ଚୌଦ୍ୱାର,୫ା୪(ଡି.ଏନ୍.ଏ.): କରୋନା ଭଳି ଭୁତାଣରୁ ମୁକ୍ତି ପାଇବା ପାଇଁ ସାରା ବିଶ୍ୱ ଏବେ ଚିନ୍ତାରେ। ଏହାକୁ ରୋକିବା ଲାଗି ସଚେତନତା ହିଁ ଏକମାତ୍ର ବିକଳ୍ପ ବୋଲି ସରକାର କହୁଛନ୍ତି। ନିଜେ ସ୍ବଚ୍ଛ ରହିବା ସହ ପରିବେଶକୁ ସ୍ବଚ୍ଛ ରଖିବା ପାଇଁ ପରାମର୍ଶ ଦିଆଯାଇଛି। ଏଥିପାଇଁ ସରକାର ବିଭିନ୍ନ ପୌରପାଳିକାଗୁଡିକୁ ସାନିଟାଇଜ କରୁଥିବାବେଳେ ଏଥିରୁ ବ୍ୟତିକ୍ରମ ଦେଖାଯାଇଛି ଚୌଦ୍ୱାର ପୌରପାଳିକା। ଚୌଦ୍ୱାରରେ ଏବେ ଶଟଡାଉନ ଚାଲିଥିବାବେଳେ ଏପର୍ଯ୍ୟନ୍ତ ଦିନହେଲେ ପୌରପାଳିକା ତରଫରୁ ୱାର୍ଡଗୁଡ଼ିକରେ ବ୍ଲିଚିଂ ପକାଗଲା ନାହଁି କି ସହରକୁ ବିଶୋଧନ କରିବା ପାଇଁ କୌଣସି ପଦକ୍ଷେପ ଗ୍ରହଣ କରାଗଲା ନାହଁି। ଯାହାକୁ ନେଇ ଚୌଦ୍ୱାରବାସୀଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି। ସହର ବିଶୋଧିତ ହେଲେ କରୋନା ଭୂତାଣୁ ବ୍ୟାପିବା ବାଧକ ହେବା ସହ ପରିବେଶ ସ୍ବଚ୍ଛ ରହିବ ବୋଲି ବୁଦ୍ଧିଜୀବୀ ମତପ୍ରକାଶ କରିଛନ୍ତି। ପୌରପାଳିକା କେବଳ ଅସହାୟଙ୍କୁ ଖାଦ୍ୟ ଦେବାରେ ବ୍ୟସ୍ତ ରହୁଥିବାବେଳେ ଅଞ୍ଚଳର ସ୍ବଚ୍ଛତା ପ୍ରତି ଅବହେଳା କରୁଥିବା ଜଣାପଡିଛି। ତୁରନ୍ତ ପୌରପାଳିକା ଚୌଦ୍ୱାର ସହରକୁ ବିଶୋଧନ କରିବା ଦିଗରେ ପଦକ୍ଷେପ ଗ୍ରହଣ କରିବା ପାଇଁ ଦାବି ହୋଇଛି। ଏ ନେଇ ନିର୍ବାହୀ ଅଧିକାରୀ ପ୍ରଦୀପ୍ତ କୁମାର ବେହେରା କୁହନ୍ତି, ଆମ ପାଖରେ କୌଣସି ପର୍ଯ୍ୟାପ୍ତ ପରିମାଣର ସାଧନ ନ ଥିବାବେଳେ ଚୌଦ୍ୱାରରେ ଥିବା ଅଗ୍ନିଶମ ବିଭାଗ ସହିତ ଯୋଗାଯୋଗ କରିଥିଲୁ। ହେଲେ କଟକସ୍ଥିତ ମୁଖ୍ୟ କାର୍ଯ୍ୟାୟାଳୟରୁ ନିର୍ଦ୍ଦେଶନାମା ନ ଆସିଲେ କୌଣସି ସହଯୋଗ କରିପାରିବେ ନାହଁି ବୋଲି କହିଥିଲେ। ଖୁବଶୀଘ୍ର ବିଶୋଧନ ପାଇଁ ପଦକ୍ଷେପ ନେବାପାଇଁ ପ୍ରତିଶ୍ରୁତି ଦେଇଥିଲେ।