ମହାକାଳପଡ଼ା,୧୭ା୬(ଡି.ଏନ୍.ଏ.): କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ରାମନଗର ପଞ୍ଚାୟତ ମହାନଦୀ ପାର୍ଶ୍ୱବର୍ତ୍ତୀ ପିତାପାଟ ଗାଁର ବିଭିନ୍ନ ଗଛରେ ଝିଣ୍ଟିକା ପ୍ରଜାତିର କୀଟଗୁଡ଼ିକ ଗଛପତ୍ର ଖାଇ ନଷ୍ଟ କରୁଥିବା ନେଇ ଗ୍ରାମବାସୀ ଅଭିଯୋଗ କରିଛନ୍ତି। ତେବେ ଏହି କୀଟ ପଙ୍ଗପାଳ ବୋଲି ଲୋକେ ସନ୍ଦେହ କରୁଛନ୍ତି। ଏ ପର୍ଯ୍ୟନ୍ତ ପ୍ରଶାସନ ପକ୍ଷରୁ କୌଣସି ପ୍ରତିକ୍ରିୟା ମିଳିପାରିନାହିଁ। ଯଦି ପଙ୍ଗପାଳ ପ୍ରଜାତି କୀଟ ହୋଇଥାନ୍ତି, ତେବେ ଚାଷୀଙ୍କ ପାଇଁ ବିରାଟ ସମସ୍ୟା ହେବ ବୋଲି ପୂର୍ବତନ ସରପଞ୍ଚ ବିକାଶ ଦେବନାଥ କହିଛନ୍ତି। ଏହି କୀଟ ଦେଖି ସ୍ଥାନୀୟ ଲୋକେ ଆତଙ୍କିତ ହୋଇଥିବା ସେ କହିଛନ୍ତି। ସାଧାରଣତଃ ମୌସୁମୀ ଆରମ୍ଭରୁ ଏହି କୀଟଗୁଡ଼ିକ ବଂଶ ବିସ୍ତାର କରନ୍ତି। ତେବେ କୀଟ ବିଶେଷଜ୍ଞଙ୍କ ପାଇଁ ଏକ ଚ୍ୟାଲେଞ୍ଜ ସୃଷ୍ଟି କରିବ। କାରଣ ଖରିଫ୍ ଧାନ ଫସଲ ପାଇଁ ଏହା ମହାମାରୀ ରୂପେ ଉଭା ହେବ। ଗ୍ରାମର ଦୀନବନ୍ଧୁ ବେହେରା, ଟୁକୁନା ଜେନା, କୃଷ୍ଣପଦ ମିର୍ଦ୍ଧା, ସୁକୁମାର ମିର୍ଦ୍ଧା, ଦିଲ୍ଲୀପ ବେହେରା, ବିଶ୍ୱନାଥ ବେହେରା, ବିନୋଦ ବେହେରା ପ୍ରମୁଖ ତଦନ୍ତ ପାଇଁ ଦାବି କରିଛନ୍ତି। ଏ ସମ୍ପର୍କରେ ଜିଲାପାଳ ସମର୍ଥ ବର୍ମାଙ୍କ ମତାମତ ନେବା ସମ୍ଭବପର ହୋଇପାରିନାହିଁ।