ଚମ୍ପୁଆ, ୯।୯(ଡି.ଏନ.ଏ.)-ଚମ୍ପୁଆ ଓ ଯୋଡା ବ୍ଲକରେ ଚିଲଡ୍ରେନ ସ୍କୁଲ ବ୍ୟାଗ ପଲିସିକୁ ଅଣଦେଖା କରାଯାଉଥିବା ଦେଖିବାକୁ ମିଳୁଛି। ସରକାରୀ ବିଦ୍ୟାଳୟଠାରୁ ଆରମ୍ଭ କରି ବେସରକାରୀ ବିଦ୍ୟାଳୟସଗୁଡ଼ିକ ଖୋଲା ଖୋଲି ଭାବେ ଏହି ନିୟମର ଉଲ୍ଲଂଘନ କରୁଥବା ବେଳେ ଏହାର ପ୍ରଭାବ ଛାତ୍ରୀଛାତ୍ରଙ୍କ ଉପରେ ପଡୁଛି। ନିୟମ ଲାଗୁହେବାର ଦୁଇମାସ ବିତିବାକୁ ବସିଥିବା ବେଳେ ସ୍କୁଲ କର୍ତ୍ତୃପକ୍ଷଙ୍କ ଉପରେ କୌଣସି ପ୍ରଭାବ ପକାଇ ନ ଥିବା ଏବଂ ଶିକ୍ଷାବିଭାଗ ପକ୍ଷରୁ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇନାହଁି। ସରକାରଙ୍କ ନିର୍ଦ୍ଦେଶନାମା ପରେ ଅଭିଭାବକ ମହଲରେ ଏହାକୁ ନେଇ ଖୁସିବ୍ୟକ୍ତ କରାଯାଇଥିଲେ ମଧ୍ୟ ବିଦ୍ୟାଳୟ କର୍ତ୍ତୃପକ୍ଷ ଏହାକୁ ପାଳନ କରୁ ନ ଥିବାରୁ ଅସନ୍ତୋଷ ବଢ଼ିବାରେ ଲାଗିଛି। ସୂଚନା ଅନୁସାରେ ଗତ ୮।୩।୨୦୧୯ରିଖରେ ସରକାରଙ୍କ ପକ୍ଷରୁ ବିଦ୍ୟାଳୟଗୁଡିକରେ ଛାତ୍ରୀଛାତ୍ରଙ୍କ ନିମିତ୍ତ ବ୍ୟବହାର କରାଯାଉଥିବା ସ୍କୁଲ ବ୍ୟାଗ ଗୁଡିକର ଓଜନ ଉପରେ ନିର୍ଦ୍ଦେଶ ଜାରି କରାଯାଇଥିଲା। କେଉଁ ଶ୍ରେଣୀ ପାଇଁ କେତେ ଓଜନ ରହିବ ସେବିଷୟରେ ସୂଚନା ଦିଆଯାଇ ତୁରନ୍ତ ଏହାକୁ କାର୍ଯ୍ୟକାରୀ କରିବାକୁ ନିର୍ଦ୍ଦେଶ ଦେଇଥିଲେ। ଏଥିରେ କୌଣସି ଖିଲାପ କରାଗଲେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସୂଚନା ରହିଛି। ମାତ୍ର ନିୟମ ନିୟମ ବାଟରେ ରହିଥିବା ବେଳେ ଚମ୍ପୁଆ ଓ ଯୋଡା ବ୍ଲକରେ ବିଦ୍ୟାଳୟଗୁଡିକ ଏହାକୁ ଖାତିର କରୁ ନ ଥିବା ଦେଖାଯାଇଛି। ପ୍ରତ୍ୟହ ଉଭୟ ବ୍ଲକରେ ଛାତ୍ରୀଛାତ୍ର ୫କେଜିରୁୁ ଅଧିକ ଓଜନର ବ୍ୟାଗ ଧରି ବିଦ୍ୟାଳୟଗୁଡିକୁ ଯାଉଛନ୍ତି। ଏ ସମ୍ପର୍କରେ ଯୋଡା ବ୍ଲକ ଦାୟିତ୍ୱରେ ଥିବା ଚମ୍ପୁଆ ବ୍ଲକ ଶିକ୍ଷା ଅଧିକାରୀ ଗୋବର୍ଦ୍ଧନ ନାଏକଙ୍କୁ ପଚାରିବାରୁ ବିଦ୍ୟାଳୟଗୁଡ଼ିକୁ ଛାତ୍ରୀଛାତ୍ର ବ୍ୟବହାର କରୁଥିବା ସ୍କୁଲ ବ୍ୟାଗର ଓଜନ ମଗାଯାଇଛି। ଯଦି ନିୟମରୁ ଅଧିକ ଓଜନ ବ୍ୟବହାର କରୁଥିବେ ତେବେ ସେଥିରୁ ନିବୃତ୍ତ ରହିବାକୁ କୁହାଯିବ। ନ ମାନିଲେ ବିଦ୍ୟାଳୟ ବିରୋଧରେ ପଦକ୍ଷେପ ନିଆଯିବ ବୋଲି ସେ କହିଛନ୍ତି।