କୃଷ୍ଣପ୍ରସାଦ,୨୭ା୫(ଡି.ଏନ୍.ଏ.): ପୁରୀ ଜିଲା କୃଷ୍ଣପ୍ରସାଦ ବ୍ଲକ ନଳବଣ ନିକଟ ଚିଲିକାରେ ମାଛ ଧରୁଥିବା ବେଳେ ଜଣେ ମତ୍ସ୍ୟଜୀବୀଙ୍କ ବୁଧବାର ମୃତ୍ୟୁ ଘଟିଥିବା ଜଣାପଡ଼ିଛି। ମୃତ ଶ୍ୟାମସୁନ୍ଦର ବେହେରାଙ୍କ ଘର କୃଷ୍ଣପ୍ରସାଦ ବ୍ଲକ କୁମାରପୁରରେ। ସେ ଏବଂ ତାଙ୍କ ଭାଇ ରାମହରି ବେହେରା ବୁଧବାର ଭୋର୍ ୪ଟାରୁ ଚିଲିକାକୁ ମାଛ ଧରିବା ପାଇଁ ଯାଇଥିଲେ। ମାଛ ଧରିବା ସମୟରେ ଜୋରରେ ପବନ ପହିବାରୁ ଶ୍ୟାମ ପାଣି ଭିତରେ ପଡ଼ିଯାଇଥିଲେ। ତାଙ୍କ ଭାଇ ଶ୍ୟାମଙ୍କୁ ଉଦ୍ଧାର କରି କୃଷ୍ଣପ୍ରସାଦ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ଆଣିଥିଲେ। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଛନ୍ତି। ତେବେ ଶ୍ୟାମଙ୍କ ୨ଝିଅ, ଗୋଟିଏ ପୁଅ ଏବଂ ସ୍ତ୍ରୀ ଅର୍ଥାଭାବ ଯୋଗୁ ଆନ୍ଧ୍ରପ୍ରଦେଶର ଅମରାବତୀରେ ଏକ ସୂତାକଳରେ କାମ କରିବା ପାଇଁ ଯାଇଛନ୍ତି। ଲକ୍ଡାଉନ୍ ଯୋଗୁ ନିଜ ଗ୍ରାମକୁ ଫେରିବା ପାଇଁ ଆବେଦନ କରିଥିଲେ ମଧ୍ୟ ସେମାନେ ଏଯାଏ ଘରକୁ ଫେରି ପାରିନାହାନ୍ତି। କୃଷ୍ଣପ୍ରସାଦ ପୋଲିସ ଏକ ଅପମୃତ୍ୟୁ ମାମଲା ରୁଜୁ କରିଛି। ତଦନ୍ତ ଆରମ୍ଭ କରି ମୃତଦେହ ବ୍ୟବଚ୍ଛେଦ ପାଇଁ ନିର୍ଦ୍ଦେଶ ଦେଇଛନ୍ତି। ଶ୍ୟାମଙ୍କ ସ୍ତ୍ରୀ, ପୁଅ ଝିଅ ଆନ୍ଧ୍ରପ୍ରଦେଶରେ ଥିବାବେଳେ ଶୁଦ୍ଧିକ୍ରିୟା କିପରି କରାଯିବ ପ୍ରଶ୍ନବାଚୀ ସୃଷ୍ଟି ହୋଇଛି। ତେବେ ମୃତକ ପରିବାରକୁ ସମସ୍ତ ସରକାରୀ ସାହାଯ୍ୟ ଯୋଗାଇ ଦେବା ପାଇଁ ଗ୍ରାମର ଉଦୟନାଥ ବେହେରା ଅନୁରୋଧ କରିଛନ୍ତି ା