ଚୌଦ୍ୱାର,୨ା୫(ଡି.ଏନ୍.ଏ.): କଟକ ଜିଲା ଚୌଦ୍ୱାର ଥାନା ଅଞ୍ଚଳରେ ବେଆଇନ ମଦ ବିକ୍ରୀ ହେଉଥିବା ନେଇ ଅଭିଯୋଗ ହେବା ପରେ ଅବକାରୀ ବିଭାଗ ଚୌଦ୍ୱାର ଶାଖା ତରଫରୁ ଚୌଦ୍ୱାର ସହର ଓ ଗ୍ରାମାଞ୍ଚଳରେ ଚଢାଉ କରାଯାଇଛି। ଏଥିରେ ୨ଜଣ ଦେଶୀ ମଦ ବିକ୍ରେତାଙ୍କୁ ଗିରଫ କରାଯାଇଛି। ସେମାନେ ହେଲେ ଚୌଦ୍ୱାର ପୌରପାଳିକାର ଶଙ୍କର ସେଠୀ ଓ ବଡସାମନ୍ତରାପୁର ଗ୍ରାମର ଅନନ୍ତ ଖଟୁଆ। ସେମାନଙ୍କଠାରୁ ୨୦ଲିଟର ଦେଶୀ ମଦ ଜବତ କରାଯାଇଥିବା ବେଳେ ଉଭୟଙ୍କୁ ୪/୨୦ ଓ ୫/୨୦ରେ ମାମଲା ରୁଜୁ କରି କୋର୍ଟ ଚାଲାଣ କରାଯାଇଛି।
ସୂଚନାଯୋଗ୍ୟ, ଲକ୍ଡାଉନ୍ ଚାଲିଥିବାବେଳେ ବିଦେଶୀ ମଦ କାଉଣ୍ଟରକୁ ସିଲ୍ କରି ଦିଆଯାଇଥିଲା। ଫଳରେ ନିକଟସ୍ଥ ଆଠଗଡ, ଖୁଣ୍ଟୁଣୀ ଓ ଢେଙ୍କାନାଳ ଜିଲା ଅଞ୍ଚଳରୁ ଚେରାରେ ମଦ ଆସି ଚୌଦ୍ୱାର ସହରରେ ଚୋରା ଦେଶୀ ମଦର ବ୍ୟାପକ କାରବାର ବଢିଯାଇଥିଲା। ଏନେଇ ସ୍ଥାନୀୟ ଅଞ୍ଚଳବାସୀଙ୍କ ତରଫରୁ ଅଭିଯୋଗ ହୋଇଆସୁଥିଲା। ଅଗାମୀ ଦିନରେ ଚୌଦ୍ୱାର ଓ ଆଖପାଖ ପଞ୍ଚାୟତରେ ଚଢାଉ ଜୋରଦାର କରାଯିବ ବୋଲି ଚୌଦ୍ୱାର ଅବକାରୀ ବିଭାଗ ଭାରପ୍ରାପ୍ତ ଅଧିକାରୀ ସ୍ବାତୀ ପଟ୍ଟନାୟକ କହିଛନ୍ତି ା