ଛତ୍ରପୁର, ୩୦।୪(ଡି.ଏନ୍.ଏ.)- କରୋନାର ମୁକାବିଲା ନିମନ୍ତେ ମାସ୍କର ବ୍ୟବହାର ଏବଂ ସାମାଜିକ ଦୂରତା ରଖିବା ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ଏହାକୁ ନେଇ ସରକାରୀସ୍ତରରେ ଲୋକମାନଙ୍କୁ ସଚେତନ କରାଯାଉଛି। ଏହି କ୍ରମରେ ଗଞ୍ଜାମ ଜିଲାପାଳ ବିଜୟ ଅମୃତା କୁଲାଙ୍ଗେ ଗୁରୁବାର ଚିତ୍ର ଆଙ୍କି ଭିନ୍ନ ବାର୍ତ୍ତା ଦେଇଛନ୍ତି। ଘରୁ ବାହାରିବା ସମୟରେ ସାମାଜିକ ଦୂରତ୍ୱ ରଖିବା ନିମନ୍ତେ ଛତାର ବ୍ୟବହାର କରିହେବ। ଏହାଦ୍ୱାରା କରୋନା ଓ ରୌଦ୍ରତାପରୁ ସୁରକ୍ଷା ପାଇହେବ ବୋଲି ସେ କହିଛନ୍ତି।
ଜିଲାପାଳ ବାର୍ତ୍ତା ଦେଇ କହିଛନ୍ତି, ଘରେ ରୁହନ୍ତୁ ସୁରକ୍ଷିତ ରୁହନ୍ତୁ। ଅତି ଆବଶ୍ୟକ ପଡିଲେ ଘରୁ ବାହାରିଲେ ଉଭୟ ମାସ୍କ ଓ ଛତା ବ୍ୟବହାର କରିବାକୁ ଜନସାଧାରଣଙ୍କୁ ସେ ଅନୁରୋଧ କରିଛନ୍ତି। ମାସ୍କ ବ୍ୟବହାର କଲେ ନିଜର ପାଟି ଓ ନାକକୁ ସୁରକ୍ଷିତ ରଖିହେବ। ସେହିପରି ଛତା ବ୍ୟବହାର ଦ୍ୱାରା ଦେଢ଼ ମିଟର ସାମାଜିକ ଦୂରତା ଅବଲମ୍ବନ କରିବା ସହ ରୌଦ୍ର ତାପରୁ ସୁରକ୍ଷିତ ରଖିହେବ ବୋଲି ଜ଼ିଲାପାଳ କହିଛନ୍ତି।