କଳିଙ୍ଗନଗର,୧୩ା୮(ଡି.ଏନ୍.ଏ.): ଯାଜପୁର ଜିଲା ଦାନଗଦୀ ବ୍ଲକ ଅଧୀନ ଶାଳିଜଙ୍ଗା ପାଞ୍ଚୟତ ଗମ୍ଭାରୀପାଟିଆ ଗ୍ରାମରେ ଏକ ଅଭାବନୀୟ ଘଟଣା ଘଟିଛି। ଗ୍ରାମର କିଶୋର ବଦରା(୪୫) ବିଲରୁ ଫେରୁଥିବା ବେଳେ ତାଙ୍କୁ ଏକ ଚିତି ସାପ କାମୁଡ଼ି ଦେଇଥିଲା। ପରେ ସାପକୁ ଗୋଡେଇ ଧରିଥିଲେ କିଶୋର। ପ୍ରତିଶୋଧ ପରାୟଣ ହୋଇ ସାପକୁ କାମୁଡ଼ି ଦୁଇଖଣ୍ଡ କରିଦେଇଥିଲେ। ସେତିକିରେ ତାଙ୍କ ମନ ବୁଝି ନ ଥିଲା। ବିଷଧର ସାପର ରକ୍ତ ପିଇ ଦେଇଥିଲେ। ଏହି ସମ୍ପର୍କରେ ସେ ଘରକୁ ଆସି ସ୍ତ୍ରୀଙ୍କୁ ଜଣାଇଥିଲେ। ଏପରି କି ହାତରେ ମୃତ ସାପକୁ ଧରି ଗାଁରେ ବୁଲିଥିଲେ। କିଛି ସମୟ ପରେ ଗୁଣିଆପାଖକୁ ଯାଇ ଝଡ଼ାଫୁଙ୍କା କରିଥିଲେ। କିନ୍ତୁ ମେଡିକାଲ ଯାଇ ନ ଥିଲେ। ସ୍ଥାନୀୟ ଲୋକେ ତାଙ୍କୁ ମେଡିକାଲ ଯିବାକୁ ବାଧ୍ୟ କରିଥିଲେ ମଧ୍ୟ ସେ କାହା କଥା ଶୁଣି ନ ଥିଲେ। ସେ ତାଙ୍କ ଗାଁ ପାଖ ଗଳିସନ୍ଧି ନାମକ ଏକ ସ୍ଥାନକୁ ଯାଇ ଝଡାଫୁଙ୍କା କରିଥିବା କହିଛନ୍ତି। ଏବେ ସେ ସୁସ୍ଥ ଥିବା ଜଣାପଡ଼ିଛି। ଏହି ଘଟଣା ଅଞ୍ଚଳରେ ଚର୍ଚ୍ଚାର ବିଷୟ ହୋଇଛି।
