ନୂଆଦିଲ୍ଲୀ,୮-୭: ଦାମୀ ସ୍ମାର୍ଟଫୋନ୍ ହଜିଯିବା ଅଥବା ଚୋରି ହୋଇଯିବା କ୍ଷେତ୍ରରେ ଏହାର ମାଲିକଙ୍କୁ ଆଣିଦେଇଥାଏ ଅନେକ ଦୁଃଖ। ଏଥିପାଇଁ ସେ ପୋଲିସର ଦ୍ୱାରସ୍ଥ ହୋଇ ଅନେକ ସମୟରେ ନିରାଶ ହୋଇଥିବାର ଦେଖାଯାଇଛି। ତେବେ ଏଥିଲାଗି ଏବେ କେନ୍ଦ୍ର ସରକାର ସହାୟତାର ହାତ ବଢ଼ାଇବାକୁ ଯାଉଛନ୍ତି। ହଜି ଯାଇଥିବା ଅଥବା ଚୋରି ହୋଇଥିବା ମୋବାଇଲକୁ ଟ୍ରାକ୍ କରିବା ଲାଗି ସରକାର ଆସନ୍ତା ମାସରୁ ଏକ ମୋବାଇଲ ଟ୍ରାକର ବ୍ୟବସ୍ଥା ଆପଣାଇବାକୁ ଯାଉଛନ୍ତି। ସିମ୍ କାର୍ଡ ବାହାର କରାଯାଇଥିଲେ ଏବଂ ଆଇଏମ୍ଇଆଇ ନମ୍ବର ବଦଳା ଯାଇଥିଲେ ମଧ୍ୟ ଏହି ଟ୍ରାକର ବ୍ୟବସ୍ଥାରେ ଚୋରି ହୋଇଥିବା ଅଥବା ହଜିଯାଇଥିବା ମୋବାଇଲକୁ ଖୋଜି ବାହାର କରିହେବ। ସେଣ୍ଟର ଫ୍ର ଡେଭଲପ୍ମେଣ୍ଟ ଅଫ୍ ଟେଲିମ୍ୟାଟିକ୍ସ(ସି-ଡିଓଟି) ପକ୍ଷରୁ ଏହି ଟେକ୍ନୋଲୋଜି ପ୍ରସ୍ତୁତ କରାଯାଇଛି। ପାର୍ଲାମେଣ୍ଟର ବଜେଟ ଅଧିବେଶନ ଶେଷ ହେବା ପରେ ଏହି ବ୍ୟବସ୍ଥାକୁ ଲାଗୁ କରିବା ଲାଗି ଟେଲିକମ୍ ମନ୍ତ୍ରୀଙ୍କୁ ଅନୁରୋଧ କରାଯିବ। ଆସନ୍ତା ମାସରେ ଏହା ସାରା ଦେଶରେ ଲଞ୍ଚ ହୋଇଯିବ ବୋଲି ଡିଓଟିର ଜଣେ ବରିଷ୍ଠ ଅଧିକାରୀ ପ୍ରକାଶ କରିଛନ୍ତି। ପାର୍ଲାମେଣ୍ଟର ବଜେଟ ଅଧିବେଶନ ଚଳିତମାସ ୨୬ରେ ଶେଷ ହେବ। ମୋବାଇଲ ଫୋନ ଟ୍ରାକିଙ୍ଗ ଲାଗି ଟେଲିକମ ବିଭାଗ ପକ୍ଷରୁ ସେଣ୍ଟ୍ରାଲ ଇକ୍ୟୁପମେଣ୍ଟ ଆଇଡେଣ୍ଟିଟି ରେଜିଷ୍ଟର ପ୍ରକଳ୍ପ ଆରମ୍ଭ ପାଇଁ ନିର୍ଦ୍ଦେଶ ଦିଆଯାଇଥିଲା। କେନ୍ଦ୍ର ସରକାର ଏଥିପାଇଁ ୧୫ କୋଟି ଟଙ୍କା ବ୍ୟୟବରାଦ କରିଥିଲେ। ଏହି ବ୍ୟବସ୍ଥା ଆପଣାଯିବା ପରେ ନକଲି ହ୍ୟାଣ୍ଡସେଟ୍ ଓ ଚୋରିକୁ ବହୁଳାଂଶେ ରୋକାଯାଇପାରିବ ବୋଲି କୁହାଯାଇଛି।