ଦିଗପହଣ୍ଡି,୩ା୬(ଡି.ଏନ୍.ଏ.): ଗଞ୍ଜାମ ଜିଲା ଦିଗପହଣ୍ଡି ବ୍ଲକ ଚୌଧୁରୀ ଟିକରପଡ଼ା ପଞ୍ଚାୟତ ଅଧୀନ ବିଭିନ୍ନ ଗାଁରୁ ୧୩ ଜଣ କରୋନା ପଜିଟିଭ୍ ଚିହ୍ନଟ ହେବା ପରେ ବୁଧବାର ମଧ୍ୟାହ୍ନରୁ ଗଞ୍ଜାମ ଜିଲାପାଳ ବିଜୟ ଅମୃତା କୁଲାଙ୍ଗେଙ୍କ ଅନୁମୋଦନ କ୍ରମେ ସମୁଦାୟ ଚୌଧୁରୀ ଟିକରପଡ଼ା ପଞ୍ଚାୟତକୁ ପ୍ରଶାସନ ପକ୍ଷରୁ ଅନିର୍ଦ୍ଦିଷ୍ଟ କାଳ ପାଇଁ କଣ୍ଟେନ୍ମେଣ୍ଟ୍ ଜୋନ୍ ଘୋଷଣା କରାଯାଇଥିବା ଦିଗପହଣ୍ଡି ଏକ୍ଜିକ୍ୟୁଟିଭ୍ ମାଜିଷ୍ଟ୍ରେଟ ତଥା ତହସିଲଦାର ଅଦୈତ କୁମାର ସ୍ବାଇଁ ଜଣାଇଛନ୍ତି। ଜଣେ ମହିଳା ସ୍ବାସ୍ଥ୍ୟକର୍ମୀ ଓ ତାଙ୍କ ସ୍ବାମୀ, ୨ ଆଶାକର୍ମୀ, ଜଣେ ଅଙ୍ଗନୱାଡ଼ି ସହାୟିକାଙ୍କ ସମେତ ସମୁଦାୟ ୧୩ ଜଣଙ୍କ ସ୍ବାବ୍ ପରୀକ୍ଷା ପରେ ସେମାନେ ସଂକ୍ରମିତ ଥିବା ନେଇ ମଙ୍ଗଳବାର ରାତିରେ ରିପୋର୍ଟ ମିଳିଥିଲା। ଜିଲା ପ୍ରଶାସନ ପକ୍ଷରୁ ଏନେଇ ବିଧିବଦ୍ଧ ସୂଚନା ସ୍ଥାନୀୟ ପ୍ରଶାସନର ହସ୍ତଗତ ହେବା ପରେ ଦିଗପହଣ୍ଡି ବିଡିଓ ହଳଧର ଶବର, କୋଭିଡ୍-୧୯ ନୋଡାଲ ଅଧିକାରୀ ରାଜକିଶୋର ପଟ୍ଟନାୟକ, ଚିକିଟି ଏସ୍ଡିପିଓ ସୁରେନ୍ଦ୍ର ନାଥ ମୁର୍ମୁ, କେ. ନୂଆଗାଁ ଥାନା ଆଇଆଇସି ମାଧବାନନ୍ଦ ନାୟକ ପ୍ରମୁଖ ସମ୍ପୃକ୍ତ ଅଞ୍ଚଳକୁ ସିଲ୍ କରି ଦେବା ସହ ଚିହ୍ନଟ ୧୩ ଜଣ ସଂକ୍ରମିତଙ୍କୁ ଛତ୍ରପୁର ନିକଟ ଶୀତଳା ପଲ୍ଲୀସ୍ଥିତ କୋଭିଡ୍ ହସ୍ପିଟାଲକୁ ସ୍ଥାନାନ୍ତରିତ କରାଯାଇଥିଲା। ଚାନ୍ଦପୁର – ନୂଆପଡ଼ା – ଭ୍ରମରପୁର ମୁଖ୍ୟ ରାସ୍ତାକୁ ସିଲ୍ କରି ଦିଆଯିବାରୁ ବୁଧବାର ସକାଳଠାରୁ ରାସ୍ତାରେ ଗାଡ଼ି ଚଳାଚଳ ବନ୍ଦ ରହିଛି। ମଧ୍ୟାହ୍ନରେ ବ୍ରହ୍ମପୁର ଉପଜିଲାପାଳ ସିନ୍ଧେ ଦତ୍ତାତ୍ରୟ ଭାଉ ସାହେବ ଚୌଧୁରୀ ଟିକରପଡ଼ା, ଗୌଡ଼ ଗାଁ, ବଜ୍ରଗୁମ୍ମା, ଢେପା ପେଣ୍ଠ, ଭ୍ରମରପୁର ପ୍ରଭୃତି ଗାଁରେ ପହଞ୍ଚି ପ୍ରଶାସନିକ ଅଧିକାରୀ, ସରପଞ୍ଚ କୃଷ୍ଣଚନ୍ଦ୍ର ସାହୁ, ସଂଯୁକ୍ତା ଚଣ୍ଡଙ୍କ ସହ ସବିଶେଷ ଆଲୋଚନା କରି ଫେରିଛନ୍ତି।
