ଓ୍ବାଶିଂଟନ,୩୦ା୧୦: ସିରିଆରେ ଦୁର୍ଦ୍ଧର୍ଷ ଆତଙ୍କବାଦୀ ସଙ୍ଗଠନ ଇସ୍ଲାମିକ୍ ଷ୍ଟେଟ୍ (ଆଇଏସ୍) ମୁଖ୍ୟ ଅବୁ ବକର ଅଲ୍-ବାଗ୍ଦାଦି ଆମେରିକା ସ୍ବତନ୍ତ୍ର ବଳର ଅପରେଶନରେ ନିହତ ହେବା ପରେ ଅନେକ ଚୋରକ ତଥ୍ୟ ସାମ୍ନାକୁ ଆସିବାରେ ଲାଗିଛି। ବାଗ୍ଦାଦିଙ୍କ ପରିଚୟ ସ୍ପଷ୍ଟକରିବା ପାଇଁ ଯେଉଁ ଡିଏନ୍ଏ ପରୀକ୍ଷା କରାଯାଇଥିଲା ସେଥିରେ ତାଙ୍କର ଚୋରି ଅନ୍ତର୍ବସ୍ତ୍ର ବ୍ୟବହାର ହୋଇଥିଲା। କୁର୍ଦ୍ଦିଶ୍ ନେତୃତ୍ୱାଧୀନ ସିରିଆ ଡେମୋକ୍ରାଟିକ୍ ଫୋର୍ସେସ୍ (ଏସ୍ଡିଏଫ୍) ପକ୍ଷରୁ ମଙ୍ଗଳବାର ଏହା ପ୍ରଘଟ କରାଯାଇଛି।
ଏସ୍ଡିଏଫ୍ କମାଣ୍ଡର ପୋଲାଟ୍ କ୍ୟାନ୍ କହିଛନ୍ତି, ଆମେରିକା ସ୍ବତନ୍ତ୍ର ବଳର ଅପରେଶନ ପୂର୍ବରୁ ସିରିଆରେ ବାଗ୍ଦାଦିଙ୍କ ଅବସ୍ଥିତି ଠାବ କରିବା ଲାଗି ସେମାନଙ୍କ ସୂତ୍ର ଗୁରୁତ୍ୱପୂର୍ଣ୍ଣ ଥିଲା। ବାଗ୍ଦାଦି ଜୀବିତ ଥିବାବେଳେ ଏସ୍ଡିଏଫ୍ର ଜଣେ ଗୁପ୍ତଚର ତାଙ୍କର ଅଣ୍ଡରଓ୍ବେର୍କୁ ଚୋରିକରି ଆଣିଥିଲେ। ଉକ୍ତ ଅନ୍ତର୍ବସ୍ତ୍ରକୁ ନେଇ ତାଙ୍କର ଡିଏନ୍ଏ ପରୀକ୍ଷା କରାଯାଇଥିଲା। ନିହତ ବ୍ୟକ୍ତି ବାଗ୍ଦାଦି ବୋଲି ଅନ୍ତର୍ବସ୍ତ୍ର ଓ ଖଣ୍ଡବିଖଣ୍ଡିତ ମୃତଦେହ ମେଳ କରିବା ପରେ ଡିଏନ୍ଏ ଯାଞ୍ଚରୁ ସ୍ପଷ୍ଟ ହୋଇଥିଲା। ବାଗ୍ଦାଦିଙ୍କୁ ଧରିବା ଲାଗି ଏସ୍ଡିଏଫ୍ ମେ ୧୫ରୁ ଆମେରିକାର କେନ୍ଦ୍ରୀୟ ଗୋଇନ୍ଦା ସଂସ୍ଥା ସିଆଇଏ ସହ ମିଶି ସହଯୋଗୀ ଭାବେ କାର୍ଯ୍ୟ କରୁଥିଲା। ସେ ଇଡ୍ଲିବ୍ ପ୍ରଦେଶରେ ଲୁଚିଥିବା ଏସ୍ଡିଏଫ୍ ସୂଚନା ପାଇଥିଲା। ବାଗ୍ଦାଦି ଜୋରାବ୍ଲୁସ୍ର ଏକ ନୂଆ ସ୍ଥାନକୁ ଯିବା ପାଇଁ ବାହାରିଥିଲେ। କିନ୍ତୁ ଏହା ପୂର୍ବରୁ ତାଙ୍କୁ ନିପାତ କରାଯାଇଥିଲା ବୋଲି ସେ କହିଛନ୍ତି।
ଅନ୍ୟପକ୍ଷରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ କୁର୍ଦ୍ଦିଶ ବଳର ଭୂମିକାକୁ ନୂ୍ୟନ କରିଦେଇଛନ୍ତି। ଗତ ୨୭ ତାରିଖରେ ବାଗ୍ଦାଦିଙ୍କ ମୃତ୍ୟୁ ସମ୍ପର୍କରେ ଘୋଷଣା କରି ଟ୍ରମ୍ପ୍ କହିଥିଲେ, କୁର୍ଦ୍ଦମାନେ ‘ସହାୟକ ହେବା ଭଳି’ ସୂଚନା ପ୍ରଦାନ କରିଥିଲେ। କିନ୍ତୁ ସାମରିକ କାର୍ଯ୍ୟାନୁଷ୍ଠାନରେ ସେମାନଙ୍କ କିଛି ଭୂମିକା ନ ଥିଲା। ପ୍ରକାଶ ଯେ, କିଛିଦିନ ତଳେ ଟ୍ରମ୍ପ୍ ଉତ୍ତର ସିରିଆରୁ ଆମେରିକୀୟ ସୈନ୍ୟଙ୍କୁ ପ୍ରତ୍ୟାହାର କରିଥିଲେ। ଆମେରିକାର ଏହି ପଦକ୍ଷେପ ସମ୍ପୃକ୍ତ ଅଞ୍ଚଳରେ ସୀମାପାର ଆକ୍ରମଣ ପାଇଁ ତୁର୍କୀକୁ ସବୁଜ ସଙ୍କେତ ଦେଇଥିଲା ବୋଲି ବିଶ୍ଳେଷକମାନେ ମତବ୍ୟକ୍ତ କରିଛନ୍ତି।
ଉତ୍ତରାଧିକାରୀ ନିହତ
ସିରିଆରେ ଆମେରିକାର ସାମରିକ କାର୍ଯ୍ୟାନୁଷ୍ଠାନ ବେଳେ ନିହତ ହୋଇଥିବା ଇସ୍ଲାମିକ୍ ଷ୍ଟେଟ୍ (ଆଇଏସ୍) ମୁଖ୍ୟ ଅବୁ ବକର ଅଲ୍ ବାଗ୍ଦାଦିଙ୍କ ଉତ୍ତରାଧିକାରୀଙ୍କ ମୃତ୍ୟୁ ଘଟିଛି। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ ରବିବାର ୪୮ ବର୍ଷୀୟ ବାଗ୍ଦାଦିଙ୍କ ମୃତ୍ୟୁ ନେଇ ସ୍ପଷ୍ଟ କରିଥିବାବେଳେ ମଙ୍ଗଳବାର ତାଙ୍କ ଉତ୍ତରାଧିକାରୀଙ୍କ ସମ୍ପର୍କରେ ଏହି ପ୍ରଘଟ କରିଛନ୍ତି।
ସ୍ବତନ୍ତ୍ର ବଳର ଅପରେଶନ ବେଳେ ସୁଡ଼ଙ୍ଗ ଭିତରେ କୁକୁରମାନେ ବାଗ୍ଦାଦିଙ୍କୁ ଗୋଡ଼ାଇଥିଲେ। ମୃତ୍ୟୁ ସୁନିଶ୍ଚିତ ଜାଣି ବାଗ୍ଦାଦି ନିଜକୁ ଆମତ୍ଘାତୀ ବିସ୍ଫୋରଣରେ ଉଡ଼ାଇ ଦେଇଥିଲେ। ତାଙ୍କର ୧ ନମ୍ବର ଉତ୍ତରାଧିକାରୀ ମଧ୍ୟ ଆମେରିକା ସୈନ୍ୟଙ୍କ କାର୍ଯ୍ୟାନୁଷ୍ଠାନରେ ନିହତ ହୋଇଥିବା ଟ୍ରମ୍ପ୍ ଟୁଇଟ୍ କରିଛନ୍ତି। ବାଗ୍ଦାଦି ଆନୁଷ୍ଠାନିକ ଭାବେ ଉକ୍ତ ଉତ୍ତରାଧିକାରୀଙ୍କ ନାମ ଘୋଷଣା କରି ନ ଥିଲେ। ତେବେ ତାଙ୍କ ମୃତ୍ୟୁ ପରେ ଉତ୍ତରାଧିକାରୀ ଭାବେ ଅନେକ ନାମକୁ ନେଇ କଳ୍ପନାଜଳ୍ପନା ପ୍ରକାଶ ପାଉଥିବାବେଳେ ଟ୍ରମ୍ପ୍ ଏଭଳି ଟୁଇଟ୍ କରିଛନ୍ତି। ଟ୍ରମ୍ପ୍ ଏଥିରେ କୌଣସି ବ୍ୟକ୍ତି ବା ଆତଙ୍କବାଦୀଙ୍କ ନାମ ଓ କେଉଁ ଅପରେଶନରେ ସେ ନିହତ ହୋଇଛନ୍ତି ସେନେଇ କିଛି କହିନାହାନ୍ତି। ତେବେ ଉତ୍ତରାଧିକାରୀ ଜଣକ ଅବୁ ହାସନ ଅଲ୍ ମୁଜାହିର ହୋଇଥାଇପାରନ୍ତି ବୋଲି କେତେକ ଗଣମାଧ୍ୟମରେ ରିପୋର୍ଟ ପ୍ରକାଶ ପାଇଛି।