ବାଲୁଗାଁ, ୫-୨(ଡି.ଏନ.ଏ.):ଚିଲିକାରେ ଡଙ୍ଗାବୁଡ଼ି ଘଟଣା ପରେ ପ୍ରଶାସନର ଚେତା ପଶିଛି। ଅସୁରକ୍ଷିତ ଭାବେ ଯାତ୍ରୀ ପରିବହନ କରୁଥିବା ମାଛଧରା ଓ ଯାତ୍ରୀବାହୀ ଡଙ୍ଗା ଯାଞ୍ଚ ପାଇଁ ସୋମବାର ଜିଲା ପ୍ରଶାସନ ପକ୍ଷରୁ ଏକ ଟାସ୍କଫୋର୍ସ ଟିମ୍ ଗଠନ କରାଯାଇଛି। ଏହି ଟିମ୍ ମଙ୍ଗଳବାର ଚଢ଼ାଉ ଅଭିଯାନ ଆରମ୍ଭ କରିଛନ୍ତି। ଜିଲା ମତ୍ସ୍ୟ ଅଧିକାରୀ ଜୀବ ଓ ପ୍ରଯୁକ୍ତି, ବାଲୁଗାଁ କ୍ଷେତ୍ରବାସୀ ବେହେରାଙ୍କ ନେତୃତ୍ୱରେ ଗଠିତ ଉକ୍ତ ଟାସ୍କଫୋର୍ସ ଟିମ୍ରେ ଚିଲିକା ତହସିଲ, ସିଡିଏ, ପୋଲିସ୍ ଓ ଏଆରସିଏସ୍ ଫିଶରିର କର୍ମଚାରୀ ସାମିଲ ହୋଇଥିଲେ। ବାଲୁଗାଁ ନିକଟସ୍ଥ ବଡ଼କୁଳ ପାନ୍ଥନିବାସ ଓ ଚନ୍ଦ୍ରାପୁଟ ଜେଟିଠାରେ ୧୪୨ଟି ମାଛଧରା ଡଙ୍ଗାର ପଞ୍ଜୀକରଣ, ନବୀକରଣ, ଫିଟ୍ନେସ୍ ଓ ମାଛଧରା ଲାଇସେନ୍ସ ଆଦି ଯାଞ୍ଚ କରାଯାଇଥିଲା। ଯାଞ୍ଚରେ ସମସ୍ତ ଡଙ୍ଗା ସରକାରୀ ନିୟମ ମୁତାବକ ଠିକ୍ ଥିବା ମତ୍ସ୍ୟ ବିଭାଗୀୟ ଅଧିକାରୀ ବେହେରା ସୂଚନା ଦେଇଛନ୍ତି। ଏହା ବ୍ୟତୀତ ୧୩ଗୋଟି ଡଙ୍ଗାର ମାଲିକ ଯାଞ୍ଚ ସମୟରେ ଅନୁପସ୍ଥିତ ଥିବାବେଳେ ୫ଟି ଲାଇସେନ୍ସ ପ୍ରାପ୍ତ ଡଙ୍ଗା ଭାଙ୍ଗିରୁଜି ପରିତ୍ୟକ୍ତ ଅବସ୍ଥାରେ ପଡ଼ି ରହିଥିଲା। ଉକ୍ତ ୫ଟି ଡଙ୍ଗାର ଲାଇସେନ୍ସ ରଦ୍ଦ କରାଯିବ ବୋଲି ବିଭାଗୀୟ ଅଧିକାରୀ କହିଛନ୍ତି।
ପ୍ରକାଶଥାଉ କି, ଡଙ୍ଗା ଯାଞ୍ଚ କାର୍ଯ୍ୟ ପୂର୍ବରୁ ପ୍ରଶାସନିକ ଅଧିକାରୀ ଓ ମତ୍ସ୍ୟଜୀବୀଙ୍କ ମଧ୍ୟରେ ମାଛଧରା ଡଙ୍ଗାର ଯାତ୍ରୀ ପରିବହନ ନେଇ ଏକ ଅପ୍ରୀତିକର ପରିସ୍ଥିତି ସୃଷ୍ଟି ହୋଇଥିଲା। ରବିବାର ଡଙ୍ଗାବୁଡ଼ି ଘଟଣା ଆଖିରୁ ନ ଲିଭୁଣୁ ମଙ୍ଗଳବାର ପୁନର୍ବାର ଚନ୍ଦ୍ରାପୁଟ ଗ୍ରାମର କିଛି ପରିବାର ଛୋଟ ଛୋଟ ପିଲାଙ୍କୁ ନେଇ ମାଛଧରା ଡଙ୍ଗାରେ ମା’ କାଳିଜାଈଙ୍କ ପୀଠକୁ ଭୋଜି କରିବା ପାଇଁ ବାହାରିଥିଲେ। ଟାସ୍କଫୋର୍ସ ପହଞ୍ଚତ୍ ଡଙ୍ଗା ମାଲିକ ଓ ଯାତ୍ରୀଙ୍କୁ ଉକ୍ତ ଡଙ୍ଗାରେ ଯାତ୍ରା ନ କରିବା ପାଇଁ ବାରଣ କରିଥିଲେ। ମାତ୍ର ତାହା ତାଙ୍କ ନିଜସ୍ବ ଡଙ୍ଗା ଏବଂ ପ୍ରତିବର୍ଷ ସେମାନେ ଏପରି ଯାଉଥିବା କହି ଯୁକ୍ତି କରିଥିଲେ। ଦୀର୍ଘ ୧ ଘଣ୍ଟା ଧରି ପ୍ରଶାସନ ଓ ମତ୍ସ୍ୟଜୀବୀ ଯାତ୍ରୀଙ୍କ ମଧ୍ୟରେ ବଚସା ହୋଇଥିଲା। ପରେ ଯାତ୍ରୀବାହୀ ଡଙ୍ଗାରେ ସେମାନଙ୍କୁ ବୁଝାଶୁଝା କରି କାଳିଜାଈଙ୍କ ପୀଠକୁ ପଠାଇବାରେ ପ୍ରଶାସନ ସକ୍ଷମ ହୋଇଥିଲା।
