ଛଟେଇ ଶ୍ରମିକଙ୍କୁ ପୁନଃ ନିଯୁକ୍ତି ଦାବି: ପିଆଇସିଟି ବର୍ଥ ଟର୍ମିନାଲ ସମ୍ମୁଖରେ ଧାରଣା

ପାରାଦୀପ,୧୧ା୧(ସ୍ବ.ପ୍ର.): ପାରାଦୀପ ବନ୍ଦରର ପିଆଇସିଟି ବର୍ଥ ଟର୍ମିନାଲ ସମ୍ମୁଖରେ ଶୁକ୍ରବାର ପାରାଦୀପ ପୋର୍ଟ ଆଣ୍ଡ ଡକ୍‌ ମଜଦୁର ୟୁନିୟନ ପକ୍ଷରୁ ଧାରଣା ଦିଆଯାଇଛି। ଉକ୍ତ ପ୍ରକଳ୍ପରେ କାମ କରୁଥିବା ୬ ଜଣ ଶ୍ରମିକଙ୍କୁ ଛଟେଇ କରାଯାଇଛି। ସେମାନଙ୍କୁ ପୁନଃ ନିଯୁକ୍ତି ଓ ଅନ୍ୟ ଶ୍ରମିକଙ୍କ ନିୟମିତ ଦରମା ଦାବିରେ ସକାଳେ ଗେଟ୍‌ ବନ୍ଦ ଆନ୍ଦୋଳନ ହୋଇଥିଲା। ସନ୍ଧ୍ୟାରେ ଆଲୋଚନା ପାଇଁ ପ୍ରଶାସନ ଓ ପୋଲିସ ପ୍ରସ୍ତାବ ଦେବା ପରେ ଗେଟ୍‌ ଅବରୋଧକୁ ହଟାଇ ଦିଆଯାଇଛି। ଆଲୋଚନା ପର୍ଯ୍ୟନ୍ତ ଶାନ୍ତିପୂର୍ଣ୍ଣ ଧାରଣା ଜାରି ରହିବ ବୋଲି ୟୁନିୟନ ପକ୍ଷରୁ କୁହାଯାଇଛି।
ସୂଚନାଯୋଗ୍ୟ ଯେ, ପାରାଦୀପ ବନ୍ଦରର କ୍ଲିନ୍‌କାର୍ଗୋ ବର୍ଥ ପାଇଁ ପିଆଇସିଟି (ପାରାଦୀପ ଇଣ୍ଟର ନ୍ୟାଶନାଲ କାର୍ଗୋ ଟର୍ମିନାଲ) ୩୦ ବର୍ଷିୟା ବିଓଟି (ବିଲ୍ଡ ଅପରେଟ ଟ୍ରାନ୍ସଫର) ବ୍ୟବସ୍ଥାରେ ନେଇଛି। ସେଥିରେ ନିୟୋଜିତ ଶ୍ରମିକଙ୍କ ମଧ୍ୟରୁ ୬ଜଣଙ୍କୁ ଗତ ବର୍ଷକ ମଧ୍ୟରେ ବାହାର କରାଯାଇଛି। ସେମାନେ ହେଲେ ବି.ବେଣୁ, ବୈଦନାଥ ମଲ୍ଲିକ, ବାବୁଲି ମଣ୍ଡଳ, ଜ୍ଞାନ ମଲ୍ଲିକ, ପ୍ରତାପ ପ୍ରଧାନ ଓ ନିମାଇଁ ମହାନ୍ତି। ସେହି ୬ଜଣଙ୍କ ପୂର୍ବ କାମରେ ନିଯୁକ୍ତି ଓ ଅନ୍ୟ ସମସ୍ତ ଶ୍ରମିକଙ୍କ ଦରମା ନିୟମିତ ପ୍ରଦାନ କରିବା, ମାସକୁ ୨୬ ଦିନର କାମ ଯୋଗାଇଦେବା, ଇପିଏଫ୍‌, ଇଏସ୍‌ଆଇ ସୁବିଧା କରିବା, ସୁରକ୍ଷା ନିରାପତ୍ତା ସାମଗ୍ରୀ ଦେବା ଆଦି ଦାବିରେ ୟୁନିୟନର ଶତାଧିକ ଶ୍ରମିକ ସକାଳେ ପିଆଇସିଟି ମୁଖ୍ୟ ଫାଟକ ଆଗରେ ଧାରଣା ଦେଇଥିଲେ। ପରେ ପ୍ରଶାସନିକ ଆଲୋଚନା ପ୍ରତିଶ୍ରୁତି ପାଇବା ପରେ ଫାଟକ ଅବରୋଧ ହଟିଛି। କିନ୍ତୁ ଆଲୋଚନା ହେବା ପର୍ଯ୍ୟନ୍ତ ଧାରଣା ବଳବତ୍ତର ରହିବ ବୋଲି ୟୁନିୟନ ସମ୍ପାଦକ ସନାତନ ବେହେରା କହିଛନ୍ତି। ଏ ପ୍ରସଙ୍ଗରେ କମ୍ପାନୀର ମାନବ ସମ୍ବଳ ଅଧିକାରୀ କୂଳମଣି ପଣ୍ଡାଙ୍କୁ ପଚାରିବାରେ, ସମ୍ପୃକ୍ତ ଶ୍ରମିକଙ୍କ ମଧ୍ୟରୁ ଜଣେ ବର୍ଷେ ତଳୁ ଗଞ୍ଜେଇ ବେପାର କରିବାରୁ ତାଙ୍କୁ ସମ୍ପୃକ୍ତ ଠିକାଦାର ବାହାର କରିଥିଲେ। କ୍ୟାପଟେନ୍‌ ତାଙ୍କ ଭାଷା ନ ବୁଝି ପାରିବା ସହ ମଦ ଦେଇ ନ ଥିଲେ। ଏଥିରେ ପ୍ରତିକ୍ରିୟାଶୀଳ ହୋଇ ଶ୍ରମିକମାନେ ତାଙ୍କୁ ମାଡ଼ଗାଳି ଦେଇଥିଲେ। ଉକ୍ତ ଘଟଣା କମ୍ପାନୀ ଓ ଆମ ଦେଶକୁ ବଦନାମ୍‌ କରିଥିବାରୁ କମ୍ପାନୀ କର୍ତ୍ତୃପକ୍ଷଙ୍କ ସୁପାରିସକ୍ରମେ ତାଙ୍କୁ କାମରୁ ବହାର କରାଯାଇଛି। ଯେତେେବେଳ ଏହି ଘଟଣା ଘଟିଥିଲା ସମ୍ପୃକ୍ତ ଶ୍ରମିକମାନେ ଅନ୍ୟ ଏକ ୟୁନିୟନରେ ସାମିଲ ଥିଲେ। ଏବେ ଡକ୍‌ ମଜଦୁର ସଂଘରେ ମିଶି ଏପରି ହଇରାଣ କରୁଛନ୍ତି। ସମସ୍ତ ଘଟଣା ପୂର୍ବରୁ ଏବଂ ଏବେ ପ୍ରଶାସନକୁ ଅବଗତ କରାଯାଇଛି। ଆସନ୍ତା ସପ୍ତାହରେ ପ୍ରଶାସନ ଯାହା କିଛି ନିଷ୍ପତ୍ତି ନେବେ ବୋଲି ସେ କହିଥିଲେ।