ଚିକେନରେ ପ୍ରସ୍ତୁତ ବିଭିନ୍ନ ଖାଦ୍ୟ ପ୍ରତି ଏବେବି ଆଦର ବଢୁଛି। ଗ୍ରାହକଙ୍କ ଆଦର ଓ ରୁଚି ଅନୁଯାୟୀ ଏବେ ହୋଟେଲଗୁଡିକ ମଧ୍ୟ ଚିକେନରେ ବିଭିନ୍ନ ନୂଆ ନୂଆ ଡିସ୍ ପ୍ରସ୍ତୁତ କରିବା ଉପରେ ଗୁରୁତ୍ୱ ଦେଉଛନ୍ତି। ରେଷ୍ଟୁରାଣ୍ଟଗୁଡିକ ମଧ୍ୟରେ ଚିକେନରେ ବିଭିନ୍ନ ଡିସ୍ ପ୍ରସ୍ତୁତ କରିବାରେ ଏକ ଚାହିଦାଯୁକ୍ତ ରେଷ୍ଟୁରାଣ୍ଟ ହେଉଛି ବ୍ରହ୍ମପୁରର ପୁରୁଣା ବସ୍ଷ୍ଟାଣ୍ଡ ରୋଡରେ ଥିବା ସ୍ବାଦିଷ୍ଟ ରେଷ୍ଟୁରାଣ୍ଟ। ଏହି ରେଷ୍ଟୁରାଣ୍ଟରେ ଉଭୟ ଆମିଷ ଓ ନିରାମିଷ ଖାଦ୍ୟ ପ୍ରସ୍ତୁତ କରାଯାଉଛି। ସେଥିମଧ୍ୟରୁ ଏହି ରେଷ୍ଟୁରାଣ୍ଟର ଚିକେନରେ ପ୍ରସ୍ତୁତ ମଷ୍ଟାର୍ଡର ଖୁବ୍ ଚାହିଦା ରହିଛି। ଏହି ରେଷ୍ଟୁରାଣ୍ଟରେ ଉକ୍ତ ଡିସ୍ର ପ୍ଲେଟ ପିଛା ମୂଲ୍ୟ ୧୩୦ଟଙ୍କା ରହିଛି। ଏହାର ପ୍ରସ୍ତୁତି ସମ୍ପର୍କରେ ରେଷ୍ଟୁରାଣ୍ଟର କୁକ୍ ସମୀର ନାୟକ କହନ୍ତି…..
ଆବଶ୍ୟକ ସାମଗ୍ରୀ
ଚିକେନ-୨୦୦ଗ୍ରାମ୍
କଞ୍ଚା ଅଣ୍ଡା-୧ ଟା
ସୋରିଷ ବଟା-୩ ଚାମଚ
ପିଆଜ-୧୦୦ଗ୍ରାମ
କ୍ୟାପ୍ସିକମ୍-୧୦୦ଗ୍ରାମ
ପତ୍ରକୋବି-୧୦୦ଗ୍ରାମ
ଗୋଲମରିଚ ଗୁଣ୍ଡ- ୧ଚାମଚ
ଅଦା ପେଷ୍ଟ-ଦରକାର ଅନୁଯାୟୀ
କନ୍ଫ୍ଲୋର- ଆବଶ୍ୟକ ଅନୁଯାୟୀ
ଗ୍ରୀନଚିଲି- ଅଳ୍ପ ପରିମାଣ
ଅଦା, ରସୁଣ, କଞ୍ଚାଲଙ୍କା
ଆବଶ୍ୟକ ଅନୁଯାୟୀ
ରେଡ ଚିଲି ଶସ୍- ଅଳ୍ପ ପରିମାଣର
ଲୁଣ -ସ୍ବାଦ ଅନୁଯାୟୀ
ଚାଇନା ସଲ୍ଟ- ୧ ଚାମଚ
ପିଆଜ ପତ୍ର- ଅଳ୍ପ
ଧନିଆ ପତ୍ର- ଅଳ୍ପ
ଟମାଟ ଶସ୍-ଆବଶ୍ୟକ ଅନୁଯାୟୀ
ପ୍ରସ୍ତୁତି ପ୍ରଣାଳୀ
ପ୍ରଥମେ ଚିକେନକୁ କାଟି ଭଲଭାବରେ ଧୋଇ ଏକ ପାତ୍ରରେ ରଖିବେ। ୨୦୦ଗ୍ରାମ କଟା ଚିକେନ ସହ ଗୋଟିଏ କଞ୍ଚା ଅଣ୍ଡା, ଅଦା, ରସୁଣ ପେଷ୍ଟ, ଅଳ୍ପ ଲୁଣ, ଅଳ୍ପ ପରିମାଣର ଚାଇନା ସଲ୍ଟ, ଗୋଲମରିଚ ଗୁଣ୍ଡକୁ ଭଲ ଭାବରେ ମିଶାଇ ମିଶ୍ରଣ ପ୍ରସ୍ତୁତ କରିବେ। ମିଶ୍ରଣ ପ୍ରସ୍ତୁତ ପରେ ସେଥିରେ ମଇଦା କନଫ୍ଲୋର ଦେଇ ୧୦ ମିନିଟ ଛାଡିଦେବେ। ଏହାପରେ ଚୁଲିରେ ଏକ କଡେଇ ବସାଇ ଅଳ୍ପ ତେଲ ନେବେ। ତେଲ ଗରମ ହେବା ପରେ ସେଥିରେ ଲଙ୍କା, ରସୁଣ, ଅଦା ପକାଇ ଫ୍ରାଏ କରିବେ। କିଛି ସମୟ ଫ୍ରାଏ କରିବା ପରେ ପୂର୍ବରୁ କଟାଯାଇଥିବା ପିଆଜ, କ୍ୟାପ୍ସିକମ, ପତ୍ରକୋବି ପକାଇ ଭାଜିବେ। ଅଳ୍ପ ଭାଜିବା ପରେ ସେଥିରେ ଲୁଣ(ସ୍ବାଦ ଅନୁସାରେ), ଏକ ଚାମଚ ଚାଇନା ସଲ୍ଟ, ଗୋଟିଏ ଚାମଚ ଟମାଟ ଶସ୍, ସୋରିଷବଟା ୩ ଚାମଚ ସହ ରେଡ ଚିଲି ପେଷ୍ଟ ପକାଇ ପୁଣି ଫ୍ରାଏ କରିବେ। ଏହାପରେ ପୂର୍ବରୁ ପ୍ରସ୍ତୁତ ହୋଇଥିବା ଚିକେନ ମିଶ୍ରଣକୁ ଏଥିରେ ମିଶାଇ ଫ୍ରାଏ କରିବେ। ୨ ମିନିଟ୍ ଫ୍ରାଏ କରିବା ପରେ ସେଥିରେ ଧନିଆ ପତ୍ର, ପିଆଜ ପତ୍ର ପକାଇ ଏକ ପ୍ଲେଟକୁ ବାହାର କରି ପରଷିବେ।
ରିପୋର୍ଟ: ଦୀପକ କୁମାର ପଣ୍ଡା