ଚିକିଟି,୨୪ା୬(ଡି.ଏନ.ଏ.)- ଚିକିଟି ବିଜ୍ଞାପିତ ଅଞ୍ଚଳ ପରିଷଦ (ଏନ୍ଏସି)ର ୫ ଓ୍ବାର୍ଡକୁ ମଙ୍ଗଳବାର ଜିଲା ପ୍ରଶାସନ କଣ୍ଟେନ୍ମେଣ୍ଟ ଜୋନ୍ ଘୋଷଣା କରିଛି। ୧୨ ଓ୍ବାର୍ଡ ବିଶିଷ୍ଟ ଏନ୍ଏସିର ଅନ୍ୟ ଓ୍ବାର୍ଡର କେତେକ ସ୍ଥାନକୁ ବଫର ଜୋନ୍ ଘୋଷଣା କରାଯାଇଥିବା ତହସିଲଦାର ହରପ୍ରସାଦ ଭୋଇ ସୂଚନା ଦେଇଛନ୍ତି। ୧ନଂ. ଠାରୁ ୫ନଂ. ୱାର୍ଡକୁ କଣ୍ଟେନ୍ମେଣ୍ଟ ଜୋନ୍ ଘୋଷଣା କରାଯାଇଥିବା ବେଳେ ଚିକିଟିପେଣ୍ଠରେ ଥିବା ୬ନଂ. ଠାରୁ ୯ନଂ. ୱାର୍ଡ, ୧୦ନଂ. ୱାର୍ଡର ଜେନାପୁର ଓ ଲୋକନାଥପୁର, ୧୧ନଂ. ଓ ୧୨ନଂ. ୱାର୍ଡ କରବାଲୁଆ ସମେତ ୩ କିମି ଦୂରରେ ଥିବା ଧାନଘର, କେ.ଗୋପିନାଥପୁର, ମୁକ୍ତାପୁର, ଜଗଡା, ଟି.କୂଳମଣିପୁରକୁ ବଫର ଜୋନ୍ ଘୋଷଣା କରାଯାଇଛି। ଗତ୧୯ରେ ଚିକିଟି ବଜାରର ଥିବା ଏକ ଇଲୋକ୍ଟ୍ରୋନିକ୍ସ ଦୋକାନର ୨ ଭାଇଙ୍କ କରୋନା ରିପୋର୍ଟ ପଜିଟିଭ ଆସିଥିଲା। ତାଙ୍କୁ କୋଭିଡ୍ ହସ୍ପିଟାଲ୍ରେ ଭର୍ତ୍ତି କରାଯାଇଥିଲା। ପୁଣି ୨୧ତାରିଖରେ ଆଉ ୨ଜଣ ସ୍ଥାନୀୟ ଲୋକଙ୍କ ରିପୋର୍ଟ ପଜିଟିଭ ଆସିବା ପରେ ଏପରି ପଦକ୍ଷେପ ନିଆଯାଇଛି। ସ୍ବାସ୍ଥ୍ୟବିଭାଗ ଓ ପ୍ରଶାସନ ପକ୍ଷରୁ ଏମାନଙ୍କ କଣ୍ଟାକ୍ଟ ଟ୍ରେସିଂ ଆରମ୍ଭ ହୋଇଛି। ସମସ୍ତଙ୍କୁ ଘରେ ରହିବାକୁ ପରାମର୍ଶ ଦିଆଯାଇଛି ା କଣ୍ଟେନ୍ମେଣ୍ଟ ଅଞ୍ଚଳର ଲୋକଙ୍କ ଜରୁରୀ ଔଷଧ ଓ ଗ୍ରୋସରି ସାମଗ୍ରୀ ଯୋଗାଇ ଦେବା ବ୍ୟବସ୍ଥା ପାଇଁ କାର୍ଯ୍ୟନିର୍ବାହୀ ଅଧିକାରୀ ସୁଜିତ କୁମାର ଚୌଧୁରୀଙ୍କୁ ଦାୟିତ୍ୱ ଦିଆଯାଇଛି। ଚିକିଟି ବିଡିଓ ଫାଲୁଗୁନି ମାଝି ଓ ସିଡିପିଓଙ୍କୁ ସମସ୍ତ କାଯର୍ୟ ମନିଟରିଂ ପାଇଁ ଜିଲାପାଳ ନିର୍ଦ୍ଦେଶ ଦେଇଛନ୍ତି ା