ନୂଆଦିଲ୍ଲୀ: ଚାଇନାର ଉହାନ ସହରରୁ ଆରମ୍ଭ ହୋଇଥିବା ମହାମାରୀ କରୋନା ଭୂତାଣୁ ଆଜି ସମଗ୍ର ବିଶ୍ୱକୁ ଗ୍ରାସ କରିସାରିଲାଣି। ଏଥିରେ ଲକ୍ଷାଧିକ ଲୋକ ଆକ୍ରାନ୍ତ ହୋଇଥିବା ବେଳେ ହଜାର ହଜାର ଲୋକଙ୍କ ଜୀବନ ମଧ୍ୟ ଯାଇସାରିଲାଣି। ଏହାର ସଠିକ୍ କାରଣ ଆଜି ପର୍ଯ୍ୟନ୍ତ ଜଣାପଡ଼ି ନ ଥିଲେ ମଧ୍ୟ ପଶୁପକ୍ଷୀଙ୍କ ଯୋଗୁ ଏହା ବ୍ୟାପୁଛି ବୋଲି କୁହାଯାଉଛି। ଏତେ ଅବସ୍ଥା ପରେ ମଧ୍ୟ ଚାଇନା ଚେତୁନି।
ଏକ ରିପୋର୍ଟ ଅନୁଯାୟୀ, ଏବେ ପଶୁପକ୍ଷୀଙ୍କ ଅନ୍ତ ଏବଂ ସିଙ୍ଘରୁ ଦେଶୀ ଔଷଧ ପ୍ରସ୍ତୁତ କରିବାରେ ଲାଗିଛି ଚାଇନା। ଏଥିରେ କରୋନା ଆକ୍ରାନ୍ତ ଭଲ ହୋଇପାରିବେ ବୋଲି ଚାଇନା କହୁଛି। ଦେଶର ରାଷ୍ଟ୍ରୀୟ ସ୍ବାସ୍ଥ୍ୟ ଆୟୋଗ କରୋନା ଭୂତାଣୁର ଉପଚାର ବିଷୟରେ କହିଛି। ଏଥିରେ ଏକ ଦେଶୀ ମେଡିସିନ ରହିଛି। ଯାହାକୁ ତିଆରି କରିବାରେ ଜଙ୍ଗଲୀ ଭାଲୁର ଗଲବ୍ଲାଡର (ଯେଉଁଥିରୁ ତରଳ ପାଚକ ପଦାର୍ଥ) ମିଳିଥାଏ। ଛେଳିର ସିଙ୍ଘ ଏବଂ ତିନି ପ୍ରକାର ଚାରାର ବ୍ୟବହାର କରାଯାଇଛି। କିନ୍ତୁ ଏହାକୁ ଚାଇନାର ପ୍ରାଣୀ ବିଶେଷଜ୍ଞ ବିରୋଧ କରିଛନ୍ତି। ୩ ମାସ ତଳେ ଆରମ୍ଭ ହୋଇଥିବା କରୋନା ଭୂତାଣୁରେ ବର୍ତ୍ତମାନ ପର୍ଯ୍ୟନ୍ତ ୨୩୦୦୦ରୁ ଊର୍ଦ୍ଧ୍ୱ ଲୋକଙ୍କ ମୃତ୍ୟୁ ଘଟିସାରିଛି। ଏଥିରେ ୫ ଲକ୍ଷରୁ ଅଧିକ ଲୋକ ପ୍ରଭାବିତ ମଧ୍ୟ ହୋଇଛନ୍ତି।
କରୋନା ଭାଇରସ୍ ବାଦୁଡ଼ି, ସାପ କିମ୍ବା ଅନ୍ୟ କୌଣସି ଜୀବଜନ୍ତୁଙ୍କଠାରୁ ଉତ୍ପନ୍ନ ହୋଇଥାଇପାରେ ବୋଲି ବୈଜ୍ଞାନିକମାନେ ଆଶଙ୍କା କରୁଛନ୍ତି। ଚାଇନାର ସ୍ବାସ୍ଥ୍ୟ ଅଧିକାରୀମାନେ ମଧ୍ୟ ଅନୁରୂପ କଥା କହିସାରିଛନ୍ତି। ତଥାପି ପଶୁପକ୍ଷୀଙ୍କ ଜୀବନ ସହିତ ଖେଳୁଛି ଚାଇନା। ଯାହାକୁ ପରିବେଶବିତ୍ମାନେ ଘୋର ବିରୋଧ କରିବା ସହ ଏହା ଅନୈତିକ କାର୍ଯ୍ୟ ବୋଲି କହିଛନ୍ତି।