କାଠ୍ ଲେଖେଁ ଖଟେ ପଡ଼ି ରହିଛନ୍ ହଲ୍ଚଲ ହେଇ ନାଇଁପାରବାର। ଖାଲି କଥା ଦୁଇପଦ୍ କହିପାରୁଛନ୍। ଖଟେ ଗଧାମଖା, ଖାନାପିନା, ଝାଡ଼ାଝପଟ କରୁଛନ୍। ଇଆଡ଼େ ସରକାରୀ ସାହାଯ୍ କହେଲେ ଖାଏଦ୍ ସୁରକ୍ଷା ଯୋଜନାରେ ପରିବାରକେ ମିଲିଥିବାର ରାଶନ କାର୍ଡ ଖଁଡ଼େ। ସେନ୍ତା ପରିବାରର ରାଷ୍ଟ୍ରୀୟ ସ୍ବାସ୍ଥ୍ୟ ବୀମା ଯୋଜନାର କାର୍ଡ ଅଛେ। ହେଲେ ସେଟା କାମେ ନାଇଁ ଲାଗୁଥିବାର ପରିବାର ଲୋକ୍ କହିଛନ୍। ଏନ୍ତାଥି ଉପେ ଶୂଇନ୍ ପରିବାର ଗଣମାଧ୍ୟମ ଜରିଆରେ ଉର୍ବଶୀକଁର ଚିକିଛା ସାହାଯ୍ ଲାଗି ରାଏଜ୍ ସରକାର ଆର ଜିଲା ପରଶାସନକୁଁ ଗୁହାରି କରିଛନ୍। ଇ ବାବ୍ଦେ ପର୍ଲା ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରର ଚିକିଛା ଅଧ୍କାରୀ ସଞ୍ଜୀବ କୁମାର ନାଏକକୁଁ ପଚ୍ରାଲାରୁ ସୋମବାର ଗୁଟେ ଡାକ୍ତରିଦଲ ପଠେଇ ତାକର କାଣା ଅସ୍ବିଧା ଅଛେ ପରୀକ୍ଷା କରାଯିବା। ଦରକାର ପଡ଼ଲେ ଉଚ ଚିକିଛାର ବେବସ୍ତା କରାଯିବା ବଲି ସେ କହିଛନ୍। ସେନ୍ତା ଥାନୀଅ ସରପଁଚ୍ ରମଣୀ ଦୁରିଆକୁଁ ପଚ୍ରାଲାରୁ ଘଟନାଟା ଉପଜିଲାପାଳକଁର ନଜରକେ ଆନବାର ସଂଗେ ରେଡକ୍ରସରୁ କିଛି ଟଁକା ପଏସା ସାହାଯ୍ ଲାଗି କହେମି ବଲି ସେ କହିଛନ୍।