ଚିତ୍ରକୋଣ୍ଡା,୧୧।୬(ଡି.ଏନ୍.ଏ): କରୋନା ମହାମାରୀ ପାଇଁ ସାରା ଦେଶରେ ଲକ୍ଡାଉନ ଘୋଷଣା ହେବା ପରେ ମାର୍ଚ୍ଚ ମାସ ୨୩ଠାରୁ ସମସ୍ତ ଯାତାୟାତ ସମ୍ପୂର୍ଣ୍ଣ ଠପ୍ ହୋଇଯାଇଥିଲା। ଫଳରେ ଲୋକଙ୍କା ନାହିଁ ନ ଥିବା ଅସୁବିଧାର ସମ୍ମୁଖୀନ ହେବାକୁ ପଡ଼ିଥିଲା। ଗତ କିଛି ଦିନ ହେଲା ରାଜ୍ୟ ସରକାର ବସ୍ ଚଳାଚଳ ପାଇଁ ନିର୍ଦେଶ ଦେଇଥିଲେ ମଧ୍ୟ ଚିତ୍ରକୋଣ୍ଡାର ୧୮ଟି ଗ୍ରାମ ପଞ୍ଚାୟତ ଏହି ସେବାରୁ ବଞ୍ଚିତ ହୋଇଥିବା ଅଭିଯୋଗ ହୋଇଛି। ଦିନକ ପାଇଁ ଚିତ୍ରକୋଣ୍ଡାରୁ ଜୟପୁର ଗୋଟିଏ ମାତ୍ର ଘରୋଇ ବସ୍ ଚଳାଚଳ କରିଥିଲା। ହେଲେ ସେହି ଦିନଠାରୁ ଚିତ୍ରକୋଣ୍ଡାକୁ ନା ଘରୋଇ ବସ୍ ଚାଲୁଛି ନା ସରକାରୀ ବସ୍। ଉଭୟ ବସ୍ ସେବାରୁ ବଞ୍ଚିତ ହୋଇଛନ୍ତି ଚିତ୍ରକୋଣ୍ଡାର ୧୮ଟି ପଞ୍ଚାୟତବାସୀ। ଯଦି ସରକାର ତଥା ଜିଲା ପ୍ରଶାସନ ଲୋକଙ୍କ ଏହି ସମସ୍ୟାକୁ ନଜରରେ ରଖି ଅତି କମ୍ରେ ୩ଟି ସରକାରୀ ବସ୍ ଚଳାଚଳକୁ ଅନୁମତି ଦିଅନ୍ତେ ତେବେ ଜିଲାବାସୀ ଉପକୃତ ହୁଅନ୍ତେ ବୋଲି ସାଧାରଣ ମହଲରେ ମତ ପ୍ରକାଶ ପାଇଛି। ତେବେ ଚିତ୍ରକୋଣ୍ଡାରୁ ମାଲକାନଗିରି ଜିଲା ସଦର ମହକୁମା, ଚିତ୍ରକୋଣ୍ଡାରୁ ଜୟପୁର ସଦର ମହକୁମା ଓ ଚିତ୍ରକୋଣ୍ଡାରୁ ଭୁବନେଶ୍ୱର ପର୍ଯ୍ୟନ୍ତ ୩ଟି ବସ୍ ଚଳାଇବାକୁ ଅଞ୍ଚଳବାସୀ ଦାବି କରିଛନ୍ତି।