ବରଗଡ଼ ଅଫିସ୍,୨୨।୮- ବରଗଡ଼ ସହର ଉପକଣ୍ଠ ତୋରାସ୍ଥିତ ସମବାୟ ଚିନିକଳରେ କାର୍ଯ୍ୟରତ ନିରାପତ୍ତା କର୍ମଚାରୀଙ୍କୁ ୨୪ମାସର ଦରମା ମିଳି ନଥିବା ଅଭିଯୋଗ ହୋଇଛି। ଏଭଳି ଅଭିଯୋଗ ନେଇ ଗୁରୁବାର ନିରାପତ୍ତା କର୍ମଚାରୀମାନେ ବରଗଡ଼ ଜିଲାପାଳଙ୍କୁ ଫେରାଦ ହୋଇଥିଲେ। ଜିଲାପାଳ ଇନ୍ଦ୍ରମଣି ତ୍ରିପାଠୀଙ୍କୁ ସେମାନେ ଏ ନେଇ ଏକ ସ୍ମାରକପତ୍ର ପ୍ରଦାନ କରିଛନ୍ତି। ସ୍ମାରକପତ୍ରରେ ସେମାନେ ଉଲ୍ଲେଖ କରିଛନ୍ତି, ଦରମା ମିଳୁ ନ ଥିବା ନେଇ ବାରମ୍ବାର ବିଭାଗୀୟ ଉଚ୍ଚ କର୍ତ୍ତପକ୍ଷଙ୍କ ଦୃଷ୍ଟି ଆକର୍ଷଣ କରାଯାଇଛି। ତେବେ ବିଭାଗୀୟ କର୍ତ୍ତୃପକ୍ଷଙ୍କଠାରୁ କେବଳ ଆଶ୍ୱାସନା ଛଡ଼ା ଅନ୍ୟକିଛି ମିଳୁ ନଥିବା ନିରାପତ୍ତା କର୍ମଚାରୀମାନେ ଅଭିଯୋଗ କରିଛନ୍ତି । ଅପରପକ୍ଷେ ଆଗକୁ ପଶ୍ଚିମ ଓଡ଼ିଶାର ଗଣପର୍ବ ନୂଆଁଖାଇ ଆସୁଛି । ସେହି ପର୍ବ ପାଳନ କରିବା ପାଇଁ ମଧ୍ୟ ହାତରେ ଅର୍ଥ ନାହିଁ । ଏଣୁ ବକେୟା ଦରମା ପ୍ରଦାନ କ୍ଷେତ୍ରରେ ବିହିତ ପଦକ୍ଷେପ ନେବା ପାଇଁ ନିରାପତ୍ତା କର୍ମଚାରୀମାନେ ଜିଲାପାଳଙ୍କୁ ନିବେଦନ କରିଛନ୍ତି । ସ୍ମାରକପତ୍ରରେ ଦୀପରାଜ ପ୍ରସାଦ, ବଳିଷ୍ଠ ସାହୁ, ନନ୍ଦକିଶୋର ରଣା, ରାଜକିଶୋର ଦୀପ ପ୍ରମୁଖଙ୍କ ସ୍ବାକ୍ଷର ରହିଛି ।
