ଆଜିକାଲି ଯୁବଗୋଷ୍ଠୀ ଖାଇବାରେ ସବୁବେଳେ କିଛି ନା କିଛି ନୂଆ ଚାହୁଁଥିବା ବେଳେ ସ୍ବାଦକୁ ମଧ୍ୟ ଗୁରୁତ୍ୱ ଦେଉଛନ୍ତି। ଏମାନଙ୍କ ପସନ୍ଦକୁ ଦୃଷ୍ଟିରେ ରଖି ହୋଟେଲରେ ମଧ୍ୟ ବିଭିନ୍ନ ଡିସ୍ ପ୍ରସ୍ତୁତ କରାଯିବା ସହ ସ୍ବତନ୍ତ୍ର ନାଁ ମଧ୍ୟ ଦିଆଯାଉଛି। ଏହିଭଳି ବାରିପଦା କେସି ସର୍କିଲ ସ୍ଥିତ ହୋଟେଲ ମୟୂରଭଞ୍ଜରେ ଏକ ସ୍ବତନ୍ତ୍ର ଡିସ୍ ଗ୍ରାହକଙ୍କୁ ପରଷାଯାଉଛି। ଯାହାର ନଁା ରହିଛି ‘ଚିକେନ ୟୋଗା’। ଏହାର ପ୍ରସ୍ତୁତି ସମ୍ପର୍କରେ ହୋଟେଲର ମାଷ୍ଟର ସେଫ ପବନ ବେହେରା ଯାହା କୁହନ୍ତିି।
ଆବଶ୍ୟକ ସାମଗ୍ରୀ:
(ଗୋଟିଏ ପ୍ଲେଟ୍ ପାଇଁ)
ବୋନଲେସ୍ ଚିକେନ-୩୦୦ ଗ୍ରାମ
ତେଲ- ଆବଶ୍ୟକ ପରିମାଣର
ଅଦା-ରସୁଣ ପେଷ୍ଟ ୧ ଚାମଚ
ମଇଦା-୨ ଚାମଚ
କର୍ନ ଫ୍ଲୋର-୨ ଚାମଚ,
ହ୍ବାଇଟ ପେପର-୧ ଚାମଚ,
ଟମୋଟୋ ସସ୍- ୧ ଚାମଚ
ଚିଲି ସସ୍-୧ ଚାମଚ
ଗାର୍ଲିକ ସସ୍-୧ ଚାମଚ
କାଜୁ- ୮ଟି କାଜୁ
ଆବଶ୍ୟକ ଅନୁସାରେ ଅଣ୍ଡା
ପୋଦିନା ପତ୍ର
ଧନିଆ ପତ୍ର
ଭୁସୁର୍ର୍ଙ୍ଗ ପତ୍ର
କିଛି ଶୁଖିଲା ଲଙ୍କା ଓ ଅଳ୍ପ ଗରମ ମସଲା ଗୁଣ୍ଡ।
ପ୍ରସ୍ତୁତି ପ୍ରଣାଳୀ:
ପ୍ରଥମେ ବୋନଲେସ୍ ଚିକେନକୁ ଭଲ ଭାବେ ଧୋଇଦିଅନ୍ତୁ । ପରେ ଅଦା-ରସୁଣ ପେଷ୍ଟ, ମଇଦା, କନର୍ର୍ ଫ୍ଲୋର, ହ୍ବାଇଟ ପେପର, ଅଣ୍ଡା ଓ ଲୁଣକୁ ଭଲ ଭାବେ ମିଶାନ୍ତୁ। ଏହି ମିଶ୍ରଣ(ମାରିନେଟ)କୁ ୧୦ ମିନିଟ ରଖିଦିଅନ୍ତ। ଏହା ପରେ କଡ଼େଇରେ ତେଲ ପକାନ୍ତୁ। ପୂର୍ବ ପ୍ରସ୍ତୁତ ମାରିନେଟ ଚିକେନକୁ ଛାଣି ଦେଇ ଅନ୍ୟ ଏକ ପାତ୍ରରେ ରଖନ୍ତୁ। ଚୁଲା ଲଗାଇ କଡେଇରେ ତେଲ ଗରମ କରନ୍ତୁ। ଏଥିରେ ପୋଦିନା ପତ୍ର, ଧନିଆ ପତ୍ର, ଭୁର୍ସୁଙ୍ଗ ପତ୍ର, କାଜୁ ଓ ଶୁଖିଲା ଲଙ୍କାକୁ ଫ୍ରାଏ କରନ୍ତୁ। ଭଲ କରି ଫ୍ରାଏ କରିବା ପରେ ଏଥିରେ ପୂର୍ବରୁ ଛଣା ହୋଇଥିବା ଚିକେନ ସାମଗ୍ରୀକୁ ପକାନ୍ତୁ ଏବଂ ଭଲ ଭାବେ ଫ୍ରାଏ କରନ୍ତୁ। ଶେଷରେ ଗରମ ମସଲା ଗୁଣ୍ଡ ପକାନ୍ତୁ। ଏବେ ପ୍ରସ୍ତୁତ ହୋଇଗଲା ଚିକେନ ୟୋଗା। ଏହାକୁ ଘରେ ମଧ୍ୟ ବନାଇପାରିବେ। ନିଜେ ଖାଇବା ସହିତ ଅନ୍ୟମାନଙ୍କୁ ମଧ୍ୟ ଖୁଆଇ ପାରିବେ।
ମାଷ୍ଟର ସେଫ ପବନ ବେହେରା