ପୁରୀ ଅଫିସ,୨୬ା୩: ତୀର୍ଥ କରିବାକୁ ଯାଇଥିବା ପୁରୀର ୧୮ଜଣ ଚେନ୍ନାଇରେ ଅଟକି ରହିଛନ୍ତି। ଏବେ ଟ୍ରେନ୍ ଏବଂ ବିମାନ ସେବା ବନ୍ଦ ହୋଇଯାଇଥିବାରୁ ସେମାନେ ଓଡ଼ିଶା ଫେରି ପାରୁନାହାନ୍ତି। ବହୁତ ହଇରାଣରେ ରହୁଥିବାବେଳେ ଉଦ୍ଧାର ପାଇଁ ଏକ ଭିଡିିଓ ମାଧ୍ୟମରେ ରାଜ୍ୟ ସରକାରଙ୍କୁ ନିବେଦନ କରିଛନ୍ତି। ଏ ନେଇ ପୁରୀ ବିଧାୟକ ଜୟନ୍ତ ଷଡ଼ଙ୍ଗୀ ଜିଲା ପ୍ରଶାସନକୁ ମଧ୍ୟ ଜଣାଇଛନ୍ତି।
ସୂଚନା ମୁତାବକ, ପୁରୀର ବିଭିନ୍ନ ସ୍ଥାନରୁ ୧୮ଜଣ ତୀର୍ଥଯାତ୍ରୀ ଗତ ୧୧ତାରିଖରେ ବିଭିନ୍ନ ତୀର୍ଥସ୍ଥଳ ଭ୍ରମଣରେ ଯାଇଥିଲେ। ଗତ ୨୧ ତାରିଖରେ ରାମେଶ୍ୱରମ୍ରେ ପହଞ୍ଚିଥିଲେ। ୨୨ ତାରିଖ ଜନତା କର୍ଫ୍ୟୁ ଯୋଗୁ ସେଠାରେ ରହିଥିଲେ। ଏହାପରେ ସମସ୍ତ ଟ୍ରେନ୍ ବାତିଲ ହୋଇଥିଲା। ସେମାନେ ସେହିଠାରୁ ବିମାନ ଟିକେଟ କରିଥିଲେ। ଚେନ୍ନାଇ ବିମାନ ବନ୍ଦରରେ ପହଞ୍ଚି ଭୁବନେଶ୍ୱର ଆସିବେ ବୋଲି ଯୋଜନା କରିଥିଲେ। ରାମେଶ୍ୱରମ୍ରୁ ଚେନ୍ନାଇରେ ପହଞ୍ଚିବା ପରେ ହଠାତ୍ ବିମାନ ଚଳାଚଳ ବନ୍ଦ ହୋଇଯାଇଥିଲା। ଏବେ ସେମାନେ ଚେନ୍ନାଇର ଗୀତା ଭବନରେ ରହିଛନ୍ତି। ଓଡ଼ିଶା ଫେରିବାକୁ ଚାହୁଁଥିଲେ ମଧ୍ୟ ଆସିପାରୁନାହାନ୍ତି। ତେଣୁ ରାଜ୍ୟ ସରକାର ସେମାନଙ୍କୁ ସହଯୋଗ କରିବା ପାଇଁ ଅନୁରୋଧ କରିଛନ୍ତି।