ପାଟପୁର,୨୫ା୩-ଗଞ୍ଜାମ ଜିଲା ସାନଖେମୁଣ୍ଡି ବ୍ଲକ ୬ ଗ୍ରାମାଞ୍ଚଳର ପ୍ରାୟ ୧ ହାଜରରୁ ଊର୍ଦ୍ଧ୍ୱ ଶ୍ରମିକ ଚେନ୍ନାଇର ଗିନ୍ଧି ଅଞ୍ଚଳରେ ଫସି ରହିଛନ୍ତି। ପ୍ରଶାସନସ୍ତରରେ ଉଦ୍ୟମ କରାଯାଇ ସେମାନଙ୍କୁ ଘରକୁ ଫେରାଇ ଆଣିବାକୁ ପରିବାର ପକ୍ଷରୁ ନିବେଦନ କରାଯାଇଛି। ପ୍ରାୟ ୬ ମାସ ତଳେ ଉପରୋକ୍ତ ଗ୍ରାମଗୁଡିକର ୧ ହଜାରରୁ ଊର୍ଦ୍ଧ୍ୱ ଶ୍ରମିକ ଦାଦନ ଖଟିବାକୁ ଯାଇଥିଲେ। ଫେରିବାକୁ ଉଦ୍ୟମ କଲେ ମଧ୍ୟ ସେମାନେ ଜନତା କର୍ଫ୍ୟୁ ଓ ବର୍ତ୍ତମାନ ଦେଶରେ ହୋଇଥିବା ଲକ୍ଡାଉନ ଯୋଗୁ ଫେରିପାରୁ ନାହାନ୍ତି। ସେଠାରେ ପ୍ରାୟ ୩ ଦିନ ହେଲା ଭୋକ ଉପାସରେ ରହିଛନ୍ତି ବୋଲି ସେମାନେ ପରିବାର ଲୋକଙ୍କୁ ଜଣାଇଛନ୍ତି। ସେଠାକାର ପ୍ରଶାସନ କୌଣସି ପ୍ରକାର ସାହାଯ୍ୟ ସହଯୋଗ କରୁ ନ ଥିବା ସେମାନେ କହିଛନ୍ତି। ଗଞ୍ଜାମ ଜିଲା ପ୍ରଶାସନ ଏ ଦିଗରେ ଦୃଷ୍ଟି ଦେବାକୁ ଫସି ରହିଥିବା ଶ୍ରମିକଙ୍କ ପରିବାର ଲୋକେ କହିଛନ୍ତି।