ଜୁନାଗଡ,୧୨।୮(ଡି.ଏନ.ଏ.) କଳାହାଣ୍ଡି ଜିଲା ଜୁନାଗଡ ଥାନା ଅଧୀନ ଚିଲଗୁଡା ଅଞ୍ଚଳରେ ମଦ, ସଟ୍ଟା କାରବାର ଦିନକୁ ଦିନ ବୃଦ୍ଧି ପାଇବାରେ ଲାଗିଛି। ଏହାକୁ ନେଇ ସ୍ଥାନୀୟ ଅଞ୍ଚଳବାସୀଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି। ଏଥିପ୍ରତି ସ୍ଥାନୀୟ ଚିଲଗୁଡା ଫାଣ୍ଡି ପୋଲିସ କର୍ତ୍ତୃପକ୍ଷ ନୀରବ ଦ୍ରଷ୍ଟା ସାଜିଥିବାରୁ ଦିନକୁ ଦିନ ମଦ ଓ ସଟ୍ଟା ବେପାରୀଙ୍କ କାରବାର ବଢିବାରେ ଲାଗିଛି। ସୂଚନାଯୋଗ୍ୟ ଯେ, ଚିଲଗୁଡା ଅଞ୍ଚଳରେ ଆଇନ ପରିସ୍ଥିତିକୁ ନିୟନ୍ତ୍ରଣ କରିବା ତଥା ନିଶା କାରବାରକୁ ରୋକିବା ପାଇଁ ଏକ ଫାଣ୍ଡି ସ୍ଥାପନ କରାଯାଇଛି। ବର୍ତ୍ତମାନ ଏହି ଫାଣ୍ଡି ଅଧୀନରେ ଥିବା ଚିଲଗୁଡା ସମେତ ଦାସିଗଁା, ଚିଲକପୁର, ତାଲପଦର ଆଦି ଗ୍ରାମରେ ମଦ, ସଟ୍ଟା କାରବାର କୁଟିର ଶିଳ୍ପରେ ପରିଣତ ହୋଇଛି। ମଦ ଓ ସଟ୍ଟା ନିଶାରେ ପଡି ଗରୀବ ଲୋକମାନେ ସର୍ବସାନ୍ତ ହେଉଛନ୍ତି। ଦିନସାରା ହାଡ ଭଙ୍ଗା ପରିଶ୍ରମ କରି ଯାହାକିଛି ପାରିଶ୍ରମିକ ଆଣୁଛନ୍ତି ତାହା ମଦ କୋଠିରେ ଓ ସଟ୍ଟା ଖେଳି ଖର୍ଚ୍ଚ କରିଦେଉଛନ୍ତି। ଫଳରେ ତାଙ୍କ ପରିବାର ଚଳିବା କଷ୍ଟକର ହୋଇପଡୁଛି। ଯାହାକୁ ନେଇ ବିଭିନ୍ନ ସମୟରେ ପରିବାର ମଧ୍ୟରେ କଳିକଜିଆ ମଧ୍ୟ ଲାଗିରହୁଛି। ଅନ୍ୟପକ୍ଷରେ ଅଞ୍ଚଳରେ ମଦ, ସଟ୍ଟାକୁ ନିୟନ୍ତ୍ରଣ କରିବା ପାଇଁ ନିକଟରେ ଚିଲଗୁଡା ଫାଣ୍ଡି ପୋଲିସ ରହିଥିବା ବେଳେ ଲାଞ୍ଚଖୋର ମନୋବୃତ୍ତି ଯୋଗୁ ଏଥିପ୍ରତି ଆଖି ଦୃଷ୍ଟିଆ ଦୃଷ୍ଟି ନ ଦେବା ସାଧାରଣରେ ଚର୍ଚ୍ଚାର ବିଷୟ ପାଲଟିଛି। ବେଳେ ବେଳେ ଅଭିଯୋଗ ଆସିଲେ ଲୋକ ଦେଖାଣିଆ କାଁଭାଁ ଚଢାଉ କରି ଛୋଟ ମୋଟ ମଦ, ସଟ୍ଟା ବେପାରୀଙ୍କୁ ଧରପଗଡ କରାଯାଉଛି। ସେହିପରି ପ୍ରାୟ ସମୟରେ ଏଠାକାର ଫାଣ୍ଡି ଅଧିକାରୀ କାର୍ଯ୍ୟାଳୟରେ ଉପସ୍ଥିତ ରହୁ ନ ଥିବା ଅଭିଯୋଗ ହୋଇଛି। ଫଳରେ ଏଠାରେ ଆଇନ ଶୃଙ୍ଖଳା ବିପର୍ଯ୍ୟସ୍ତ ହୋଇପଡିଛି। ଏ ନେଇ ଚିଲଗୁଡା ଫାଣ୍ଡି ଅଧିକାରୀ ଅଶୋକ ବିହାରୀଙ୍କୁ ପଚାରିବାରୁ ବିଭିନ୍ନ ସମୟରେ ମଦ, ସଟ୍ଟା ଉପରେ ଚଢାଉ କରାଯାଉଛି ବୋଲି କହିଥିଲେ। ସେହିପରି କାର୍ଯ୍ୟାଳୟରେ ଉପସ୍ଥିତ ରହୁ ନ ଥିବା ବିଷୟରେ ପଚାରିବାରୁ କଥାଟିକୁ ଅସ୍ବିକାର କରିଥିଲେ। କଳାହାଣ୍ଡି ଏସ୍ପି ଏଥିପ୍ରତି ଦୃଷ୍ଟି ଦେଇ ସରଜମିନ ତଦନ୍ତ କରିବାକୁ ସାଧାରଣରେ ଦାବି ହୋଇଛି।