Exif_JPEG_420
ଚିତ୍ରକୋଣ୍ଡା, ୨୪।୪(ଡି.ଏନ୍.ଏ.): ଡିଜିଟାଲ ଇଣ୍ଡିଆ ସେବା ମାଧ୍ୟମରେ ପ୍ରତ୍ୟେକ ଅଞ୍ଚଳକୁ ଅନ୍ତଃସଂଯୋଗ ପାଇଁ ହୋଇଥିବା ଯୋଜନା ଚିତ୍ରକୋଣ୍ଡାବାସୀଙ୍କ ପାଇଁ ସ୍ବପ୍ନ। ଓଡିଶା ସୀମାନ୍ତ ନକ୍ସଲ ଉପଦ୍ରୁତ ମାଓବାଦୀ ପ୍ରବଣ ଆଦିବାସୀ ବହୁଳ ମାଲକାନଗିରି ଜିଲା ଅଧୀନ ଚିତ୍ରକୋଣ୍ଡାରେ ବିଏସ୍ଏନ୍ଏଲ୍ ନେଟୱାର୍କ ଓ ବ୍ରଡବ୍ୟାଣ୍ଡ ସେବାରେ ବହୁ ଅବ୍ୟବସ୍ଥା। ଉପାନ୍ତ ଚିତ୍ରକୋଣ୍ଡା ଭଳି ଜାଗାରେ ମାତ୍ର ଗୋଟିଏ ବିଏସ୍ଏନ୍ଏଲ୍ ଟାୱାର ବସିଛି। ଚିତ୍ରକୋଣ୍ଡା ବ୍ଲକର ବହୁ ପଞ୍ଚାୟତବାସୀ ଏହା ଉପରେ ନିର୍ଭରଶୀଳ। ଏତେ ସଂଖ୍ୟାରେ ଲୋକଙ୍କ ବହୁଳ ବ୍ୟବହାର ହେତୁ ଟାୱାର ଲୋଡ ନେବାରେ ବିଫଳ ହେଉଛି। ମୋବାଇଲ ଫୋନ ରୁ ୧୦/୧୫ ଥର ଯୋଗାଯୋଗ ପାଇଁ ଚେଷ୍ଟା କଲେ ଥରେ ଲାଗୁଛି ,ବେଳେ ବେଳେ ଅଧାରୁ କଲ୍ ମଧ୍ୟ କଟି ଯାଉଛି। ଅନେକ ସମୟରେ ଦିନରେ ନେଟ୍ଓ୍ବର୍କ ଥିଲେ ରାତିରେ ରହୁନାହିଁ। ଏହା ମଧ୍ୟରେ ବ୍ରଡବ୍ୟାଣ୍ଡ ସେବା ମଧ୍ୟ ଫେଲ ମାରୁଛି। ଏହା ଫଳରେ ବ୍ୟାଙ୍କ ଲିଙ୍କ, ଅନଲାଇନ ସେବା, ଅଗ୍ରିମ ଟିକେଟ ସଂରକ୍ଷଣ, ରୋଗୀ ସେବା ପାଇଁ ଖବର ଓ ସର୍ବୋପରି ମେଲ ପଠାଇବା ପାଇଁ ଲୋକେ ବହୁ ଅସୁବିଧାର ସମ୍ମୁଖୀନ ହେଉଛନ୍ତି। ଜିଲାର ବିଭିନ୍ନ ଅଞ୍ଚଳରେ ଅନ୍ୟ ନେଟର୍ୱକ ତାର ପ୍ରଭାବ ବିସ୍ତାର କରୁଥିବା ବେଳେ ଚିତ୍ରକୋଣ୍ଡାକୁ ଉକ୍ତ ସେବାର ଲାଭ ମିଳୁନାହିଁ। ଚିତ୍ରକୋଣ୍ଡା ବ୍ୟାଙ୍କ ଛକ ନିକଟରେ ଆଉ ଏକ ୩ଜି ଟାୱାର ତିଆରି କରାଯାଇଥିଲେ ମଧ୍ୟ ଏହା ଆଜି ପର୍ଯ୍ୟନ୍ତ ଚାଲୁ କରାଯାଇ ନାହିଁ। ସେଥିପାଇଁ ବହୁ ସମସ୍ୟା ଦେଖାଦେଉଛି। ଚିତ୍ରକୋଣ୍ଡାବାସୀ ବାରମ୍ବାର ଅଭିଯୋଗ କରୁଥିଲେ ମଧ୍ୟ କୌଣସି ସୁବିଧା ମିଳିପାରିନାହିଁ। ଜିଲା ପ୍ରଶାସନ ଏହାର ସମାଧାନ ତଥା ବିକଳ୍ପ ବ୍ୟବସ୍ଥା ପାଇଁ ଅନ୍ୟ ନେଟ୍ଓ୍ବକ ବ୍ୟବସ୍ଥା ସହ ଆଉ ଏକ ବିଏସ୍ଏନ୍ଏଲ୍ ଟାୱାର କାର୍ଯ୍ୟକ୍ଷମ କରାଇବାକୁ ପ୍ରତିଶ୍ରୁତି ଦେଇ ଆସୁଥିଲେ ତାହା ପୂରଣ କରୁନି। ଏ ଦିଗରେ ପ୍ରଶାସନ ଦୃଷ୍ଟି ପକାଇ ବ୍ୟାଙ୍କ ଛକ ନିକଟରେ ଥିବା ଟାଓ୍ବାରକୁ ଚାଲୁ କରିବା ସହ ଅନ୍ୟ ନେଟ୍ଓର୍ବକ ସେବା ଯୋଗାଇ ଦେବାକୁ ଚିତ୍ରକୋଣ୍ଡାବାସୀ ଦାବି କରିଛନ୍ତି।