ଠାକୁରମୁଣ୍ଡା,୧୧ା୧୧(ଡି.ଏନ୍.ଏ.)- ଠାକୁରମୁଣ୍ଡା ବନ ବିଭାଗ ଶନିବାର ବିଳମ୍ବିତ ରାତିରେ ଭଦ୍ରକ ଅଞ୍ଚଳକୁ ଯାଉଥିବା ଏକ ଚୋରା କାଠ ବୋଝେଇ ପିକ୍ଅପ୍ ଭ୍ୟାନ୍ ସହିତ ଏକ ବାଇକ୍କୁ ଜବତ କରିଛି। ଘଟଣାରେ ସମ୍ପୃକ୍ତ ୫ ଅଭିଯୁକ୍ତଙ୍କୁ ଗିରଫ ପରେ କୋର୍ଟ ଚାଲାଣ କରାଯାଇଛି।
ସୂଚନା ଅନୁଯାୟୀ, କୌଣସି ସୂତ୍ରରୁ ଖବର ପାଇ ଠାକୁରମୁଣ୍ଡା ବନ କର୍ମଚାରୀମାନେ ବିଳମ୍ବିତ ରାତିରେ ଠାକୁରମୁଣ୍ଡା-କରଞ୍ଜିଆ ରାସ୍ତାର କେନ୍ଦୁଜିଆଣି ନିକଟରେ ଜଗି ରହିଥିଲେ। ଛେରାଟାଙ୍ଗର ଗ୍ରାମରୁ ଏକ ପିକ୍ଅପ ଭ୍ୟାନ୍ (ନଂ. ଓଆର ୦୧ଏମ- ୬୩୧୮)ରେ ୩୫ଖଣ୍ଡ ଶାଳପଟା ବୋଝେଇ ହୋଇ ଆସୁଥିବା ବେଳେ ବନ କର୍ମଚାରୀ ଗାଡିକୁ ଅଟକାଇଥିଲେ। ଏହି ଚୋରା କାଠ ଗାଡ଼ିକୁ ସୁରକ୍ଷା ଦେଉଥିବା ସନ୍ଦେହରେ ମଧ୍ୟ ଏକ ବାଇକ୍କୁ ଜବତ କରାଯାଇଛି। ଘଟଣାରେ ସମ୍ପୃକ୍ତ ଥିବା ଅଭିଯୋଗରେ ଭଦ୍ରକ ଥାନା ଅନ୍ତର୍ଗତ ବନ୍ତ ଗ୍ରାମର ପ୍ରଶାନ୍ତ କୁମାର ଜେନା, ଓଗରପୋଡା ଗ୍ରାମର ମନୋରଞ୍ଜନ ସାହୁ, ଠାକୁରମୁଣ୍ଡା ଥାନା ଅନ୍ତର୍ଗତ ସାରୁବିଲ ଗ୍ରାମର ଜଗନ୍ନାଥ ବେହେରା, ବୀରେନ୍ଦ୍ର ପଇଦା ଓ ରବି ବେହେରାଙ୍କୁ ଗିରଫ କରାଯାଇଛି। ରେଞ୍ଜ୍ ଅଧିକାରୀ ପ୍ରଭାତ କୁମାର କୁଅଁର, ଫରେଷ୍ଟର ତପନ କୁମାର ମହାନ୍ତ, ଭାସ୍କର ଘଣା, ଠାକୁର ଦାସ ହେମ୍ବ୍ରମ, ଫରେଷ୍ଟଗାର୍ଡ ଭବାନୀ ବେହେରା, ସୁଚିତ୍ର ନନ୍ଦ ବେହେରା, ଗୌତମ ମହାନ୍ତ ପ୍ରମୁଖ ଚଢ଼ାଉରେ ସାମିଲ ଥିଲେ। ଉଲ୍ଲେଖଯୋଗ୍ୟ ଯେ, ଗତ ଜୁଲାଇ ୩୧ ତାରିଖରେ କେନ୍ଦୁଜିଆଣି ଅଞ୍ଚଳରୁ ଭଦ୍ରକ ନିକଟ ଅଗରପଡ଼ାକୁ ଯାଉଥିବା ୨ଟି ଚୋରାକାଠ ବୋଝେଇ ଗାଡ଼ି ଜବତ ସହ ୫ ଅଭିଯୁକ୍ତଙ୍କୁ ପୋଲିସ ଧରି ବନ ବିଭାଗକୁ ହସ୍ତାନ୍ତର କରିଥିଲା।