ବାଲୁଗଁା,୮ା୧୨(ଡି.ଏନ୍.ଏ.): କାଳିଜାଈ ଦର୍ଶନ ସାରି ୮ଜଣ ପର୍ଯ୍ୟଟକଙ୍କୁ ନେଇ ଫେରୁଥିବା ଏକ ଯାତ୍ରୀବାହୀ ଡଙ୍ଗା ଯାନ୍ତ୍ରିକ ତ୍ରୁଟି ଯୋଗୁ ଗୁରୁବାର ଦୀର୍ଘ ସମୟ ଧରି ଚିଲିକାରେ ଫସି ରହିଥିଲା। ଖବରପାଇ ବଡ଼କୂଳ ପାନ୍ଥନିବାସ ପରିଚାଳକ ସବ୍ୟସାଚ୍ଚୀ କର ଅନ୍ୟ ଏକ ବୋଟ୍ରେ ଘଟଣାସ୍ଥଳରେ ପହଞ୍ଚିବା ପରେ ସମସ୍ତ ଯାତ୍ରୀଙ୍କୁ ଉଦ୍ଧାର କରାଯାଇ କୂଳକୁ ଅଣାଯାଇଥିଲା। ସୂଚନା ମୁତାବକ, ବଡ଼କୂଳ ପାନ୍ଥନିବାସ ସ୍ଥିତ ଏକ ଘରୋଇ ଡଙ୍ଗା ପୁରୀ ଓ ବ୍ରହ୍ମପୁର ଅଞ୍ଚଳର ୮ଜଣ ପର୍ଯ୍ୟଟକଙ୍କୁ ନେଇ ଅପରାହ୍ନରେ କାଳିଜାଈ ଦର୍ଶନ ନିମେନ୍ତ ଯାତ୍ରା କରିଥିଲା। ସେଠାରୁ ସନ୍ଧ୍ୟା ୬ଟାରେ ଉକ୍ତ ଡଙ୍ଗା ପର୍ଯ୍ୟଟକମାନଙ୍କୁ ନେଇ ଫେରୁଥିବା ବେଳେ ଚିଲିକାରେ ହଠାତ୍ ଯାନ୍ତ୍ରିକ ତ୍ରୁଟି ଯୋଗୁ ଅଚଳ ହୋଇ ଫସି ରହିଥିଲା। ଫଳରେ ପର୍ଯ୍ୟଟକମାନେ ଭୟଭୀତ ହୋଇପଡ଼ିଥିଲେ। ଘଟଣା ସମ୍ପର୍କରେ ଖବରପାଇ ପାନ୍ଥନିବାସ ପରିଚାଳକ କର ଏକ ଟିମ୍ ସହ ସରକାରୀ ବୋଟ୍ ନେଇ ପହଞ୍ଚିଥିଲେ। ଯାନ୍ତ୍ରିକ ତ୍ରୁଟି ହୋଇଥିବା ଡଙ୍ଗାକୁ ମରାମତି ପରେ ଡଙ୍ଗାଟି ପର୍ଯ୍ୟଟକମାନଙ୍କୁ ଧରି ସୁରକ୍ଷିତ ଭାବେ କୂଳରେ ପହଞ୍ଚିଥିଲା।