ଚିତ୍ରଡ଼ା,୨୦।୬: ମୟୂରଭଞ୍ଜ ଜିଲା ମୋରଡ଼ା ଥାନା ଭୋଳାଗଡ଼ିଆ ଆଶ୍ରମ ସ୍କୁଲକୁ ଚୋରି କରିବାକୁ ଯାଇ ନିସ୍ତୁକ ମାଡ଼ ଖାଇଛନ୍ତି ୪ ଯୁବକ। ପରେ ସେମାନଙ୍କୁ ପୋଲିସକୁ ହସ୍ତାନ୍ତର କରାଯାଇଛି। ସେମାନଙ୍କ ମଧ୍ୟରୁ ଜଣେ ନାବାଳକ ରହିଥିବା ବେଳେ ୩ ଜଣ ହେଲେ ସାକିଲା ମଲ୍ଲିକ (୩୧), ସପନ ନାଏକ (୩୦),ରାଜା ମଲ୍ଲିକ (୨୫)। ସୂଚନାନୁଯାୟୀ, ଗୁରୁବାର ବିଳମ୍ବିତ ରାତ୍ରିରେ ମୋରଡ଼ା ଥାନା ଟିଆଁସୀ ଗ୍ରାମର ୪ ଯୁବକ ଚୋରି କରିବାକୁ ଆଶ୍ରମ ସ୍କୁଲ ଭିତରକୁ ପଶିଥିବା ବେଳେ ଗ୍ରାମବାସୀ ଜାଣିପାରିଥିଲେ। ପରେ ଚୋରକୁ ଧରିବାରେ ସଫଳ ହୋଇଥିଲେ। ତେବେ ଗ୍ରାମବାସୀ ଓ ଚୋର ମଧ୍ୟରେ କିଛି ସମୟଧରି ଲଢେଇ ଚାଲିଥିଲା। ପରେ ସେମାନଙ୍କୁ ଉତ୍ତମ ମଧ୍ୟମ ଦେବା ପରେ ପୋଲିସକୁ ହସ୍ତାନ୍ତର କରାଯାଇଛି। ମୋରଡ଼ା ପୋଲିସ ଘଟଣାସ୍ଥଳରେ ପହଞ୍ଚି ୪ ଜଣଙ୍କୁ ଅଟକ ରଖି ତଦନ୍ତ ଆରମ୍ଭ କରିବା ସହିତ ୮୭/୨୦ରେ ଏକ ମାମଲା ରୁଜୁ କରିଥିବା ଜଣାପଡ଼ିଛି। ଏମାନଙ୍କ ମଧ୍ୟରୁ ସାକିଲା ଏବଂ ରାଜା ନାମରେ ଆଗରୁ ଏକାଧିକ ମାମଲା ରହିଥିବା ପୋଲିସ ସୂତ୍ରରୁ ଜଣାପଡ଼ିଛି। ୪ ଜଣଙ୍କ ମଧ୍ୟରୁ ଗ୍ରାମବାସୀଙ୍କ ମାଡ଼ରେ ରାଜା ଗୁରୁତର ହୋଇଥିବା ବେଳେ ପୋଲିସ ତାଙ୍କୁ ଚିକିତ୍ସା ପାଇଁ ଡାକ୍ତରଖାନାରେ ଭର୍ତ୍ତି କରିଛି। ତେବେ ସାକିଲା ଓ ସପନକୁ ଶନିବାର କୋର୍ଟ ଚାଲାଣ କରାଯାଇଥିବା ନାବାଳକଙ୍କୁ ବାଳସୁଧାର ଗୃହକୁ ପଠାଯିବ ବୋଲି ଆଇଆଇସି କୁନି ବେଶ୍ରା କହିଛନ୍ତି।
