ଖଡ଼ିଆଳ, ୨୩।୪: (ଡି.ଏନ୍.ଏ.) ନୂଆପଡ଼ା ଜିଲା ଖଡ଼ିଆଳ ବ୍ଲକ ନେହେନା ପଞ୍ଚାୟତର ଚିଚେର ଗ୍ରାମରେ ପାଣି ସମସ୍ୟା। ଗ୍ରାମର ୩ଟି ନଳକୂପରୁ ପାଣି ବାହାରୁ ନ ଥିବାରୁ ଚିଚେର ତଳ ପଡ଼ାର ୫୦୦ରୁ ଅଧିକ ଲୋକ ହଇରାଣ ହେଉଥିବା ଅଭିଯୋଗ କରିଛନ୍ତି। ଗ୍ରାମବାସୀଙ୍କ ଅଭିଯୋଗ ଅନୁଯାୟୀ, ବିଗତ ୨୦ ବର୍ଷରୁ ଅଧିକ ଦିନ ହେଲା ଚିଚେର ଓ ତୋରଲୀ ଗ୍ରାମକୁ ଜଳଯୋଗାଣ ହେଉଛି। ହେଲେ ଜଳ ଯୋଗାଣ ମାସକୁ ସାତରୁ ଆଠ ଦିନ ଚାଲୁଥିବା ବେଳେ ବାକି ଦିନଗୁଡ଼ିକରେ ଜଳ ଯୋଗାଣ ବନ୍ଦ ରହୁଛି। ଫଳରେ ଗ୍ରାମବାସୀ ୩ ଟି ନଳକୂପ ଉପରେ ନିର୍ଭର କରି ଚଳୁଥିବା ବେଳେ ବର୍ତ୍ତମାନ ସେହି ନଳକୂପରୁ ବହୁତ ସମୟ ଧରି ମାରିଲେ ଅଳ୍ପ ପାଣି ବାହାରୁଛି । ଫଳରେ ପାଣି ପାଇଁ ଦୀର୍ଘ ସମୟ ଧରି ଅପେକ୍ଷା କରିବାକୁ ପଡ଼ୁଛି। ଗୃହ ପାଳିତ ପଶୁ ପକ୍ଷୀଙ୍କୁ ଦିନ ବେଳା ଯେକୌଣସି ବ୍ୟବସ୍ଥା କରି ପାଣି ଯୋଗାଇ ଦିଆଯାଉଛି। କିନ୍ତୁ ରାତିରେ ବହୁତ ଅସୁବିଧାର ସମ୍ମୁଖୀନ ହେଉଛନ୍ତି। ନଳକୂପ ମରାମତି ପାଇଁ ଗ୍ରାମବାସୀ ପଞ୍ଚାୟତଠାରୁ ବ୍ଲକ କାର୍ଯ୍ୟାଳୟରେ ବାରମ୍ବାର ଅଭିଯୋଗ କଲେ ମଧ୍ୟ କିଛି ସୁଫଳ ମିଳୁନାହିଁ। ଫଳରେ ଗ୍ରାମବାସୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଉଛି। ଆଗାମୀ ଦିନରେ ପାଣି ସମସ୍ୟାର ସମାଧାନ ନ ହେଲେ ପଞ୍ଚାୟତ କାର୍ଯ୍ୟାଳୟ ଘେରାଉ କରାଯିବ ବୋଲି ଗ୍ରାମବାସୀ ନିଷ୍ପତ୍ତି ନେଇଛନ୍ତି। ଏନେଇ ଜଳ ଓ ପରିମଳ ଯନ୍ତ୍ରୀଙ୍କୁ ଅବଗତ କରିବାରୁ ତାଙ୍କ ପାଖରେ ଅଭିଯୋଗ ନଥିବା କହିଛନ୍ତି। ତୁରନ୍ତ ପାଣି ସମସ୍ୟାର ସମାଧାନ କରାଯିବ ବୋଲି ପ୍ରତିଶ୍ରୂତି ଦେଇଛନ୍ତି।