ପରଜଙ୍ଗ, ୨୬।୭(ଡି.ଏନ.ଏ.)-ଢେଙ୍କାନାଳ ଜିଲା ପରଜଙ୍ଗ ବ୍ଲକ ଆଖୁଆପାଳ ପଞ୍ଚାୟତ ଭେଜିଆ ୩ନଂ. କଲୋନୀର ଅସହାୟ ଚିନା ନାୟକ (୮୧)ଙ୍କ ନିକଟରେ ପହଞ୍ଚିଛି ପ୍ରଶାସନ। ତାଙ୍କୁ ଦିଆଯାଇଛି ୭୦୦ ଟଙ୍କା ଭତ୍ତା। ସରପଞ୍ଚ ଦେଇଛନ୍ତି ୧୦ କେଜି ଚାଉଳ। ଖୁବ୍ ଶୀଘ୍ର ଆବାସ ଯୋଜନାରେ ଘର ମଧ୍ୟ ଯୋଗାଇ ଦିଆଯିବ ବୋଲି ପ୍ରତିଶ୍ରୁତି ଦେଇଛନ୍ତି ବିଡିଓ। ଜିଲାପାଳଙ୍କ ନିକଟରେ ଇଚ୍ଛା ମୃତ୍ୟୁ ଆବେଦନ କରିଥିବା ଚିନାଙ୍କୁ ଏଣିକି ଆଉ କୌଣସି ସମସ୍ୟା ହେବନାହିଁ ବୋଲି ଅଧିକାରୀ ପ୍ରତିଶ୍ରୁତି ଦେବା ପରେ ତାଙ୍କ ମୁହଁରେ ଫୁଟିଛି ହସ ଏବଂ ଏଥିପାଇଁ ସେ ଧନ୍ୟବାଦ ଦେଇଛନ୍ତି ‘ଧରିତ୍ରୀ’କୁ।
ଭେଜିଆ ୩ନଂ. କଲୋନୀରେ ରୁହନ୍ତି ଚିନା। ତାଙ୍କର ସନ୍ତାନସନ୍ତତି କେହି ନାହାନ୍ତି। ସ୍ବାମୀଙ୍କ ମୃତ୍ୟୁପରେ ସେ ସମ୍ପୂର୍ଣ୍ଣ ଅସହାୟ ହୋଇପଡ଼ିଥିଲେ। ଏପରି କି କୌଣସି ଗୋଟିଏ ବି ସରକାରୀ ଯୋଜନାରେ ତାଙ୍କୁ ସାମିଲ କରାଯାଇ ନ ଥିଲା। ଦୁର୍ଦ୍ଦିନରେ ବଞ୍ଚତ୍ବା ଅପେକ୍ଷା ମରିଯିବା ଭଲ ବୋଲି ବିଚାର କରି ସେ ଜିଲାପାଳଙ୍କ ନିକଟରେ ଇଚ୍ଛାମୃତ୍ୟୁ ଆବେଦନ କରିଥିଲେ। ଗୁରୁବାର ଏହି ଖବର ‘ଧରିତ୍ରୀ’ରେ ପ୍ରକାଶ ପାଇବା ପରେ ପ୍ରଶାସନର ଚେତା ପଶିଥିଲା। ଆଡ଼ ଆଖିରେ ଚାହଁୁ ନ ଥିବା ପ୍ରଶାସନିକ ଅଧିକାରୀ ଦିନତମାମ ଡେରା ପକାଇଥିଲେ ଚିନାଙ୍କ ଘରେ।
ପଞ୍ଚାୟତ ନିର୍ବାହୀ ଅଧିକାରୀ ରାଳିଆ ହଁାସଦା ପ୍ରଥମେ ତଦନ୍ତ କରିବା ପରେ ବୃଦ୍ଧା ଜଣକ ଯୋଗ୍ୟତା ଥାଇ ସରକାରୀ ଯୋଜନାରୁ ବଞ୍ଚତ୍ତ ରହିଥିବା ଜଣାପଡ଼ିଥିଲା। ଏହାପରେ ରିଲିଫ୍ କୋଡ୍ ଅନୁଯାୟୀ ସରପଞ୍ଚ ପ୍ରଦୀପ ବେହେରା ତାଙ୍କୁ ୧୦ କେଜି ଚାଉଳ ଯୋଗାଇ ଦେଇଛନ୍ତି। ଚିନା ବ୍ଲକ କାର୍ଯ୍ୟାଳୟକୁ ଆସିବାକୁ ସକ୍ଷମ ନ ଥିବାରୁ ବିଡିଓ ବସନ୍ତ କୁମାର ମଲ୍ଲିକଙ୍କ ନିର୍ଦ୍ଦେଶକ୍ରମେ ଘରେ ହିଁ ଆଧାରକାର୍ଡ ପଞ୍ଜୀକରଣ ବ୍ୟବସ୍ଥା କରାଯାଇଥିଲା। ହେଲେ ଏଥିରେ କଣ୍ଟା ସାଜିଥିଲା ବିଦ୍ୟୁତ୍। ସରପଞ୍ଚଙ୍କ ଉଦ୍ୟମରେ ଜେନେରେଟର ସୁବିଧା କରାଯିବା ପରେ ଆଧାରକାର୍ଡ ପଞ୍ଜୀକରଣ ହୋଇଛି। ଆଧାର କାର୍ଡ ଆସିବାପରେ ତାଙ୍କୁ ଅନ୍ନପୂର୍ଣ୍ଣା ଯୋଜନାରେ ପ୍ରତିମାସରେ ୧୦ କେଜି ଚାଉଳ ମାଗଣାରେ ଯୋଗାଇ ଦିଆଯିବ। ଏଥିସହ ସେ ନିୟମିତ ଭତ୍ତା ପାଇବେ ବୋଲି ବିଡିଓ କହିଛନ୍ତି।