ବାଲୁଗାଁ,୨୮ା୫(ଡି.ଏନ.ଏ.): ପ୍ରଚଣ୍ଡ ରୌଦ୍ରତାପ ସତ୍ତ୍ୱେ ନୀଳାମ୍ବୁ ଚିଲିକାରେ ୧୦୬ ପ୍ରଜାତିର ୩୮ ହଜାର ୨୭୧ଟି ପକ୍ଷୀ ଅବସ୍ଥାନ କରିଛନ୍ତି। ବାଲୁଗାଁ ବନ୍ୟପ୍ରାଣୀ ବିଭାଗ ପକ୍ଷରୁ କରାଯାଇଥିବା ଗ୍ରୀଷ୍ମକାଳୀନ ପକ୍ଷୀଗଣନା ରିପୋର୍ଟରୁ ଏହା ଜଣାଯାଇଛି ା ଗତବର୍ଷ ତୁଳନାରେ ଚଳିତବର୍ଷ ପକ୍ଷୀ ସଂଖ୍ୟା ହ୍ରାସ ପାଇଛି ା ଗତବର୍ଷ ଏହି ସମୟରେ ୯୭ ପ୍ରଜାତିର ୫୦,୫୪୧ ପକ୍ଷୀ ଥିଲେ।
ଚଳିତବର୍ଷ ବାଲୁଗାଁ ବନ୍ୟପ୍ରାଣୀ ଡିଭିଜନର ୫ଟି ରେଞ୍ଜ ଅଞ୍ଚଳରେ ଗ୍ରୀଷ୍ମକାଳୀନ ପକ୍ଷୀଗଣନା ଗତ ୨୧ ତାରିଖରେ ଅନୁଷ୍ଠିତ ହୋଇଥିଲା ା ବାଲୁଗାଁ, ଟାଙ୍ଗୀ, ସାତପଡ଼ା, ଚିଲିକା ଓ ରମ୍ଭା ରେଞ୍ଜର ସମସ୍ତ କର୍ମଚାରୀ ଗଣନା କାର୍ଯ୍ୟରେ ସାମିଲ ହୋଇଥିଲେ। ସୋମବାର ବିଭାଗ ପକ୍ଷରୁ ପ୍ରକାଶିତ ରିପୋର୍ଟ ଅନୁଯାୟୀ ସମଗ୍ର ଚିଲିକାରେ ୧୦୬ ପ୍ରଜାତିର ୩୮ହଜାର ୨୭୧ ପକ୍ଷୀଙ୍କ ସମାଗମ ହୋଇଛି ା ସେଥିମଧ୍ୟରୁ ବିଦେଶାଗତ ୫୩ ପ୍ରଜାତିର ୨୮୯୩୨ ଥିବାବେଳେ ସ୍ଥାନୀୟ ମଧ୍ୟ ୫୩ ପ୍ରଜାତିର ୯୩୩୯ଟି ପକ୍ଷୀ ଅଛନ୍ତି। ମୋଟ ପକ୍ଷୀସଂଖ୍ୟା ମଧ୍ୟରୁ ନଳବଣରେ କେବଳ ୯୨୪୬ ପକ୍ଷୀ ସମାଗମ ହୋଇଛନ୍ତି। ସର୍ବାଧିକ ସଂଖ୍ୟାରେ ଓପୋନ୍ ବିଲ୍ ଷ୍ଟର୍କ (ଗେଣ୍ଡାଳିଆ) ପ୍ରଜାତି ଥିବାବେଳେ ଦେଶୀୟ ପାଣିକୂଆ ପ୍ରଜାତିର ଅଧିକ ସଂଖ୍ୟାରେ ଦୃଷ୍ଟିଗୋଚର ହୋଇଛି। ଟାଙ୍ଗୀ ରେଞ୍ଜର ଭୂଷଣ୍ଡପୁର ଓ ମଙ୍ଗଳାଯୋଡି ଚିଲିକା ଅଞ୍ଚଳରେ ସର୍ବାଧିକ ବିଦେଶାଗତ ପକ୍ଷୀଙ୍କ ସମାଗମ ହୋଇଛି। ବନ୍ୟପ୍ରାଣୀ ବିଭାଗ ଡିଏଫ୍ଓ ବିକାଶ ରଞ୍ଜନ ଦାସଙ୍କ ତତ୍ତ୍ୱାବଧାନରେ କର୍ମଚାରୀମାନେ ୨୧ ତାରିଖ ଭୋର ୬ଟାରୁ ମଧ୍ୟାହ୍ନ ୧୨ଟା ପର୍ଯ୍ୟନ୍ତ ଗଣନା କାର୍ଯ୍ୟରେ ସାମିଲ ହୋଇଥିଲେ। ପ୍ରତି ଗ୍ରୁପକୁ ଗୋଟିଏ ଲେଖାଏ ଡଙ୍ଗା, ବାଇନାକୁଲାର, ଓ୍ବାକିଟକି, ଜିପିଏସ୍ ଆଦି ଯନ୍ତ୍ରାଂଶ ଯୋଗାଇ ଦିଆଯାଇଥିଲା। ଶୀତଦିନେ ବରଫାବୃତ୍ତ ରାଷ୍ଟ୍ରାଞ୍ଚଳରେ ହିମ ବୃଷ୍ଟି ଯୋଗୁ ଅସହ୍ୟ ଶୀତରୁ ରକ୍ଷା ପାଇବା ଏବଂ ଉପଯୁକ୍ତ ଖାଦ୍ୟ, ବାସସ୍ଥାନ ଅନ୍ବେଷଣରେ ପକ୍ଷୀମାନେ ହଜାର ହଜାର ମାଇଲ୍ ଅତିକ୍ରମ କରି ଚିଲିକାରେ ଅବସ୍ଥାନ କରିଥାନ୍ତି। ମାର୍ଚ୍ଚ ପହିଲା ଆଡ଼କୁ ଗ୍ରୀଷ୍ମ ଅନୁଭୂତ ହେବା ମାତ୍ରେ ଏହି ପକ୍ଷୀମାନେ ପୁନର୍ବାର ନିଜ ଅଞ୍ଚଳକୁ ପ୍ରତ୍ୟାବର୍ତ୍ତନ କରିଥାନ୍ତି। ତେବେ କେତେକ ପ୍ରଜାତିର ପକ୍ଷୀ ସ୍ବବାସସ୍ଥାନକୁ ନ ଫେରି ଚିଲିକାକୁ ଆଦରି ରହିଯାନ୍ତି। ପ୍ରତିବର୍ଷ ମେ’ ମାସରେ ଏହି ପକ୍ଷୀଙ୍କ ପ୍ରଜାତି ଓ ସଂଖ୍ୟା ନିର୍ଦ୍ଧାରଣ ପାଇଁ ବାଲୁଗାଁ ବନ୍ୟପ୍ରାଣୀ ବିଭାଗ ପକ୍ଷରୁ ଗଣନା କରାଯାଇଥାଏ।
୫ବର୍ଷରେ ଗ୍ରୀଷ୍ମକାଳୀନ ପକ୍ଷୀ ସାରଣୀ
ମସିହା ମୋଟ ପକ୍ଷୀ ସଂଖ୍ୟା ପ୍ରଜାତି
୨୦୧୫ ୪୩୫୯୩ ୧୦୮
୨୦୧୬ ୪୩୧୫୬ ୧୨୧
୨୦୧୭ ୪୧୫୬୯ ୧୧୩
୨୦୧୮ ୫୦୫୪୧ ୯୭
୨୦୧୯ ୩୮୨୭୧ ୧୦୬