ଆସିକା,୨୩ା୧୦ (ଡି.ଏନ୍.ଏ.)- ଆସିକା ସମବାୟ ଚିନିଶିଳ୍ପ ମଦ ପ୍ରସ୍ତୁତି ଲାଗି ରହିଥିବା ବଟ୍ଲିଂ ପ୍ଲାଣ୍ଟରେ ମଙ୍ଗଳବାର ଅପରାହ୍ନରୁ ଶ୍ରମିକ ଅଶାନ୍ତି ଦେଖାହୋଇଛି। ମଦ ପ୍ୟାକିଂ କାର୍ଯ୍ୟରେ ନିୟୋଜିତ ଶ୍ରମିକମାନେ ୩ଦଫା ଦାବିରେ ସନ୍ଧ୍ୟାରୁ ଚିନିଶିଳ୍ପ ପରିଚାଳନା ନିର୍ଦ୍ଦେଶକ ଲକ୍ଷ୍ମୀକାନ୍ତ ବେହେରା, ସମ୍ପାଦକ ଚନ୍ଦ୍ରଶେଖର ରେଡ୍ଡୀ ଓ ପରିଚାଳନା ପରିଷଦ ସଭାପତି ବିପିନ ବିହାରୀ ପାତ୍ରଙ୍କୁ ପରିଚାଳନା ନିର୍ଦ୍ଦେଶକଙ୍କ ଅଫିସରେ ଘେରାଉ କରି ରଖିଛନ୍ତି। ଭଞ୍ଜନଗର ଉପଜିଲାପାଳ ରାଜେନ୍ଦ୍ର ମିଞ୍ଜ, ଆସିକା ଏସ୍ଡିପିଓ ସୂର୍ଯ୍ୟମଣି ପ୍ରଧାନ, ତହସିଲଦାର ଆଶୁତୋଶ ଗୌରବ କର, ଥାନା ଅଧିକାରୀ ପ୍ରଶାନ୍ତ କୁମାର ସାହୁ ପ୍ରମୁଖ ଶ୍ରମିକ ପ୍ରତିନିଧି ପୂର୍ବତନ ବିଧାୟକ ସରୋଜ ପାଢୀ, ବିଜୟ କୁମାର ସ୍ବାଇଁଙ୍କ ସହ ଆଲୋଚନା କରିଥିଲେ ମଧ୍ୟ ସମାଧାନର ବାଟ ବାହାରିନାହିଁ। ଗଞ୍ଜାମ ଜିଲାପାଳ ବୁଧବାର ଛତ୍ରପୁରଠାରେ ଏ ସମ୍ପର୍କରେ ଆଲୋଚନା ଲାଗି ଶ୍ରମିକ ପ୍ରତିନିଧି ଓ ଚିନିଶିଳ୍ପ ପରିଚାଳନା କର୍ତ୍ତୃପକ୍ଷଙ୍କୁ ଆସିବା ଲାଗି ଉପଜିଲାପାଳଙ୍କ ଜରିଆରେ ଖବର ପଠାଇଥିଲେ। ମାତ୍ର ଶ୍ରମିକମାନେ ଖବର ଲେଖାହେବା ପର୍ଯ୍ୟନ୍ତ ଏଥିରେ ରାଜି ହୋଇ ନ ଥିବା ଜଣାପଡିଛି। ବଟଲିଂ ପ୍ଲାଣ୍ଟରେ କାର୍ଯ୍ୟରତ ଶ୍ରମିକଙ୍କୁ ପୂର୍ବ ଚୁକ୍ତି ମୁତାବକ ମାସିକ ୨୪ ଦିନର ଦରମା, ଗତ ଏପ୍ରିଲରୁ ମିଳି ନ ଥିବା ଅତିରିକ୍ତ ମହଙ୍ଗା ଭତ୍ତା ଓ ଭଙ୍ଗା ମେଶିନକୁ କାର୍ଯ୍ୟକ୍ଷମ କରି ଶ୍ରମିକଙ୍କୁ କାର୍ଯ୍ୟ କରିବାର ସୁଯୋଗ ଦେବା ପ୍ରମୁଖ ଦାବି ରହିଛି।