ଢେଙ୍କିକୋଟ, ୩୧ା୭(ଡି.ଏନ୍.ଏ.)-ଚିକିତ୍ସାରେ ଅର୍ଥ ଯେମିତି ବାଧକ ସାଜିଛି। ଗରିବ ମୂଲିଆମାନେ ରୋଗ ହେଲେ ଭଗବାନଙ୍କୁ ଭରସା କରି ଜୀବନ ବିତାଉଛନ୍ତି। ଅର୍ଥ ନ ଥିଲେ ଯେତେ ବଡ଼ ରୋଗ ହେଲେ ମଧ୍ୟ ତାକୁ ଭଲ କରିବାକୁ ସେମାନଙ୍କର ସାମର୍ଥ୍ୟ ରହୁନାହିଁ। କଷ୍ଟ ସହି ମୃତ୍ୟୁକୁ ଅପେକ୍ଷା କରୁଛନ୍ତି।
ଢେଙ୍କିକୋଟ ଫାଣ୍ଡି ଅନ୍ତର୍ଗତ ସାନ ମସିଣା ବିଲା ଗ୍ରାମର ହେମନ୍ତ ମହାନ୍ତ ନାମକ ଜଣେ ବ୍ୟକ୍ତିଙ୍କ ମୁଣ୍ଡରେ ଏକ ଟ୍ୟୁମର ବାହାରି ଦିନକୁ ଦିନ ବଢ଼ିବାରେ ଲାଗିଛି। ସେ ଜଣେ ଗରିବ ଦିନ ମଜୁରିଆ ହୋଇଥିବାରୁ ଚିକିତ୍ସା ନିମନ୍ତେ ଅର୍ଥବାଧକ ସାଜିଥିବା କହିଛନ୍ତି। ସେ ଢେଙ୍କିକୋଟ ପ୍ରାଥମିକ ସ୍ବାସ୍ଥ୍ୟକେନ୍ଦ୍ରକୁ ଗତକାଲି ଅପରାହ୍ନରେ ବିଲକାମ ସାରି ଆସିଥିଲେ। ମାତ୍ର ଏଠାରେ କୌଣସି ଡାକ୍ତର ନ ଥିବାରୁ ବିନ୍ଧା ପାଇଁ ଔଷଧ ଦୋକାନରୁ ବଟିକା କିଣି ନିରୂପାୟ ହୋଇ ଚାଲିଯାଇଛି। ତେବେ ରାଜ୍ୟ ସରକାରଙ୍କ ଗରିବ ଚାଷୀ ମୂଲିଆଙ୍କ ନିମନ୍ତେ ସ୍ବାସ୍ଥ୍ୟବୀମା ପ୍ରହସନ ବୋଲି ସେ କହିଛନ୍ତି। ତାଙ୍କର ସେମିତି କୌଣସି ବୀମା କାର୍ଡ ନାହିଁ କି କୌଣସି ବ୍ୟକ୍ତି କାର୍ଡ ନିର୍ମାଣ ନିମନ୍ତେ ଗ୍ରାମକୁ ତଦନ୍ତ ଲାଗି ଯାଇନାହାନ୍ତି। ରାଜ୍ୟ ସରକାରଙ୍କ ତରଫରୁ ସ୍ବାସ୍ଥ୍ୟବୀମା କାର୍ଡ କିମ୍ବା କୌଣସି ଯୋଜନାରୁ ଅର୍ଥରାଶି ସହାୟତା ପାଇଲେ ସେ ଟ୍ୟୁମରକୁ ଅପରେସନ କରାଇପାରନ୍ତେ ବୋଲି ନିବେଦନ କରିଛନ୍ତି।