ଭଦ୍ରକ ଅଫିସ, ୨୩।୬ – ୧୧ ମାସ ପୂର୍ବେ ଭଦ୍ରକ ରାହାଞ୍ଜ ଟ୍ରକ୍ ଦୁର୍ଘଟଣାରେ ଆହତ ହୋଇଥିବା ଶୀତଲ ସାହୁଙ୍କ ସମସ୍ତ ଚିକିତ୍ସା ଖର୍ଚ୍ଚ ବହନ କରିବେ ବୋଲି ସ୍ଥାନୀୟ ବିଧାୟକ ସଞ୍ଜୀବ ମଲ୍ଲିକ ତିନିଦିନ ତଳେ ଘୋଷଣା କରିଥିଲେ। ବିଧାୟକ ମଲ୍ଲିକଙ୍କ ଉଦ୍ୟମକ୍ରମେ ଜିଲା ପ୍ରଶାସନର ମିଳିତ ସହାୟତାରେ ରବିବାର ଶୀତଲଙ୍କୁ ଚିକିତ୍ସା ପାଇଁ ଭୁବନେଶ୍ୱରସ୍ଥିତ ଏମ୍ସ ହସ୍ପିଟାଲରେ ଭର୍ତ୍ତି କରାଯାଇଛି। ସ୍ବତନ୍ତ୍ର ଆମ୍ବୁଲାନ୍ସ ଯୋଗେ ଶୀତଲଙ୍କୁ ତାଙ୍କ ଘରୁ ଡାକ୍ତରଖାନାକୁ ନିଆଯାଇଛି। ବିଧାୟକ ମଲ୍ଲିକ ସେଠାରେ ପହଞ୍ଚି ଶୀତଲ କିଭଳି ଶୀଘ୍ର ଭଲ ହୋଇପାରିବେ ସେ ସମ୍ପର୍କରେ ଡାକ୍ତରଙ୍କ ସହ ଆଲୋଚନା କରିଥିଲେ।
ପ୍ରକାଶ ଯେ, ଦୁର୍ଘଟଣାରେ ଗୁରୁତର ଶୀତଲ ଶଯ୍ୟାଶାୟୀ ଥିବା ଖବର ଗଣମାଧ୍ୟମରୁ ଜାଣିବା ପରେ ବିଧାୟକ ଗୁରୁବାର ସନ୍ଧ୍ୟାରେ ଶୀତଲଙ୍କ ଘର ରାହାଞ୍ଜକୁ ଯାଇ ସ୍ବାସ୍ଥ୍ୟାବସ୍ଥା ସମ୍ପର୍କରେ ପଚାରି ବୁଝିବା ସହ ତାଙ୍କ ଆଶୁ ଆରୋଗ୍ୟ କାମନା କରିଥିଲେ। ଶୀତଲଙ୍କୁ ନିଜ ଧର୍ମ ଝିଅ ଭାବେ ଆଦରି ନେଇ ତାଙ୍କୁ ଘରୋଇ ହସ୍ପିଟାଲରେ ଚିକିତ୍ସା କରାଇବେ ବୋଲି ତାଙ୍କ ବାପା ସୁବାସଙ୍କୁ ବିଧାୟକ ଆଶ୍ୱାସନା ଦେଇଥିଲେ। ସର୍ବଶିକ୍ଷା ଅଭିଯାନ ପକ୍ଷରୁ ଜଳନ୍ଧର ମଣ୍ଡଳ, ବିଧାୟକଙ୍କ ସହଯୋଗୀ ଲାଲାଲଳିତ ନାୟକ, ଶୀତଲଙ୍କ ବାପା ସୁବାସ ପ୍ରମୁଖ ମେଡିକାଲ ଯାଇଥିବା ସୂଚନା ମିଳିଛି।