ଅନୁଗୋଳ ଅଫିସ, ୨୪।୨: ଅନୁଗୋଳ ଜିଲା ମୁଖ୍ୟ ଚିକିତ୍ସାଳୟରେ ପୁଣି ରୋଗୀଙ୍କ ଚିକିତ୍ସାରେ ଅବହେଳା ହେଉଥିବା ଅଭିଯୋଗ ଆସିଛି। ଡାକ୍ତରଖାନାର ୩ ମହଲା ବିଲ୍ଡିଂରେ ଥିବା ବେଡ ନଂ. ୩୩୫ ଓ ୩୩୬ରେ ଥିବା ଦୁଇଜଣ ଗୋଡ଼ ଭଙ୍ଗା ରୋଗୀ ଏହି ଅଭିଯୋଗ ଆଣିଛନ୍ତି। ସେମାନଙ୍କୁ ଉପଯୁକ୍ତ ଚିକିତ୍ସା ଯୋଗାଇ ଦିଆଯାଉ ନ ଥିବାବେଳେ ଘରୋଇ ମେଡିକାଲକୁ ଯିବାକୁ ଡାକ୍ତରଖାନା ପକ୍ଷରୁ ପରାମର୍ଶ ଦିଆଯାଉଥିବା ନେଇ ସିଡିଏମ୍ଓଙ୍କ ଦୃଷ୍ଟି ଆକର୍ଷଣ କରିଥିବା ସେମାନେ ପ୍ରକାଶ କରିଛନ୍ତି।
୩୩୫ ନମ୍ବର ବେଡ୍ରେ ଥିବା ନରସିଂହପୁରର ଅଞ୍ଚଳର ଜିତେନ୍ଦ୍ର ସଏଙ୍କ ଅଭିଯୋଗ ମୁତାବକ, ଏକ ଦୁର୍ଘଟଣାରେ ଗୋଡ ଭାଙ୍ଗିଯିବା ପରେ ସେ ପ୍ରଥମେ ହିନ୍ଦୋଳ ଡାକ୍ତରଖାନାରେ ଭର୍ତ୍ତି ହୋଇଥିଲେ। ପରେ ତାଙ୍କୁ ଅନୁଗୋଳ ଜିଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଥିଲା। ଗତ ୨୧ ତାରିଖରୁ ସେ ସେଠାରେ ଚିକିତ୍ସାଧୀନ ଥିବାବେଳେ ଡାକ୍ତର ଗୋଡ ପ୍ଲାଷ୍ଟର କରିବା ବଦଳରେ କାଠ ଫାଳିଆ ଦେଇ ଗଜ କପଡା ଭିଡି ଦେଇଛନ୍ତି। ତରବର ହେଲେ ଘରୋଇ ମେଡିକାଲକୁ ଚାଲିଯିବାକୁ ମଧ୍ୟ କୁହାଯାଉଥିବା ସେ ପ୍ରକାଶ କରିଛନ୍ତି। ସେହିପରି ୩୩୬ ନମ୍ବର ବେଡ୍ରେ ଥିବା ଗୋଡ଼ ଭଙ୍ଗା ରୋଗୀ ତାଳଚେର ଭାଲୁଗାଡ଼ିଆ ଗ୍ରାମର ଧୀରେନ ନାଏକଙ୍କୁ ଦେଖିଥିବା ଡାକ୍ତର ଜଣକ ଛୁଟିରେ ଥିବାରୁ ଅନ୍ୟ କେହି ତାଙ୍କୁ ଚିକିତ୍ସା କରୁ ନ ଥିବା ସେ ଅଭିଯୋଗ ଆଣିଛନ୍ତି। ଏପରି କି ସମ୍ପୃକ୍ତ ଡାକ୍ତରଙ୍କୁ ଖୋଜି ଖୋଜି ସେ ଏକ ଘରୋଇ କ୍ଲିନିକ୍ରେ ତାଙ୍କୁ ଦେଖାଇଥିବା ଅଭିଯୋଗ କରିଛନ୍ତି। ତାଙ୍କୁ ମଧ୍ୟ ଘରୋଇ ମେଡିକାଲ ପଳାଇବାକୁ କୁହାଯାଉଥିବା ଧୀରେନ ପ୍ରକାଶ କରିଛନ୍ତି। ଏ ଦିଗରେ ଦୃଷ୍ଟି ଦେଇ ତାଙ୍କୁ ଉପଯୁକ୍ତ ଚିକିତ୍ସା ଯୋଗାଇଦେବାକୁ ରୋଗୀଙ୍କ ସମ୍ପର୍କୀୟ ସିଡିଏମ୍ଓଙ୍କଠାରେ ଦାବି କରିଛନ୍ତି। ଏ ସମ୍ପର୍କରେ ଧୀରେନଙ୍କୁ ଚିକିତ୍ସା କରିଥିବା ଡାକ୍ତର କହିଛନ୍ତି, ଛୁଟିରେ ଅଛି। କାହାରିକୁ ଘରୋଇ ମେଡିକାଲ ଯିବାକୁ କହିନାହାନ୍ତି। ଏ ନେଇ ଜିଲା ମୁଖ୍ୟ ଚିକିତ୍ସାଧିକାରୀ ଅମରେନ୍ଦ୍ରନାଥ ମହାନ୍ତିଙ୍କ ଫୋନ ନଂ. ୯୪୩୯୯୮୧୩୩୧ରେ ଯୋଗାଯୋଗ କରାଯାଇଥିଲେ ମଧ୍ୟ ସେ ଫୋନ ନ ଉଠାଇବାରୁ ମତାମତ ମିଳିପାରିନାହିଁ।