ଅନୁଗୋଳ ଅଫିସ୍, ୨୪ା୧
ଅନୁଗୋଳ ଜିଲାପାଳ ମନୋଜ କୁମାର ମହାନ୍ତି ଗୁରୁବାର ଜିଲା ମୁଖ୍ୟ ଚିକିତ୍ସାଳୟ ପରିଦର୍ଶନରେ ଯାଇ ଚିକିତ୍ସା ସେବା ଅନୁଧ୍ୟାନ କରିଛନ୍ତି। ମେଡିକାଲରେ ରୋଗୀଙ୍କୁ କିପରି ସେବା ପ୍ରଦାନ କରାଯାଉଛି ସେ ସମ୍ପର୍କରେ ରୋଗୀଙ୍କ ଠାରୁ ପଚାରି ବୁଝିଛନ୍ତି। ରୋଗୀ ସଂଖ୍ୟା ବଢ଼ୁଥିବାରୁ ଟିକେଟ୍ କାଉଣ୍ଟରକୁ ୨ରୁ ୫କୁ ବୃଦ୍ଧି କରାଯିବ ବୋଲି ଜିଲାପାଳ ସୂଚନା ଦେଇଛନ୍ତି।
ଅପରାହ୍ନରେ ଏକ କାର୍ଯ୍ୟକ୍ରମରେ ଯୋଗ ଦେବା ପରେ ଜିଲାପାଳ ମେଡିକାଲର ବିଭିନ୍ନ ଓ୍ବାର୍ଡ ବୁଲିଥିଲେ। ତାଙ୍କ ସହ ସହରର କେତେଜଣ ବ୍ୟକ୍ତି ଓ ଡାକ୍ତର ବିଶ୍ୱଜିତ ସାମଲ ଉପସ୍ଥିତ ଥିଲେ। ଆଉଟ୍ ଡୋର ନିକଟରେ ରୋଗୀଙ୍କ ଲମ୍ବାଧାଡ଼ି ଦେଖି ଜିଲାପାଳ କମ୍ପ୍ୟୁଟରାଇଜ୍ ପଞ୍ଜୀକରଣ ହେଉଥିବା କାଉଣ୍ଟରକୁ ଯାଇଥିଲେ। ସେଠାରେ ମଧ୍ୟ ବହୁ ସଂଖ୍ୟାରେ ରୋଗୀ ଲାଇନ୍ରେ ଠିଆ ହୋଇଥିବାରୁ ଜିଲାପାଳ ବିରକ୍ତି ପ୍ରକାଶ କରିଥିଲେ। ତୁରନ୍ତ ଲୋକଙ୍କୁ ଟିକେଟ୍ ପ୍ରଦାନ କରିବାକୁ କାଉଣ୍ଟରରେ ଥିବା କର୍ମଚାରୀଙ୍କୁ ନିର୍ଦ୍ଦେଶ ଦେଇଥିଲେ। ଏହାପରେ ଏମ୍ଆର୍ଆଇ ସମ୍ମୁଖରେ ଜିଲାପାଳ ଛିଡ଼ା ହେବା ସମୟରେ କେତେଜଣ ରୋଗୀଙ୍କ ସହ ଆଲୋଚନା କରିଥିଲେ। ମିଳୁଥିବା ଚିକିତ୍ସା, ଠିକ୍ ସମୟରେ ଡାକ୍ତର ଆସୁଛନ୍ତି କି ନାହିଁ, ବାହାରୁ ଔଷଧ କିଣିବାକୁ ପଡ଼ୁଛି କି ନାହିଁ ସେ ସମ୍ପର୍କରେ ପଚାରି ବୁଝିଥିଲେ।