ଶେରଗଡ଼,୧୫।୫(ଡି.ଏନ.ଏ.): ଗଞ୍ଜାମ ଜିଲା ଶେରଗଡ଼ ବ୍ଲକରେ ୫-ଟି ସଚିବ ଭି.କାର୍ତ୍ତିକେୟ ପାଣ୍ଡିଆନ, ଉନ୍ନୟନ କମିଶନର ସୁରେଶ ମହାପାତ୍ର ଶୁକ୍ରବାର କରୋନା ମୁକାବିଲା ନେଇ ସମୀକ୍ଷା କରିଛନ୍ତି । ଜିଲାରେ ପ୍ରସ୍ତୁତି ଏବଂ କାମ ଠିକ୍ ଭାବେ ଚାଲିଛି। ମେ ୩୦ ତାରିଖ ପରେ ସବୁ ଠିକ ହୋଇଯିବ ବୋଲି ୫ଟି ସଚିବ କହିଥିବା ଜଣାପଡ଼ିଛି।
ସୂଚନାନୁଯାୟୀ,୫-ଟି ସଚିବ ପାଣ୍ଡିଆନ, ଉନ୍ନୟନ କମିଶନର ମହାପାତ୍ର ହେଲିକପ୍ଟର ଯୋଗେ ଗଜପତିରୁ ଶେରଗଡ଼ ମହାତ୍ମାଗାନ୍ଧୀ ଖେଳ ପଡ଼ିଆରେ ଓହ୍ଲାଇ ଥିଲେ। ପରେ କାର ଯୋଗେ ବ୍ଲକ ସଭା ଗୃହରେ ପହଞ୍ଚି କରୋନା ମୁକିବିଲା ନେଇ ବିଭିନ୍ନ କାର୍ଯ୍ୟ ସମୀକ୍ଷା କରିଥିଲେ। ଶେରଗଡ଼ ବ୍ଲକରେ ଥିବା ୫୮ଟି କ୍ୱାରାଣ୍ଟାଇନ୍ କେନ୍ଦ୍ରର ଅବସ୍ଥା ବିଷୟରେ ବିଡିଓ ସୁରଞ୍ଜନ କୁମାର ସାହୁଙ୍କ ପଚାରି ବୁଝିଥିଲେ। କେନ୍ଦ୍ରମାନଙ୍କରେ ପରିଚାଳନା ବ୍ୟବସ୍ଥା ଠିକ ଚାଲିଥିବା କଥା ସମୀର ପ୍ରଧାନ କହୁଥିଲେ। ଏହାପରେ ସମସ୍ତ କ୍ୱାରାଣ୍ଟାଇନ୍ କେନ୍ଦ୍ରର ପରିଚାଳନାଗତ ସମାସ୍ୟା ଉପରେ ସରପଞ୍ଚ ମାନଙ୍କୁ ପଚାରିଥିଲେ। ଆପଣମାନଙ୍କ ପାଇଁ ହିଞ୍ଜଳିିଠାରେ କୋଭିଡ୍ ହସ୍ପିଟାଲ ବ୍ୟବସ୍ଥା କରାଯାଉଛି। ଅତିଶିଘ୍ର ତାହା କାର୍ଯ୍ୟକ୍ଷମ ହେବ। ବ୍ଲକର ଲୋକମାନେ ଘରେ ରୁହନ୍ତୁ। ସରକାରଙ୍କ ନିୟମ ମାନନ୍ତୁ। ଆଉ ୩୦ଦିନ ମଧ୍ୟରେ ଓଡ଼ିଶାର ଅବସ୍ଥା ଠିକ ହୋଇ ଯିବ। ଉପସ୍ଥିତ ସରପଞ୍ଚମାନେ କାମ ଠିକ କରନ୍ତୁ। ଆପଣଙ୍କ ପଞ୍ଚାୟତର ସୁରକ୍ଷା ଆପଣଙ୍କ ହାତରେ ବୋଲି କହିଥିଲେ । ସରପଞ୍ଚମାନେ ଗୋଟିଏ ଗୋଟିଏ ଯୋଦ୍ଧା। ଏଣୁ ଆପଣଙ୍କ ହାତରେ ଆମେ କ୍ଷମତା ଦେଇଛୁ। ତାର ସଠିକ ଉପଯୋଗ କରନ୍ତୁ। ସରକାର ଏଦିଗରେ ଆପଣଙ୍କ ନାଁରେ ୫୦ଲକ୍ଷର ବୀମା ଘୋଷଣା କରିଛନ୍ତି ଅଧିକାରୀମାନେ କହିଥିଲେ। ସେହିଭଳି ଉପସ୍ଥିତ ନେତା ଓ ଅଧିକାରୀ ମାନଙ୍କୁ କରୋନା ମୁକାବିଲାରେ ଠିକ ସହଯୋଗ କରିଥିବାରୁ ଧନ୍ୟବାଦ ପ୍ରଦାନ କରିଥିଲେ।